Yohanni 11
11
O Lazaro merella
1Koy his yek nasselo čiddo. Leskro lab his Lazaro. Yob his dran ko gab Betani, kay ninna i Maria oun lakri pheen Marta djivan.
2I Maria his koy djouvel, kay ko kouč djet ap o Yezouseskre pire čoras. Oun peskre ballentsa khossas yoy leskre pire. Kolakro phraal his o Lazaro. Kova his nasselo. 3Kol douy phenya bičran menshen pash o Yezouseste, te penenn le leske: “Ray, koles, kay tou kameh, hi nasselo.”
4Har o Yezous kova shounas, penas lo: “Kava nasslepen vas gar ap leste, te merell lo. Yob vas nasselo, te dikenn t'mer, havi bari zoor o Debles hi, oun te vell o Debleskro čavo sharedo.”
5O Yezous kamas i Martat oun lakri phenyat oun o Lazares o djiyestar. 6Har yob shounas, kay kova nasselo his, ačas yob douy divessa koy, kay yob his.
7Pal kova penas yob ap peskre malende: “Avenn, mer djah pale an o them Youdea!”
8Penan leskre mala ap leste: “Sikepaskro, his gar rah, koy kaman tout i bibolde moulo te dell i barrentsa. Oun pash kolende kameh tou pale te djal?”
9O Yezous penas: “An o dives hi deesh-te-douy tsirya#11:9 kate: heures . Koon ap o dives trouyel nashella, kova perell gar. Ap o dives rhačell o kham. 10An i rat rhačell o kham gar. Koon an i rat ap o drom hi, kova perella.”
11Har o Yezous lenge kova penas, penas lo: “Maro maal Lazaro sovas dren. Me djau koy, te djangrap les pre.”
12-13Kal labentsa penas o Yezous, kay o Lazaro meras. Yon hayvan kova gar. Yon patsan, kay o Yezous penas, kay yob sovella.
“Ray,” penan le ap leste, “te sovell lo, vell lo pale sasto.”
14Kanna penas o Yezous lenge an o mouy: “O Lazaro meras. 15Doleske hom barhtelo t'menge, kay me gar koy homs, te patsenn nay t'mer ap mande kanna. Avenn, mer djah kanna pash leste!”
16Penas o Thomas, koles dan le ninna Didimo gole, ap leskre malende: “Avenn, mer djah ninna leha, te meras leha!”
Koon ap mande patsella, djivella
17Har o Yezous an o gab Betani vas, shounas lo, kay o Lazaro star divessa paskedo his. 18O gab Betani his gar dour o forestar Yerusalem, nay vell triin kilometarya. 19Oun boud bibolde his pash i Marta oun pash i Maria, te rakrenn le lentsa, te hi i douk gar yaake baro pral lengro phraleskro merepen. 20Har i Marta shounas, kay o Yezous vella, djas yoy pash leste. I Maria ačas khere.
21“Ray,” penas i Marta ap o Yezouseste, “te vals tou kay, merals miro phraal gar. 22Me djinau ninna, hoy tou o Deblestar mangeh, dell yob tout.”
23Penas o Yezous ap late: “Tiro phraal stella pale i moulendar pre.”
24“Me djinau,” penas li, “kay yob i moulendar pre stella ap ko palstouno dives, kay hake moule pre stenna.”
25Penas o Yezous ap late: “Me hom kova, kay djangrau len pre dran o merepen oun dau len o djipen. Koon ap mande patsella, djivella, ninna te merell yob. 26Koon djivella oun patsell ap mande, kova merell bouder gar. Patseh tou kova?”
27“Ava, ray,” penas li, “me patsau, kay tou hal o Kristo, o Debleskro čavo, kay vas ap kay phoub.”
28Oun har yoy kova penas, djas yoy pash peskri phenyate oun penas čorrhanes ap late: “O sikepaskro hi koy oun dell tout gole.”
29Har i Maria kova shounas, stas yoy sik pre oun vas pash leste. 30O Yezous his gomme glan o gab, kay i Marta les tapras.
31Kol bibolde, kay pash i Mariate an o kheer his, te rakrenn le lačes lah, dikan, har yoy sik pre stas oun vin nashas. Koy djan le lake palla. Yon patsan, yoy djal pash o moulengro kheer, te rovell li koy.
