Taetas 3
3
Agosia na hua te talana
1Ko kori vanira laka ira na Kristin kara toha vavadira ira na taovia leho tana gaumane ma na tinoni leholeho laka nira kesana. Ira kara valingera, ma kara onioni na agosiana na omea talana. 2Ma kara mui ira na tutugu sekolia ke chikai, ma kara mui na vaisuhuni. Mi ira kara toha haru sivo ma kara toha tana rapo kolura e visa na tinoni.
3I sau, ihita a bule lakamu ma voo na vavalinge, mara lekasihita ma goni savi. E visa na papada ngalongalo ma na papada sekoseko nira ara sorihita. Na mamauridada hita e danga dato na seko ma na masuhu, ma na vaihalatihi. 4Me seisuge ta vahai hita, ia God nida Tahamauri te tihisi vanihita nina sasahavi ma na nina talana, 5me taha maurisihita hita. Me teha siki matena ta agosia hita na omea te hoto, ma ia matengana tana nina sasahavi ia vanihita hita. Me taha maurisihita me vuli malehita, tahuna ta bocha vaolu hita tana Tarunga Tabu. 6Ia God e sau matadu vanihita na Tarunga Tabu tana hua te agosia ia Jisas Kraes nida Tahamauri. 7Mi tana nina toba talana ia, me kori lengaa hita a hoto. Ia e agosia visa na omea nira de, ma ka ni tamania hita na papada susuliha ta ba ka tamania hita na mamauri sali. 8Na sasani nira de na valagu tutuni.
Nau u ngangavina ihoe ko varakoena na sasani de, ma kara ni toha taoni kalavataa ira tara donua ia God, ma kara agosia na hua te talana. Na sasani nira de e talana, me ba ke sanga kodea visa na tinoni. 9Mihoe ko mui sanga na vaisuhuni bulebule, mo ko mui sanga na vaisuhuni matena siki omea tana vunguvungu, mo ko mui na pidu tugaleta ma na pidu matena nina keja ia God te sau vania ia Mosis. Matengana na naunau vahai nira nia e teha vahai siki omea, me teha ke vu sangaa ke chikai. 10Tina vahai siki tinoni ke vahania ma kara tavota ira na tinoni Kristin, ko valagu susuliha vania mo ko kori vania ke kode agosia na naunau vahai nia. Ba, me tina vahai ke agosi lakaa ia, mo ko valagu vani lakaa. Mi bukena tina vahai ke ba teha vata nomu ia na vavalinge, mo ko livua ke toha salihi. 11Ihoe o hana nohaa, nidira papada tinoni vahai nira nia e ruri solehana. Ma na omea sekoseko tara agosia, ara tihisi lengaa kovahai ira ara seko solehana.
Na kokodena nina valagu ia Pol
12Nau ba ku sau atua ia Atemas teha ma ia Tikikas ke sangaho hoe. Mi tahuna ke chau atu ke chikai, ko tovo kalavataa hoe na chau mai tatagu nau i Nikopolis, matengana nau u pada vahania ku toha inge tana tahu ni koburu nia. 13Mo ko tovo kalavata lakamua hoe na sangaa ia Senas, na ticha tana keja ni gaumane, ma ia Apolos, tina vahai kara ko tamania koera visa na omea tara ko ngangavina tana kodira diadia nia. 14Nida tinoni nira hita kara toha taoni kalavataa ma kara agosia na omea talana, kara ni sangaa na tinoni te teha tamani siki omea, ma kara ni mui na toha volo.
15Ira kode tara toha koluu nau de ara kori mamahela vaniho hoe. Mihoe ko saua nimami kori mamahela hami vanira na Kristin inge tara sahavihami hami.
Nina toba talana ia God ke toha koluhamu hamu kode.
Currently Selected:
Taetas 3: mln
Highlight
Share
Copy
Want to have your highlights saved across all your devices? Sign up or sign in
© 2024 (active), Wycliffe Bible Translators, Inc. All rights reserved
