Louka 8
8
I harho vitsrell djob ap peskro kotar phoub
1Oun o Yezous djas an i forya oun gaba trouyel, te penell lo i menshenge o lačo lab, kay o Devel kamell len dran o čilačepen vin te lell, oun kamell lengro ray te vell. Leskre deesh-te-douy mala djan leha.
2Oun boud djouvya, kolen yob sasto kras, djan ninna leha. Mashkral kol djouvyende his ninna kolla, kay bengen an pende his. Efta benga tradas lo dran i Mariate vin, kay kharas ninna Magdalena. 3Ninna i Susanna djas leha, oun i Yoanna. Lakro rom his o Kouza. Kova his o pralstouno boudepaskro an o Herodeskro kheer. Oun boud vavar djouvya djan leha, te denn le len rhapen oun pipen dran kova, hoy len hi.
4Dran boud forya van boud menshe pash leste khetne. Oun yob rakras ap lende save laba, kay hi i khatedo čačepen dren.
5Oun yob penas: “I harho djas vin, te vitsrell lo o djob ap peskro kotar them, te vell ko djob bares. Oun tikne kotya peran ap o drom, oun i menshe stakran len khetne. Oun i čirkle rhan len pre.
6Oun vavar djob peras ap i barra. Kote his gar doha pani. Oun har ko djob dran i phoub vin vas, rhačras o kham les.
7Oun vavar djob peras mashkral i soubyengre bourra, oun kol bourra van yaake baro, te las o djob kek dourho bouder, oun yob meras.
8Vavar djob peras ap i lači phoub, oun vas baro, oun hidjras sheel kope yaake boud.”
Pal kova das o Yezous gole: “Moukenn kova an t'maro shero trouyel te djal!”
O Debleskro lab hi har o djob
9Oun o Yezouseskre mala poučan lestar: “Hoy kameh tou menge kal labentsa te penell?”
10Penas lo ap lende: “O Devel moukell t'men te hayvell, har kote djal, kay dell lo menshen pash peste gole, te djan le ap leskro drom. Kova djinenn i vavar menshe gar. Lenge penau laba, kay o čačepen dren khatedo hi. Me rakrau yaake, te dikenn le kova nay, oun hayvenn les gar, oun yaake, te shounenn le les nay, oun hayvenn les gar.
11Kanna penau t'menge kova yaake, te hayvenn t'mer kova: O djob hi o Debleskro lab.
12Ko drom hi har o dji kol menshendar, kay shounenn o Debleskro lab. Oun o beng vella, oun lell kova lenge pale dran o dji vin, te patsenn le gar ap o Debleste oun venn gar ap leskro drom.
13Ko kotar phoub, hoy hi pherde barra, hi har o dji kol menshendar, kay shounenn o Debleskro lab, oun lenn les barhteles pre. O lab vell gar zorelo an lengre djia. I tikno tsiro patsenn le. Oun te vell pharo tsiro ap lende, vitsrenn le pengro patsepen ap i rig.
14Ko kotar phoub, kay o djob mashkral i soubyengre bourra peras, hi har o dji kol menshendar, kay shounenn o Debleskro lab oun rikrenn les i tsiro an pengre djia. Te vell i daar an lengro djipen, oun te vell o bravlepen glan lengre yaka, oun ko shoukar djipen, palle vell ko lab lendar tassedo oun rakrell bouder gar an lengre djia.
15Koy lači phoub hi har o dji kol menshendar, kay o Debleskro lab shounenna, oun djivenn koy pal. An lengre djia vell ko lab zorelo. Oun yon ačenn zoreles an o patsepen tardo.”
O Debleskro lab hi har i momeli
16“Kek rhačell i momeli an, oun čivell i piri pral. Oun kek rhačell i momeli an, oun čivell lat tel o čiben. Na-a, yob čivell lat ap i momelengri, te vell koy momeli diklo hakenestar, kay vella an o kheer.
