Yohanni 10
10
O Yezous hi o lačo bakrengro
1“Čačepah, me penau t'menge: Koon gar an o voudar dren djala, te vell lo pash i bakrende, oun vell vavarčandes dren, kova hi i čorepaskro oun i dre-phagepaskro. 2O bakrengro djal an o voudar dren, te vell lo pash lende. 3Leske krell kova o voudar pre, kay dell garda glan o voudar. Oun leskre bakre shounenn leskro rakepen. Oun yob dell peskre bakren gole lengre labentsa, oun anell len vin. 4Te hi leskre tsele bakre vin, djal yob glan lende. Oun i bakre djan leske palla. Yon prindjrenn leskro rakepen. 5Yekes, kay prindjrenn yon gar, koleske djan yon gar palla. Yon nashenn penge lestar. Yon prindjrenn gar leskro rakepen.”
6Kal laba penas o Yezous lenge. Yon hayvan gar, hoy yob kamas lenge te penell.
7Doleske penas o Yezous pale ap lende: “Čačepah, me penau t'menge: Me hom o voudar i bakrenge. 8Lauter kolla, kay van glan mande, hi čorepangre oun dre-phagepangre. Doleske shounan kol bakre gar ap lende. 9Me hom ko voudar. Te djal yek an kava voudar dren, kova djal gar nashedo. Yob djal dren oun vin, oun yob hatsell shoukar zenlepen rhapaske. 10Ko čorepaskro vella, te čorell lo kol bakren, te marell lo len, oun te rhal lo len. Me vom, te dap len o djipen, boudeder har doha. 11Me hom o lačo bakrengro. O lačo bakrengro moukell peskro djipen i bakrenge.
12Yek, kay lell love, te dell lo garda ap i bakrende, hi kek bakrengro. Kol bakre hi gar leskre. Te dikell kova, kay i divyo djouklo vella, nashell lo peske, oun moukell kol bakren kokres. Oun o divyo djouklo perell pral kol bakrende, oun tradell len yaake, kay yon bouder gar khetne hi. 13Ko morsheske hi kova yek, hoy dran kol bakrende vella.
14Me hom o lačo bakrengro oun prindjrau, koon mire bakre hi. Yon prindjrenn man, 15yaake har o dad man prindjrella, oun me o dades prindjrau. Oun me dau miro djipen i bakrenge.
16Man hi ninna vavar bakre. Kolla hi kate gar khere. Kolen anap halauter kate. Yon shounenn ap miro rakepen, oun me anau len khetne i vavarentsa. Oun len hi yek bakrengro. 17Me dau miro djipen, te lap les neves pale. Doleske kamell man miro dad. 18Kek lell miro djipen mandar. Dran mande vell kova, kay dau miro djipen. Kova hi an miro vast, te dap miro djipen. Oun kova hi an miro vast, te lap les pale. Yaake krau, hoy miro dad mange penas.”
19Har o Yezous kova penas, čingran pen kol bibolde pale pral kol laba.
20Boud lendar penan: “I beng hi an leste oun yob hi dinelo. Ma shounenn ap leste!”
21Vavar penan: “Te vals i beng an leste, nay rakrals yob gar yaake. Nay krell i beng yekeske, kay dikell nay gar, i yaka sasto?”
Me oun o dad ham yek
22His vend. Oun i bibolde an o foro Yerusalem kran i baro rhapen, te bistrenn le gar ko dives, har o Debleskro baro kheer neves kerdo vas. 23O Yezous his an o Debleskro baro kheer, oun djas an koy isema trouyel, hoy kharella Salomeskri isema. 24Koy van i pralstoune bibolde troul leste oun penan: “Har rah kameh tou menge gar te penell, koon tou hal? Tou te hal ko baro ray, kolestar o Devel penas, te vell yob, yaake pen menge kova an o mouy!”
25Penas o Yezous ap lende: “Koon me hom, penom t'menge. T'mer patsenn man gar. Halauter, hoy me krau an miro dadeskro lab, kova hounte sikrell t'mende, koon me hom. 26T'mer han gar mire bakre. Doleske patsenn t'mer man gar. 27Mire bakre shounenn ap miro rakepen. Oun me prindjrau len. Oun yon djan mange palla.
28Oun me dau len ko djipen, hoy gar pre-herella. Oun yon djan gar nashedo. Oun kek nay tserdell len dran miro vast vin. 29Miro dad, kay das len mande, hi bareder har halauter. Oun kek nay tserdell len dran miro dadeskro vast vin. 30Me oun o dad ham yek.”
31Koy hadan kol bibolde pale barra pre, te denn le les kol barrentsa moulo.
32O Yezous penas lenge: “Me krom boud lačo koova. Miro dad penas mange, te krap kova. Hoy hi ko lačo koova, koleske kamenn man moulo te dell?”
33Penan kol bibolde ap leste: “Ko lačo koova, hoy tou kral, koleske kamah mer tout gar moulo te dell. Tou anal ladj ap o Debleste. Tou hal i mensho oun kreh, har te vals o Devel. Doleske kamah tout te marell.”
34Penas o Yezous: “An o Debleskro lab, ap koleste t'men rikrenna, kote hi činlo: Me, o Devel penom: T'mer han debla#10:34a debla dieux .#10:34b dik: Debleskri gili 82:6 35Kolentsa, kay o Devel rakras, ap kolende penas yob debla. Oun kova, hoy an o Debleskro lab činlo hi, nay vell gar krik lino. 36Man hi o dadeskro vast. Oun miro dad bičras man ap kay phoub. Me te penau, kay hom o Debleskro čavo, har nay penenna t'mer ap mande: Tou kreh, har te vess o Devel? 37Te krau me gar, hoy o dad mange penas, hounte patsenn t'mer man gar. 38Te krau me, hoy o dad mange penas, patsenn ap kova, hoy me krau! Yaake dikenn oun prindjrenn t'mer, kay o dad an mande hi oun me an leste.”
39Koy kaman yon les pale te taprell. Yob khatras pes lendar. 40Oun yob djas pale ap i vavar rig o panyestar Yordan oun ačas kote, kay o Yohanni i menshen taufras. 41Koy van boud menshe pash leste oun penan: “O Yohanni kras kekes sasto. Halauter, hoy yob pral kava morsheste penas, hi čačo.”
42Oun kote patsan boud ap o Yezouseste.
Currently Selected:
Yohanni 10: Sint-Man2024
Highlight
Share
Copy
Want to have your highlights saved across all your devices? Sign up or sign in
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
