Louka 2
2
O Yezous vella boldo
1Ap ko tsiro moukas o baro ray Augousto#2:1 Kova his o baro ray an o foro Rom, kay pral i tsele Remaryengre themma o ray his – an kol bersha 27 glan Y. K. bis 14 pal Y. K. an o foro Rom te penell: “Činenn i laba i tsele menshendar an mire themma pre!”
2Kova his o ersto kopo, kay činan le i laba i tsele menshendar an i liil dren. Oun kova his ap ko tsiro, kay o Kvirinio o pralstouno his pral o them Syria. 3Oun halauter djan an pengre forya oun gaba, kay lengre phoure boldo van, te moukenn le pengre laba pre te činell.
4-5Oun o Yosef djas peskri pirnyah, i Maria, dran o foro Nazaret, hoy an o them Galilea čiddo hi. Oun yon djan an o foro Betlehem an o them Youdea, te moukenn le kote pengre laba pre te činell. An ko foro his o baro ray David glan i rah tsiro boldo. Oun o Yosef his o Davideskre menshendar. I Maria his ap ko tsiro an vavar koova.
6Har yon an kava foro van, vas i Mariake ko tsiro, te lell li o čaves. 7Oun lat vas i čavo. Oun yoy čivas pherne troul leste, oun čivas les kote dren, kay o rhapen i firhenge dren čiddo vella. An i kerčima his lenge kek čiben.
I bakrengre
8Glan o foro Betlehem dan i bakrengre yak ap pengre bakre an koy rat. 9Ap yek kopo his glan lende o Debleskro bolepaskro#2:9 bolepaskro englo tardo. Oun o Debleskro raylepen his troul lende. Oun i bari daar vas ap lende.
10Oun o bolepaskro penas ap lende: “Ma darenn! I bari barht vell ap t'mende, oun ap i tsele menshende. 11Kava dives vas t'menge an o foro Betlehem kova boldo, kay lell t'men dran o čilačepen vin. Yob hi ko baro ray, kolestar o Devel penas, te vell yob#2:11 ap grichtikes: Kristos, ap hebretikes: Messias . 12Oun ap kova dikenn t'mer, koon o ternepen hi: Yob hi pandlo an i pherne, oun kote dren čiddo, kay o rhapen i firhenge dren čiddo vella.”
13Ap yek kopo his pash ko bolepaskro boud vavar bolepangre. Oun yon sharan o Debles, oun penan:
14“Baro hi o Debleskro raylepen an o bolepen! O Debleskri barht vell ap i phoub. Yob dikell lačes ap i menshende.”
15Oun palle djan i tsele Debleskre bolepangre pale an o bolepen.
Oun i bakrengre penan yek ap o vavareste: “Avenn, djas an o foro Betlehem, te dikas, hoy o Devel menge penas!”
16Oun i bakrengre nashan sik an o foro, oun hatsan i Mariat oun o Yosefes. Oun o ternepen his koy dren čiddo, kay o rhapen i firhenge dren čiddo vella. 17Har yon kova dikan, penan le lauterenge ko lab, hoy lenge o bolepaskro pral kava ternepen penas. 18Oun lauter kran bare yaka, har yon shounan, hoy i bakrengre lenge penan.
19I Maria rikras kol tsele laba an peskro dji oun moukas len an lakro shero trouyel te djal.
20Oun i bakrengre djan pale pash pengre bakre. Oun yon sharan o Debles o tselo djiyestar pral kova, hoy yon shounan oun dikan. Lauter kova his yaake, har o bolepaskro lenge penas.
O Yezous lella peskro lab
21Har orhta divessa trouyel his, oun o ternepen ap o mass činlo vas, dan le les o lab Yezous. Kava lab penas o bolepaskro i Mariake, har yoy gomme gar an vavar koova his.
O Yezous vell an o Debleskro baro kheer anlo
22Star-deesh divessa his i Maria pale-čiddo, yaake har o Mose kova an peskro liil činas.#2:22 dik: 3. Mose 12:1-8 Pal kova anan o Yosef oun i Maria kol ternepas an o Debleskro baro kheer an o foro Yerusalem, te denn le les an o Debleskro vast. 23An o Moseskre lila hi ninna činlo: O phoureder čavo, kay boldo vella, hi o Debleske.#2:23 dik: 2. Mose 13:1
24Oun o Yosef oun i Maria anan douy parne čirkle glan o Debleste, yaake har kova an i Moseskre lila činlo hi, te vell i djouvel pale erligo.#2:24 dik: 3. Mose 12:8
O Simeoneskri gili
25Ap ko tsiro djivas an o foro Yerusalem i morsh. Leskro lab his Simeon. Kova patsas ap o Debleste, oun djivas yaake, har o Devel kova kamas. Oun yob dikas ap ko tsiro, kay lell o Devel i bibarht i Israeleskre menshendar krik. O Simeon his pherdo Debleskro Dourho. 26Oun o Debleskro Dourho penas leske, te merell yob gar, bis te dikas lo ko baro rayes, kolestar o Devel penas, te vell yob. 27Oun ap ko dives, kay anan o Yosef oun i Maria pengro čaves, o Yezouses, an o Debleskro baro kheer, te denn le les an o Debleskro vast, har kova pal o biboldengro čačepen yaake his, koy anas o Debleskro Dourho o Simeones ninna an o Debleskro baro kheer. 28Oun o Simeon las o čaves ap i moussi, sharas o Debles, oun penas:
29“Miro Devel, miro ray, kanna nay merau me an o lačepen, yaake har tou penal.
