Fartottit hi Abittot 10

Bithroos kee Korneeliyos

1Qayseeriyalle wuli Korneeliyos akko yarhxin xiyawti yine. Usuk Thiliyaan caskar filcoh tamidhdhigemko, bool caskartiyah manabotta kuuk yine. 2Ishe kee ishi xawazlih Yallah yacbudeh Yalla mashshiita, mango zaka xiyawah yaxayeh, umman gedda Yalla dhaacita tiya kuuk yine. 3Wuli kaso saaca adox wakalille, Yallih malaykatto cadimbililih mablodde yubleh: “Korneeliyos” akko yerhxe. 4Rig-yerhxeh kulux adde yerhxeyaako mashshiitak: “Maddara, ayim kinni?” akko yerhxe. Usuk lel: “Ku dhaaco kee taxaye zaka, kabbaatimteh Yallih nifille kab-terhxeh tane. 5Kado lel, Yobba fanah xiyaw farteh Simcoon, Bithroos akko yarhxinya bah” akko yerhxe. 6“Usuk tamaa qaraabut nakisha Simcoon akko yarhxin, badti gimamalle care-le xiyawtoolih gerhentaatinoh orobak yane” akko yerhxe. 7Amaa aalih waanishak yine malaykatti akko yedee gedda lel ishi khaddamteeko lammaah deecime. Kaa takhdume ishi caskarko lel Yallah yacbude inkettah deecime. 8Tamaa tekkem inkoh akah warishemko sarrah Yobba fanah ten fare.

Bithroos mablo

9Leddi max, usun sinni araxadde anuk, amaa daafoh kab-yerhxin gedda, Bithroos lellecti abrhah yassallaw cari amolle yewce. 10Usuk safriiteh lel beeto farhe, usun mawo asqereerebuk lel himma xabeyaako, 11caran fakkiteh lel wuli naba xalagah higgidinti affara ishi nukuruh baarholle oobak yuble. 12Amadde lel umbuka affara miila-le ufayle, mexeltam kee zibi kimbir yinin. 13“Ugut, Bithroos; urxudaaki bet” yarhxe dhaw yemeete. 14Bithroos laakin: “Mitakke, Maddara, najaasa lem kee xaraame kinam caduruh beeteh maarhige” yerhxe. 15Amaa dhaw gabbaaceh lel malammit gedda: “Yalli xalaale akko abeh yanemik xaraame akko marhxin” akko yerhxe. 16Tayim adooxa gedda tekke, amaa xaaja lel akkanih caranalle tumuqquce.

17Kado, Bithroos ta yubleh yine mablo ayim kinam ishi addadde amxeesebuk, taykinna, amaa Korneeliyosko farritime mari, Simcoon cari awla yanem esserimak carafalle daw-yerhxin. 18Deecimeenih lel Simcoon Bithroos akko yarhxin gerhenti amadde yanem kee esseren. 19Bithroos amaa mablodde axeesebuk, Ufayi: “Taykinna, adooxa xiyawti ku wagiyak yanin. 20Anu ten fareh aniyomhi sabbatah lammaa-garbitekkah alle obaaki gor akah tik” akko yerhxe. 21Bithroos lel amaa xiyawalle alle oobeyaako: “Tamaa atin wagiyak tanin xiyawti yotta kinni. Sin mumut hi sabab ayim kinni?” akko yerhxe. 22Usun lel: “Tamaa bool caskartiyah manabotta kin Korneeliyos, xaqqi-wanna kee Yalla mashshiitah, umbuka Yahuud xiyaw mece tiya kinni akko yarhxinya, ishi carelle koh deecimeh kooko waanitta yaabbo, quddus kin malaykatti akah warishe” akko yerhxin. 23Usuk ten orbisheyaako gerhah ten kabbaate. Leddi max uguteyaako tenlih yedee, saculko gari lel Yobbaako kaa goorishen. 24Malammit max lel Qayseeriyadde oroben. Korneeliyos lel ishi zamad kee dhaye ishi cadhdhitih inkidde akah deecimeh ten ilaalak yine. 25Bithroos orobe gedda, Korneeliyos akah garayeyaako kaa iballe radeh akah yucbude. 26Bithroos laakin: “Ugut, anu gantah kotta balih xiyawto kinni kiyomki” akko yerhxe. 27Usuk kaalih waanishak lel addadde orobe, tekette mango xiyaw lel akah sugen. 28“Akkinnan Yahuuddi Aki-maradde yangalem hido Aki-marahi caredde orobam arax makinam atin sinneh taarhigiinim kinni. Yakko kibah aki xiyawtok najis hido thaahir maki arhxemko Yalli yi yuybulluweh yane. 29Amaymih yolle farten gedda, mixiniyooki emeete. Kado lel aymih kinni yolle farteenim?” akko yerhxe.

