1. Mose 14
14
O baro kourepen
1An ko tsiro his i kourepen. Star bare raya kouran pen panč foryengre rayentsa. Kolla bare raya his:
o Amrafel, ko baro ray pral o them Shinar,
o Aryok, ko baro ray pral o them Ellasar,
o Kedor-Laomer, ko baro ray pral o them Elam,
o Tidal, ko baro ray pral o them Goyim.
2Kol panč foryengre raya his:
o Bera, ko ray pral o foro Sodom,
o Birsha, ko ray pral o foro Gomorra,
o Shinab, ko ray pral o foro Adma,
o Shemeber, ko ray pral o foro Seboyim,
o ray pral o foro Bela. Kova hi kanna o foro Soar.
3Kol panč raya kran vin, te rikrenn yon khetne oun van an i tala Siddim. Kova hi kanna o Londo Baro Pani.
Hoske vas ko baro kourepen?
4Deesh-te-douy bersha his o Kedor-Laomer o baro ray pral kol panč foryengre rayende. Oun yon boudran leske. An o deesh-te-triinto bersh hadan pen le pral leste oun shounan bouder gar ap leste. 5An o deesh-te-starto bersh vas o baro ray Kedor-Laomer oun kol vavar bare raya, kay leha khetne his. Oun yon kouran pen:
kol menshentsa an o foro Asterot-Karnayim – kolla his i Refayarya;
kol menshentsa an o foro Ham, – kolla his i Zouzarya;
kol menshentsa, kay djivenna an o them, kay o foro Kiryatayim tardo hi, – kolla his i Emarya;
6kol menshentsa ap i berge Seir, – kolla his i Horarya.
Oun yon dan len bis El-Paran, hoy pash o moulo tato them čiddo hi. 7Koy pal rissran pen kol star bare raya trouyel oun van an ko foro En-Mishpat. Kova hi kanna Kadesh. Oun yon maran i tsele menshen an ko them, kay i Amalekarya djivan, ninna i Amorarya, kay an Hazezon-Tamar djivan.
Kol star bare raya hi zorleder har kol panč foryengre raya
8Kanna djan kol panč raya pral i forya Sodom, Gomorra, Adma, Seboyim oun Bela dran i forya vin. Bela kharella kanna Soar. Oun yon djan pengre lourdentsa an i tala Siddim. 9Kote kouran pen le kol star bare rayentsa. Kolla his:
o baro ray Kedor-Laomer pral o them Elam,
o baro ray Tidal pral o them Goyim,
o baro ray Amrafel pral o them Shinar,
o baro ray Aryok pral o them Ellasar.
10An i tala Siddim his boud rhebya an i phoub, kay pherdo teera his. I raya pral i forya Sodom oun Gomorra pengre lourdentsa hounte nashan penge. Oun boud peran an kol rhebya. Oun kol vavar, kay pral ačan, nashan an i berge. 11Oun kol star bare raya lan lauter peha, hoy yon an i forya Sodom oun Gomorra hatsan. Yon lan ninna o tselo rhapen dran kol forya oun djan penge. 12O Abrameskro phraleskro čavo Lot, kay djivas an Sodom, koles lan yon ninna peha, oun leskro tselo koova, hoy les his.
O Abram anell o Lotes, kay krik anlo vas, pale pale
13Oun yek kolendar, kay peske nashas, vas pash o Abrameste oun penas leske halauter. O Abram his i Hebreari. An ko tsiro djivas o Abram pash i bare rouka ko morshestar Mamre. Kova his i Amorari. Leskre phrala his o Eshkol oun o Aner. Kolla triin kran o Abrameha vin, te rikrenn yon khetne, oun dan pengro dadeskro vast koy pre.
14Har o Abram shounas, kay leskro phraleskro čavo pandlo oun krik anlo vas, kharas yob peskre morshen. Les his 318 (triin-sheel-deesh-te-orhta) čače morsha, kay pash leste boldo van. Kolentsa tradas yob i star bare rayen oun lengre lourden bis pash ko foro Dan. 15An i rati bičras yob peskre morshen ap douy rigya. Oun yob oun leskre morsha djan ap lende pre oun dan len, oun lan len palla bis pash ko foro Hoba, hoy ap i servi rig o forestar Damaskus čiddo hi.
16Oun o Abram anas kova pale, hoy čoredo vas, ninna peskro phraleskro čaves, o Lot. Oun leskro koova anas yob pale, ninna i tsele djouvyen oun i tsele menshen.
17Yaake das o Abram o baro rayes Kedor-Laomer oun kol bare rayen, kay pash leste his. Koy pal djas o Abram khere. Ap o drom khere an i tala Shave vas o ray pral o foro Sodom pash leste. Koy tala kharella ninna Rayeskri tala.
O Melkisedek sharell o Abrames
18Oun o Melkisedek, ko ray pral o foro Salem, anas lenge maro oun mool dran o foro. Yob his i rashay ko Deblestar, kay hi o Devel pral halauter. 19Oun yob sharas o Abrames oun penas: “Tou, Abram, ap toute hi čiddo i zoor oun i barht ko Deblestar, kay hi o Devel pral halauter oun kras o bolepen oun i phoub. 20Oun sharedo vell o Devel pral halauter, kay das kolen an tire vasta, kay touha kouran pen.”
Oun o Abram das les o deshto kotar halauterestar, hoy yob pale anas.
21Oun o ray pral Sodom penas ap o Abram: “De man mire menshen pale! Ko vavar, hoy hatsal, rikreh nashte.”
22Koy penas o Abram ap leste: “Me dau man sovel glan o baro Debleste, kay hi o Devel pral halauter, oun kras o bolepen oun i phoub: 23Kek kotar thab, vitar kek dori, hoy i kirrha khetne pandella, lau toutar. Te peness tou gar, tou kral man bravelo. 24Me rikrau či, kokres kova, hoy i morsha rhan. Oun kol morsha, kay mantsa djan, o Aner, o Eshkol oun o Mamre, kolla lenn pengro kotar peha.”
Currently Selected:
1. Mose 14: Sint-Man2024
Highlight
Share
Copy
Want to have your highlights saved across all your devices? Sign up or sign in
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
