Mateo 9

O Jesus sastarel iekke manuse kai nasti ppirela

(Mk 2.1-12; Lk 5.17-26)

1Mapalal o Jesus likisto ande llimia, nakklo pe o goia rig katar e mora ta avilo kai po foro. 2Kote inllarde lete iekke llene kai nasti ppirela inzardo ande iek postelia; kana dikkla o Jesus lengo pachape, ppenda e bangeke:

—Chaurrea, cher chuke zor; cho bilachipe si prostime.

3Ondaka nesave kovacha e zakonoke mislisaile gia: “Gava lleno kusel e Devle gole alavenchar.” 4A o Jesus llangla so mislina, ta puchla len: —¿Soke mislin tumen gia?

—¿Soke mislin tumen gia baro bilachipe ande tumaro lio? 5¿So si mai lesno, te ppendol: ‘Cho bilachipe si prostime’, o te ppendol: ‘Uste ta ppir’? 6Goleke ka sikavau tumenge kai o Chavo e manuseko si le e zor pe ppuv te prostil o bilachipe. Ondaka ppenda e bangeke:

—Uste, le chi postelia ta llatar ande cho cher.

7Ta o lleno kai nasti ppirela ustilo ta llelotar kai po cher. 8O sueto chudisailo kana dikkla goia ezgoda ta blagosina e Devle kai diaia gia bari zor e manusen.

O Jesus ikkarel e Mateo

(Mk 2.13-17; Lk 5.27-32)

9Kana o Jesus llelotar kotar, dikkla iekke llene kai ikkardola Mateo kai besela po stali, kote kai pochindol e love e ppuviake ta o Jesus ppenda leke:

—Aide pala ma.

Ondaka o Mateo ustilo ta llelo pala le.

10Iek llive kai o Jesus saia besindo pe sinia ando cher, ta but publikanura ta bilache llene kai avilea, i von besle pe sinia e Jesusea ta leke disipulonenchar. 11Kana dikkle gava e fariseura, puchle e disipulonen:

—¿Soke tumaro kovachi jal e publikanonenchar ta i e bilache llenenchar?

12Kana o Jesus asunda gaia orba, ppenda lenge:

—E saste ni trubul len doktori samo e nasualen. 13Llan tumen ta sikon so si gala alava: “zalba mangau a na kurbanura,”#Os 6.6; Mt 5.23-24. soke ni avilem te ikkarau lachen, avilem te ikkarau e bilachen te sai aven keime.

Puchen katar o alluno

(Mk 2.18-22; Lk 5.33-39)

14Ondaka avile kai o Jesus e disipulura katar o Juan kai kristila ta puchle le:

—¿Soke amen ta i e fariseura alluni a che disipulura ni cherenle?

15O Jesus ppenda lenge:

—¿Sai aven zalosne e llene kai si ikkarde pe iek biau kana o chavo kai zinilpe si lenchar? A ka avel o llive kana ka len lendar gole kai zinilpe, ondaka von ka allunin.

16“Niko ni ttovel iek kotor chiti nevo pe iek fistano purano, soke o kotor o nevo chikniol ta chirdel, ta cherel te chindol ios mai but o chiti o purano. 17Ta ni ttodol e mol nevi ande morcha purane, soke e morcha pparron ta gia e mol ta e morcha jasaon; Goleke si te ttodol e mol e nevi ande morcha neve.” Ta gia e dui ezgode te achen pe iek ttan.

E chorri e Jairoki ta e diskinia kai peravela rat

(Mk 5.21-43; Lk 8.40-56)

18Kana o Jesus ppenela lenge gala orbe, avilo lete iek lleno katar gazda e judionenge ta dia changa angla le, ta ppenda leke:

—Mi chorri muli; akana aide ta ttou cho va pe la ta ka zivil.

19O Jesus ustilo ta llelo pala le pe disipulonenchar. 20Ta kana vou llala, iek diskinia nasuali kai peravela rat cherela desudui burs, avili palal pala o Jesus ta dodisarda leko gertachi. 21Soke ppenela voi peke: Samo te dodiu leko gertachi ka sastivau. 22Ondaka o Jesus boldinailo ta dikkla pe late, ta ppenda lake:

—Cher chuke zor chorrie, cho pachape sastarda tut.

Ta e diskinia sastili isto ande gua saiato.

23Kana o Jesus dia ando cher katar o gazda e judionengo, ta kana dikkla golen kai basalena e taturuge ta o sueto kai urkila ta rovena. 24Ppenda lenge:

—Len tumen katar soke e minoni inai muli, voi sovel.

A von marena letar espurnia. 25A kana tradie e sueto avri, dia andre ta lia e minona e vastetar ta voi ustili. 26Ta lleli gaia viasta pe sa goia ppuv.

O Jesus sastarel duie korren

27Kana o Jesus likisto kotar llele pala le dui korre kai urkina ta ppenena leke:

—¡Te avel chuke zalba amendar Chavo e Davideko!

28Kana avilo kai o cher avile pasa le e korre, ta o Jesus pucha len:

—¿Tumen pachan kai sai cherau gaia ezgoda?

—Von ppende leke: Ea Gazda.

29Ondaka dodisarda lenge akka ta ppenda:

—Gia sar si tumaro pachape, gia te cherdol tumenge.

30Ta e korre dikkle. A o Jesus ppenda lenge te na llanel le niko. 31A von kana likiste kotar ppende saurrenge sa e bare ezgode kai o Jesus cherela.

Iek nemao del orba

32Kana von llanatar, ande kai o Jesus iekke nemave kai saia o llavolo ande lete. 33Kana tradia e llavolo letar, o nemao dia orba, a o sueto chudilape ta ppenela:

—¡Nikada ni dikklam iek ezgoda sargo gaia ando Israel! 34A e fariseura ppenena:

—Isto o gazda e llavolonengo diale e zor te chudel avri e llavolonen.#Mt 12.24; Mk 3.22; Lk 11.15.

O Jesus avila leke zao katar o sueto

35O Jesus ppirela sa e forura ta i e forichura minone, ta sikavela ande lenge kkanllira e judionenge, ta dela orba katar e lachi viasta e charoinaki ta sastarela suako nasualipe ta suako duk e foroki. 36Kana dikkla kai sea but llene avila leke zao lendar, soke ni saia len niko ta sea rispime sargo e bakre kai inai len chobano.#cf. Jer 50.6-7; Ez 34.5; Mk 6.34. 37Ondaka ppenda pe disipulonenge:

—Chachimaia o lliu si but a cherricha e manusa kai radin.#Lk 10.2; Jn 4.35. 38Goleke molintumen e Gazdake te bichalel llenen kai radin te chiden o lliu.

Currently Selected:

Mateo 9: ROM07

Highlight

Copy