32Har i Maria koy vas, kay o Yezous hi, čivras pes li glan leste tele oun penas: “Ray, te vals tou koy, merals miro phraal gar.”
33Har o Yezous dikas, kay yoy rovella oun kol bibolde ninna, kay lah van, djas kova leske phares an o dji. Oun leskro dji rovas.
34Oun yob penas ap lende: “Kay hi yob čiddo?”
Yon penan ap leste: “Ray, am oun dik!”
35Oun o Yezous rovas.
36“Dikenn,” penan i bibolde, “yob hounte kamas les o djiyestar!”
O Yezous djangrell o Lazares dran o merepen pre
37Mashkral lende his menshe, kay penan: “Yob kras ko morshes, kay dikas nay gar, sasto. Yob nay krals ninna, te merals o Lazaro gar.”
38Kova djas o Yezouseske pale phares an o dji.
Oun yob vas pash ko moulengro kheer, kay o Lazaro paskedo his. Glan ko moulengro kheer his i bar čiddo.
39“Lenn ko bar krik!” penas o Yezous.
I Marta, koy pheen kolestar, kay meras, penas: “Ray, yob khandella. Star divessa hi lo moulo.”
40Penas o Yezous ap late: “Penom me touke gar: Te patseh tou, dikeh tou o Debleskri bari zoor?”
41Koy čivan le ko bar ap i rig.
Oun o Yezous dikas pre, oun penas: “Tata, me parkrau man, kay shounal man. 42Me djinau, kay tou man hako tsiro shouneh. Me penau kava kol boud menshenge, kay hi kay tardo, te dikenn le oun te patsenn le, kay tou man bičral.”
43Har yob kova penas, das lo zoreles gole: “Lazaro, am vin!”
44Oun kova, kay meras, vas vin. Troul leskre herya oun vasta his layntikre kotya pandlo. Ninna troul leskro mouy his i diklo pandlo.
Penas o Yezous ap lende: “Lenn kol kotya lestar lauter tele, oun moukenn les te djal!”
45Boud kol biboldendar, kay pash i Mariate van, dikan kova, hoy o Yezous kote kras, oun yon patsan ap leste.
I menshe kamenn o Yezouses te marell
46Mashkral lende his menshe, kay djan pash kol Farisarya, oun penan lenge, hoy o Yezous kras. 47Doleske van kol bare rashaya oun kol Farisarya i pralstoune biboldentsa khetne, oun penan: “Hoy kras mer? Yob krell boud baro oun zorelo koova, hoy kek vavar nay krell. 48Te moukah les mer yaake doureder te krell, patsell hakeno ap leste. Oun kol Remarya venna oun lenn menge o tselo them oun i menshen mendar krik.”
49Yek lendar his o Kayafas. Kova his an ko bersh o baro rashay. Yob penas: “T'mer djinenna či. 50T'mer hayvenna gar, kay feteder hi, te merell yek morsh i menshenge, har te djan i tsele menshe nashedo.”
51O Kayafas penas kova gar dran peste. An ko bersh his lo o baro rashay, oun yob penas glan-vi, kay o Yezous hounte merell i biboldenge, 52oun gar i biboldenge kokres. Yob hounte merella ninna, te anell lo i tsele Debleskre čaven khetne.
53Kova his ko dives, kay van le o ersto kopo khetne, te rodenn le i drom, har nay marenn yon les. 54Doleske moukas pes o Yezous bouder gar te dikell pash i biboldende. Yob djas an ko foro, kay kharas Efrayim. Kova his pash o moulo them. Koy ačas yob peskre malentsa.
55His i tikno tsiro glan kol bare biboldengre divessa, kay kharenna Passa. Dran ko tselo them van i menshe an o foro Yerusalem, te thovenn pen le an o pani glan o Passa, yaake har i biboldengro koova hi. 56Yon halauter kaman o Yezouses te dikell, oun rodan les. Har yon an o Debleskro baro kheer khetne his, poučas yek o vavarestar: “Hoy peneh tou? Vell yob ap o festo Passa?”
57Kol bare rashaya oun kol Farisarya penan, te djinell yek, kay yob hi, hounte penell yob les, te taprenn yon les nay.
Currently Selected:
Yohanni 11: Sint-Man2024
Highlight
Share
Copy
Want to have your highlights saved across all your devices? Sign up or sign in
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
