Mateo 14
14
O Herodes shounell o Yezousestar
1Ap ko tsiro his o Herodes o baro ray pral o them Galilea. Oun yob shounas, hoy pral o Yezouseste rakedo vas.
2Oun yob penas ap peskre pralstoune boudepangre: “Kava morsh hi o Yohanni, kova, kay taufras i menshen. Yob stas i moulendar pre. Doleske hi les savi zoor, te nay krell lo ko baro koova.”
O Yohanni his moulo. Doleske penas o Herodes kova.
Hoske o Yohanni maredo vas
3-4Glan ko tsiro las o Herodes koy romyat peskro phralestar Filip. Lakro lab his Herodia. Oun o Yohanni penas leske: “Kova hi gar mishto, kay tou lal tiro phraleskri romyat.”
Doleske penas o Herodes ap peskre lourdende, te taprenn le o Yohannes, te pandenn le les, oun te vitsrenn le les an o stilepen. 5Yob marals les, te vans gar kol boud menshe koy, kay patsan, te hi o Yohanni i Debleskro rakepaskro. Kolendar daras o Herodes.
6Koy vas ko dives, kay vas o Herodes i bersh phoureder. Oun yob moukas i baro rhapen te krell. Oun i Herodiakri čay vas, oun khelas glan leste oun glan kolende, kay pash leste hi. Oun lakro khelepen his yaake shoukar an leskre yaka, 7te das lo pes sovel, te dell lo lat lauter, hoy yoy lestar mangella.
8Oun yoy djas pash peskri date oun poučas latar, hoy yoy nay lestar mangella. Oun koya penas ap late, hoy yoy hounte leske penella. Oun yaake penas li ap leste: “De man kate ap i čaro o shero o Yohannestar, kova kay taufras i menshen!”
9Har o Herodes kova shounas, khaytas les, hoy yob lake penas. Palle dikas lo ap kol tsele menshende, hoy shounan, har yob pes sovel das. Doleske penas lo ap peskre lourdende, te denn le lat, hoy yoy kamas. 10Dran kova vas o Yohanneske leskro shero tele dino an o stilepen. 11Oun yon čivan leskro shero ap i čaro, oun dan les i čate. Oun koya anas les pash lakri date.
12Oun o Yohanneskre mala van, lan o moules, oun paskran les. Oun palle djan le pash o Yezouseste, oun penan les leske.
O Yezous dell panč zerya menshen te rhal
13Oun har o Yezous kova shounas, djas lo an i bero, oun ouleras kote, kay hi lo kokres. Boud menshe shounan, kay yob djas peske. Oun yon van dran i forya, te djan le ap o them pash leste. 14Oun har o Yezous dran o bero djas, dikas lo kal boud menshen, oun les khaytan le. Oun yob kras kolen sasto, kay mashkral lende nasselo hi.
15Har o kham tele djas, van leskre mala pash leste, oun penan ap leste: “Kate, kay mer ham, della či te rhal, oun i rati vella. Biče kal menshen toutar, te djan le an i gaba, te ginenn le penge čomone te rhal!”
16Penas o Yezous ap lende: “Yon nashte ačenna kate. Denn t'mer len te rhal!”
17“Men hi gar boudeder har panč mare oun douy mače,” penan le.
18Penas lo ap lende: “Anenn len pash mande!”
19Palle penas lo ap kol tsele menshende, te beshenn le pen. Oun yob las kol panč mare oun kol douy mače, dikas pre, parkras pes pash peskro dadeste an o bolepen, oun phagas kol mare an kotya, oun das len peskre malende. Oun kalla dan len i tsele menshende te rhal. 20Oun yon rhan lauter, oun van čalo. Oun pal o rhapen hadan le kol kotya mare pre, hoy pral ačan. Oun deesh-te-douy marengre gone van pherdo. 21Kolla, kay rhan, his nay yaake panč zerya (5.000) morsha. Ninna boud djouvya oun čave his kote pashel.
O Yezous djal ap o baro pani
22Oun sik pal kova tradas o Yezous peskre malen, te djan le an o bero, oun te oulerenn le glan leste ap o vavar panyeskri rig. Yob ačas pash i menshende, te bičrell lo len khere. 23Palle djas yob peske kokres ap i berga, te rakrell lo peskro dadeha an o bolepen. Har i rat vas, his lo kote kokres.
24O Yezouseskre mala his an o bero dour vin ap o baro pani. Kote phourdas i zorelo dourho pral o pani. Oun o pani djas pral, oun vitsras o bero pral oun tele.
25Starenge taysarlake djas o Yezous ap o baro pani pash lende. 26Oun har peskre mala les dikan ap o pani te djal, trashan le oun penan: “Kava hi i moulo!”
Oun yon dan gole i daryatar.
27Koy penas lo sik ap lende: “Ma darenn! Me hom. Lauter hi mishto!”
28Penas o Petro ap leste: “Ray, tou te hal kova, pen mange, te djap ap o pani pash toute!”
29“Ab!” penas lo.
Oun o Petro djas dran o bero, oun djas ap o pani pash o Yezouseste. 30Ap yek kopo hayvas lo, har zorelo o dourho pral o baro pani phourdas. Oun i daar tapras les. Koy djas lo lokes tele, oun das i daryatar gole: “Ray, ma mouk man te tassell!”
31O Yezous rikras leske o vast koy, tapras les, oun penas ap leste: “Tiro patsepen hi tikno. Hoske patsal man gar?”
32Oun yon djan an o bero, oun ko zorelo dourho phourdas bouder gar.
33Kolla, kay an o bero his, vitsran pen glan o Yezouseste tele, oun penan: “Čačepah, tou hal o Debleskro čavo.”
O Yezous krell i nasselen sasto an o them Genezaret
34Oun yon ouleran vergel oun van an o them Genezaret. 35Oun har i menshe kote dikan, te vas o Yezous pash lende, moukan le kova an kol tsele gaba oun forya trouyel te penell. Oun kote anan le i tsele nasselen pash leste, 36oun mangan lestar, te moukell lo len i kotar leskro ripen an-taprell. Oun hakeno, kay les an-tapras, vas sasto.
Currently Selected:
Mateo 14: Sint-Man2024
Highlight
Share
Copy
Want to have your highlights saved across all your devices? Sign up or sign in
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
