1. Mose 23
23
I Sara merell oun vell paskedo
1Oun i Sara vas 127 (sheel-biish-te-efta) bersh phouro. 2Oun yoy meras an o foro Kiryat-Arba. Kova hi kanna Hebron an o them Kanaan. Oun o Abraham vas pash late, rovas oun das i djiyestar gole pral lakro merepen. 3Pal kova stas o Abraham peskri mouli romyatar pre, oun djas pash i Hetarya, te rakrell lo lentsa. 4Oun yob penas ap lende: “Me hom mank t'mende i vi-themari. Man hi kek kotar them pash t'mende. Kanna mangau t'men: Denn man i kotar them pash t'mende, te paskrap miri mouli romyat.”
5I Hetarya penan ap o Abrahameste: 6“Shoun ap mende, maro ray: Tou hal i Debleskro morsh mashkral mende. Paske tiri mouli romyat an o feteder moulengro kheer, hoy men hi. Hakeno mendar dals tout i kotar them, te paskress tiri romyat koy.”
7Koy stas o Abraham pre oun parkras pes pash lende. 8Oun yob penas ap lende: “Te kamenn t'mer, te paskrap miri mouli romyat kay, palle mangau t'men: Rakrenn o morsheha Efron, – leskro dad hi o Sohar – 9oun mangenn les, te dell lo man leskri grotta, hoy kharella Makpela. Koy grotta hi ap i palstouni rig ap leskro kotar them čiddo. Me kamau te playsrell, hoy koy grotta moldo hi, te lap i moulengro kheer pash t'mende.”
10O Hetari Efron his mank peskre menshende beshdo. Oun yob penas ap o Abrahameste glan kolende, kay pashel his, glan hakeneste, kay an o baro voudar o forestar his: 11“Na-a, miro ray, shoun, hoy me penau: Tou hounte playsress mange či. Me dau tout ko kotar them oun koy grotta. Glan mire menshende dau tout kova, te paskress tiri mouli romyat.”
12Koy parkras pes o Abraham pash kol menshende, 13oun penas ap o Efron glan lauterende: “Mangau tout, te shouness ap mande: Me playsrau, hoy ko kotar them moldo hi. Le mandar kal love! Yaake nashte paskrau miri mouli romyat.”
14Penas o Efron ap o Abrahameste: 15“Miro ray, shoun ap mande! Hoy hi i kotar them mange oun touke, hoy molella star-sheel roupene beme? Kova hi či! Paske tiri romyat kote!”
16Oun o Abraham das o Efrones kol love, hoy yon glan i Hetarya vin kran: star-sheel roupene beme. Yek bema his yaake pharo har yek bema pash i parepangre pharo his. 17Yaake las o Abraham o Efroneskro kotar them, kay pash Makpela glan Mamre čiddo hi: ko kotar them oun koy grotta oun kol rouka, kay kote tardo his. 18Oun kol Hetarya, kay an o voudar o forestar his, his pashel, har o Abraham lauter ginas.
19Pal kova paskras o Abraham peskri romyat, i Sara, an koy grotta pash Makpela vergel Mamre. Kova hi kanna o foro Hebron an o them Kanaan. 20Yaake bikran i Hetarya ko kotar them oun koy grotta o Abrahameske, te vell kote i moulengro kheer peskri familyake.
Currently Selected:
1. Mose 23: Sint-Man2024
Highlight
Share
Copy
Want to have your highlights saved across all your devices? Sign up or sign in
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