30Me dikom koles, kay tou bičral, te lell lo i menshen dran o čilačepen vin. 31Oun tou bičral les i tsele menshenge ap i phoub. 32Yob hi har i momeli, te sikrell lo kolen tiro drom, kay prindjrenn tout gar. Koleske sharenn yon i menshen an Israel.”
33Oun o Yezouseskro dad oun leskri day kran bare yaka pral kova, hoy o Simeon pral pengro čaveste Yezous penas.
34Oun o Simeon rakras o Debleskri barht pral lende vin oun penas ap i Mariate: “Pral kava čaveste rhoyrenn pen boud menshe an o them Israel. Ap leste sikrell pes, koon djal ap o Debleskro drom, oun koon perell o Debleskro dromestar tele. 35Yaake vell diklo, hoy boud menshenge an o shero trouyel djala. Oun tire douka, Maria, pral tiro čaveste venn yaake, har te dell yek i rharo an tiro dji.”
I Hanna sharell o Debles
36An o foro Yerusalem djivas i phouri Debleskri rakepaskretsa. Yoy kharas Hanna. Lakro dad his o Penouel. Yob hi kol menshendar, kay venna pal o Asser. Efta bersha his i Hanna romedino.
37Palle meras lakro rom. Oun kanna his li orhta-deesh-te-star bersha phouro. Oun yoy his o tselo dives oun i tseli rati an o Debleskro baro kheer, te mangell li o Debles an. Oun boud kope rhas oun piyas li či o Debleske.
38Ap ko tsiro har i Maria oun o Yosef pengro čaveha an o Debleskro baro kheer his, vas li ninna kote pash lende. Oun yoy sharas o Debles o tselo djiyeha pral ko čaveste, oun rakras kolestar ap lauterende, kay dikan ap ko tsiro, kay lell o Devel i menshen an o foro Yerusalem dran o čilačepen vin.
An o foro Nazaret
39Oun har i Maria oun o Yosef lauter yaake kran, har an o Debleskro lab činlo his, djan le pale an pengro foro Nazaret, hoy an o them Galilea hi. 40Ko ternepen vas baro oun zorelo, oun pherdo gosvepen. Oun hakeno dikas, kay o Devel pash leste hi.
An o Debleskro baro kheer
41-42Hako bersh, har van kol bare divessa, kay kharenna Passa, djan i Maria oun o Yosef an o foro Yerusalem. Oun har o Yezous deesh-te-douy bersha phouro his, lan yon les peha. 43Har kol bare divessa trouyel his, oun yon pale khere djan, ačas ko čavo Yezous an o foro Yerusalem. Oun leskro dad oun leskri day djinan kova gar. 44Yon patsan, kay yob mashkral kol vavar menshende hi. Doleske rodan yon les yek dives mashkral pengre menshende, oun mashkral kol vavarende, kay his lentsa khetne ap o drom. 45Oun yon hatsan les gar. Koy djan yon pale an o foro Yerusalem, oun rodan les kote.
46Pal triin divessa hatsan le les an o Debleskro baro kheer. Oun yob his beshdo mashkral i sikepangre. Oun yob shounas, hoy yon rakran, oun yob poučas boud lendar.
47Lauter, hoy shounan, hoy yob lenge penas, kran bare yaka, yaake gosevo his kava čavo. 48Oun har leskro dad oun leskri day les kote dikan, ačas lenge o rakepen krik. Oun leskri day penas ap leste: “Čava, hoske kreh tou mentsa savo koova? Me oun tiro dad, har rodam tout, hams i daryatar moulo.”
49Koy penas lo ap lende: “Hoske rodan t'mer man? Djinenn t'mer gar, te krap me kova, hoy miro dad mandar kamella?”
50Yon hayvan gar, hoy yob lenge kamas te penell.
51Palle djas lo lentsa pale an o foro Nazaret, oun kras lauter, hoy yon penan leske. Leskri day rikras kol tsele laba, hoy o Yezous penas, an peskro dji. 52Yob vas gosveder oun phoureder. Oun o Devel oun i menshe dikan lačes ap leste.
Currently Selected:
Louka 2: Sint-Man2024
Highlight
Share
Copy
Want to have your highlights saved across all your devices? Sign up or sign in
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