17Yaake hi kova ninna o Debleskro labeha. Yek dives dikenn le kova, hoy yon kanna gar dikenna. Yek dives shounenn le oun hayvenn le, hoy yon kanna gar djinenna. 18Denn yak, te shounenn t'mer ap o Debleskro lab! Koon o Debleskro lab an o dji rikrella, kova hayvell les boud oun boudeder. Koon o Debleskro lab gar an o dji rikrella, koleske vell ninna kova krik lino, hoy yob patsell, te hi les.”
O Yezouseskri day oun leskre phrala
19O Yezous his an o kheer oun boud menshe his troul leste. Oun leskri day oun leskre phrala kaman pash leste te djal, oun nay van gar pash leste.
20Koy penas yek ap leste: “Tiri day oun tire phrala hi vin tardo, oun kamenn tout te dikell.” 21Penas lo: “Miri day oun mire phrala hi kolla, kay o Debleskro lab shounenna, oun kova ninna krenna.”
Ap o divyo pani
22Vas i dives, kay o Yezous peskre malentsa an i bero djas. Oun yob penas ap lende: “Djas ap i vavar panyeskri rig!” Oun yon ouleran ap o baro pani. 23Har yon ap o baro pani his, sovas lo dren. Oun i baro divyo dourho phourdas pral o baro pani. Oun o pani vas divyo, oun djas pre te tele. Oun boud pani vas an o bero dren, yaake boud, te kamas ko bero tele te djal. 24Oun yon djan pash leste, djangran les pre, oun penan: “Sikepaskro, sikepaskro, ste pre, mer tassah!”
Oun yob stas pre, oun penas ap ko zorelo dourho, hoy phourdas pral o pani: “Ač kanna!” Oun ap o divyo pani penas lo: “Mouk tele!” Oun o zorelo dourho phourdas bouder gar. Oun o pani his bouder gar divyo, oun das bouder kek gole.
25Oun yob penas ap lende: “Kay hi t'maro patsepen?” Oun yon trashan, oun penan yek ap o vavareste: “Koon hi kava morsh? Yob penell ap o zorelo dourho, te phourdell lo bouder gar, oun ap o pani, te čivell lo pes. Oun yon shounenn ap leste.”
O Yezouses hi i zoor pral o bengeste
26Oun yon ouleran doureder, oun van ap i vavar panyeskri rig an ko them Gerasa. Kava his vergel o them Galilea čiddo.
27Oun o Yezous djas dran o bero. Kote vas i morsh dran o foro. An koleste his benga. I rah tsiro his yob nango, oun djivas gar an i kheer. Yob djivas an i moulengre khera. 28-29Boud kope tapras les o beng. Oun i menshe pandan les sasterne shellentsa ap i vasta oun ap i pire. Yob phagas kol sasterne shelle pestar tele. Oun o beng tradas les an o moulo them. Har ko morsh kanna o Yezouses dikas, vitsras pes lo glan leste ap i phoub. Oun o Yezous penas zoreles ap o bengeste: “Dja lestar vin!” Koy das yob bari gole: “Yezous, čavo o baro Deblestar, hoy kameh tou mandar? Me mangau tout: Ma douke man!”
30Oun o Yezous poučas lestar: “Har khareh tou?”
Penas lo: “Legioni.” Ko lab sikrella, te his boud benga an leste.
31Oun yon mangan les, te bičrell lo len gar an i telstouni phoub.
32Oun kote ap koy berga his boud bale, hoy kote rhan. Oun kol benga mangan lestar: “Mouk men an kol balende te djal!” Oun yob moukas len an lende dren te djal.
33Koy van kol benga dran o morsheste vin, oun djan an kol balende. Oun kol tsele bale van divyo, oun nashan i berga tele, oun stan an o baro pani, oun tassan.
34Kol morsha, kay dan ap i balende yak, dikan kova, oun nashan an o foro oun an i gaba, oun penan kova i menshenge.