30Korneeliyos lel: “Affara lellecik basolle, ta saaca, inni caredde kasit saaca adox wakalille dhaaco abitak, taykinna, wuli xiyawti ifisha saradde yi nifille daw-yerhxeh: 31‘Korneeliyos ku dhaaco tomobbeh tane, zakah toxoyem lel Yallih nifille koh kabbaatimteh tane. 32Amaydo, Yobba fanah farteyaako Simcoon akko yarhxin Bithroosuh akah deecim. Usuk qaraabut nakisha Simcoon caredde badti gimamalle gerhentaatinoh yane’ yok yerhxe. 33Amaymih, anu lel akkanih kolle fare, atu lel temeetemih mecem abte. Amaydo, kado, Maddari akah ku yeemereh yanem kottaako naabbo, inkoh Yallih nifille taykino” akko yerhxe.

Aki-mari mece ware yaabbin

34 # Gabbaacime Sercat 10:17 Amaymih, Bithroos waanisho erherhisheyaako: “Rummah, Yalli xiyaw mibarhisham eerhegeh aniyo. 35Umman wathunulle laakin, kayya mashshiitah, xaqqe abinnan tiya kabbaata. 36Yalli umman tiyahi Maddara kin Yeesus Masiix araxah abeh Israa-eel cindhamalle salaam mece ware warroyshak farem ta farto kinni. 37Amaa Yohannis warroyshe aythammaqko sarrah, Galiilaako erhedhdheh Yahuudiya fanah tekkem atin sinneh taarhigin: 38amayim lel, Yalli Naazret Yeesus aaginah Quddus kin Ufaye kee Xaylaalih kaa yuskutem kinni. Yalli kaalih yinemhi sabbatah lel, tuula kee tawlalle hel-yerhxeh mecem abak ibliis yibbirheh yine mara inkoh uruse. 39Nanu lel Yahuud dik kee Yerusaalemille abemih inkoh shohoda kino. Masqal camiddak kaa takareenih lel kaa yigdifin. 40Yalli laakin maddaxit lellec rabaako kaa uguseh yamballawo kaa dhicshiishe. 41Usuk umman marah akkekkah yumbulluwem, tamaa Yalli awwalko shohoda yakkoona dooreh, usuk rabaako ugutek sarrah lel kaalih betteh toocobe nottah bisa kinni. 42Usuk, Yalli tanem kee rabtemih daaniya yakko dhirhiye tiya kinam xiyawah warishno kee nashhado ni yeemere 43Kayyah aamininnanti kaa migacalle zambi xabbot geyo kinamah nobowa inkoh kaa shohoda kinon” akko yerhxe.

Aki-mari Quddus kin Ufaye kabbaatan

44Bithroos tayim arhxih anuk, amaa waanitta yoobbe maralle inkoh Quddus kin Ufayi alle oobe. 45Amaa Bithrooslih yemeeteh yine yaamine maraako askok kalum abe mari, Quddus kin Ufayih muttuxuwa Aki-maralle oobemih cibrah raben. 46Amayim lel, aki waanih waanishak kee Yalla faylishak yoobbiinimhi sabbatah kinni. Sarrah Bithroos: 47“Ta mari notta balih Quddus kin Ufaye kabbaateenik sarrah layeh yanthammaqhoona ten deeso dhiicati miyatto kinni?” yerhxe. 48Amaymih, Yeesus Masiix migacalle yanthammaqhoona ten yeemere. Sarrah, usuk tenlih dago max sugo kaa esseren.

Currently Selected:

Fartottit hi Abittot 10: SCC

Highlight

Copy