35Oun kol menshe kaman te dikell, hoy kote djas, oun van pash o Yezouseste. Oun yon dikan ko morshes, dran koleste i benga vin djan. Yob his pash o Yezouseste beshdo, his an-rido, oun bouder gar divyo. Koy van yon dareno. 36Oun kolla, kay dikan, har kava morsh sasto vas, penan kova kolenge, kay dran i forya oun dran i gaba van.
37Oun i bari daar vas ap lende. Oun kol boud menshe dran o them Gerasa penan ap o Yezouseste: “Mer mangah tout: Dja touke mendar!” Oun yob djas an o bero, oun ouleras pale.
38Ko morsh, kay sasto vas, mangas lestar, te ačell lo nay pash leste. O Yezous penas ap leste: 39“Dja khere oun pen i menshenge, hoy o Devel touke kras!”
Oun kava morsh djas peske, oun penas i tsele menshenge an peskro foro, havo baro koova o Yezous ap leste kras.
O Yayreskri čay oun i nasseli djouvel
40Oun o Yezous vas pale ap i vavar panyeskri rig. Oun boud menshe his kote tardo, oun lan les kamles pre. 41Koy vas i morsh pash o Yezouseste. Leskro lab his Yayro. Yob his i pralstouno an i biboldengri kangri. Kova vitsras pes glan o Yezouseste tele, oun mangas les, te vell lo an leskro kheer.
42Leskri čay, kay his deesh-te-douy bersha phouro, his ap o merepen čiddo. Oun les his kek vavar čave har koya. Oun o Yezous kamas leha te djal. Oun boud menshe his troul leste oun djan lentsa.
43Koy pashel his i djouvel. Kolat hi deesh-te-douy bersha i ratlo nasslepen. Koya das lauter, hoy lat his djipaske, i dramangren, oun kek nay kras lat sasto.
44Oun yoy djas pal o Yezouseste, oun tapras ap leskro ripen. Ap yek kopo vas li sasto.
45“Koon tapras ap miro ripen?” poučas o Yezous. Oun hakeno das bourhoste.
Penas o Petro leske: “Ray, boud menshe hi troul toute, oun taprenn tout an.”
46Koy penas o Yezous: “Yek tapras man an. Me hayvom, har zoor mandar krik djas.”
47Har koy djouvel dikas, kay o Yezous lauter djinas, vas li glan. Oun yoy trissas oun vitsras pes glan leste tele, oun penas glan i tsele menshende, hoske yoy ap leskro ripen tapras, oun kay yoy ap yek kopo sasto vas.
48Oun o Yezous penas ap late: “Romniya, tiro patsepen kras tout sasto. Dja mo Debleha!”
49Oun har o Yezous yaake rakras, vas yek dran o kheer ko pralstunestar pral i biboldengri kangri, oun penas ap leste: “Tiri čay meras. Tou hounte mangess o rayes bouder gar.”
50Har o Yezous kova shounas, penas lo ap ko pralstuneste: “Ma traash! Tiri čay djivella. Pats man!”
51Oun o Yezous djas an ko kheer. Oun o Yohanni oun o Petro oun o Yakobo djan leha. Oun o čakro dad oun lakri day djan ninna lentsa. Oun o Yezous moukas kek vavares an kava kheer dren te djal. 52Oun halauter rovan, oun dan pengre vasta pral o shero khetne. Oun yob penas ap lende: “Ma rovenn! Yoy hi gar mouli. Yoy sovella.”
53Yon djinan, te meras li, oun san pral leste.
54Oun o Yezous tapras lakro vast, oun penas ap late: “Čay, ste pre!”
55Koy vas pale djipen an late, oun yoy stas pre. Oun yob penas, te anenn le lake čomone te rhal. 56Lakro dad oun lakri day kran bare yaka pral kova, hoy koy djas. Oun o Yezous penas lenge, te penenn le kekeske, hoy yob kras.
Currently Selected:
Louka 8: Sint-Man2024
Highlight
Share
Copy
Want to have your highlights saved across all your devices? Sign up or sign in
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
