Phŭn Blŭng 35

Yakô̆p wŏt glaĭ pơ Ƀêt-el

1Ơi Adai pơhiăp hr̂ŏm Yakô̆p: «Gŭ wŏ! Br̂ơi ih đĭ nao pơ Ƀêt-el, jr̂ŏng nŭn dŏ pơ anŭn ho. Br̂ơi ih ngă pr̂a ngă yang Ơi Adai, pô pơƀôh br̂ơi ih ƀôh, pah ih đuĕ dŏp mơ̆ng Êsao yŏng ih.»#An Phŭn 28:11-17. 2Nŭn Yakô̆p r̂ă br̂ơi môt khŭl-khap sang-nŏ ñu, dăp bih môt dŏ hr̂ŏm ñu: «Tăm môt gô-ih br̂ơi klaih lôi wŏ bih yang pơkŏn, jr̂ŏng nŭn ngă br̂ơi pô gô-ih lơgoh,#35:2 Mơ̆ng đim jơ̆ laĭ môt sô̆n-sat Israel čiăng ngă yang Ơi Adai, gơñu ngă br̂ơi pô gơñu lơgoh hlâo ƀơĭ. Klơi ngă br̂ơi pô lơgoh nŭn hmâo buă pơkŏn-pơkŏn hla ti nơi dăp boh khô ao. An Yap 19:19. dăp pleh khô ao gô-ih mơ̆n. 3Nah ta gŭ đĭ nao pơ Ƀêt-el, kâo ti ngă pr̂a ngă yang Ơi Adai pơ anŭn, yua ñu dŏng kâo mơ̆ng r̂ơi kâo hmâo klơi kơnap-tap, dăp dŏ hr̂ŏm kâo mơ̆ng tơgr̂ư̆ glan kâo bat mơ̆n.» 4Nĭng nŭn yơh, gơñu tô̆ bih hup yang pơkŏn gơñu hmâo mơ̆ng ngan gơñu, dăp toh lôi kơčon#35:4 Kơčon gơñu čô̆t nŭn djơ̆ klơi gơñu ngư̆ yang set, yua nŭn yơh Yakô̆p mơ̆ng pơđơi gơñu toh lôi mop br̂ơi ñu. mơ̆ng amăng ngai gơñu, ba nao mop br̂ơi Yakô̆p, jr̂ŏng nŭn Yakô̆p nao dŏl lôi gah yô̆ phŭn kơyâo dŭt dŏ jĕ plơi Sigem.

5Pah gơñu gŭ bat nao, Ơi Adai ngă br̂ơi plơi dŏ jŭm dăl gơñu huĭ kơtang, nŭn nă plơi lan dŏ jŭm dăl gơñu bĭ khĭn čiă tui bơblah nă čo Yakô̆p ôh. 6Jr̂ŏng nŭn Yakô̆p dăp bih mơnuih dŏ hr̂ŏm ñu tơl nao pơ plơi Luih (plơi ne hmâo ƀŏ dua, a iâo ha tô̆ dŏng plơi Ƀêt-el), plơi ne dŏ tăm lŏn-ia Kanan. 7Jr̂ŏng nŭn Yakô̆p ngă pr̂a ngă yang ti ha anŭn, jr̂ŏng nŭn ñu iâo ƀon nŭn “El-ƀêt-el” (čiăng laĭ “Ơi Adai dŏ mơ̆ng Ƀêt-el”), yua pơ anŭn Ơi Adai pơƀôh br̂ơi ñu ƀôh, pah ñu đuĕ dŏp mơ̆ng yŏng ñu. 8Pah anŭn Đêƀôra pô pơmĕm Rêƀêka,#35:8 Đêƀôra nŭn đahmơi hlŭn, ñu pơmĕm Rêƀêka dăp r̂ăk-r̂em pah Rêƀêka dŏ anĕt. Tơl Rêƀêka biă đuĕ mơ̆ng plơi mĭ ma ñu, nao dŏ Isă mơ̆ng lŏn-ia Kanan, nŭn Đêƀôra nao hr̂ŏm ñu mơ̆n. An Phŭn 24:59. ñu djai, jr̂ŏng nŭn r̂ăng dŏl lôi ñu gah yô̆ phŭn kơyâo dŭt jĕ plơi Ƀêt-el. Nĭng nŭn yơh r̂ăng iâo ƀon nŭn “Alô̆n-ƀakut” (čiăng laĭ “Phŭn kơyâo a čŏk hia”).

9Tơl Yakô̆p wŏt glaĭ mơ̆ng ƀon Pađăn-ơram, nŭn Ơi Adai pơƀôh br̂ơi Yakô̆p ƀôh ñu ha wŏt dŏng, jr̂ŏng nŭn Ơi Adai pha br̂ơi ñu klơi nŭk-nua. 10Ơi Adai pơhiăp hr̂ŏm Yakô̆p: «Ƀŏ ih “Yakô̆p.” Nêne r̂ăng bĭ iâo ƀŏ ih “Yakô̆p” dŏng tah, ƀŏ ih a ti iâo kr̂a “Israel” dŏng.» Nĭng nŭn yơh Ơi Adai iâo ƀŏ ñu “Israel.”#An Phŭn 32:28. 11Nŭn Ơi Adai pơhiăp hr̂ŏm ñu: «Kâo Ơi Adai Yang Kơtang Hloh, br̂ơi ih pơpôn r̂ai nă čo lal đĭ lô. Nă čo ih ti jr̂ŏng sô̆n-sat ha tô̆, wŏt gơñu ti jr̂ŏng sô̆n-sat lô-lĭn dŏng mơ̆n. Nă čo ih ti pơpôn r̂ai môt pơtao mơ̆n. 12Lŏn-ia kâo pha br̂ơi Abrahăm dăp Isă, nŭn kâo ti pha br̂ơi ih, jr̂ŏng nŭn kâo ti pha br̂ơi lŏn-ia nŭn pơ djuoi ih dơdơi kơñ he mơ̆n.»#An Phŭn 17:4-8. 13Jr̂ŏng nŭn Ơi Adai biă đuĕ mơ̆ng ƀon ñu pơhiăp hr̂ŏm Yakô̆p. 14Nŭn Yakô̆p tô̆ bohtâo ha boh bơdŏng đĭ, tŏng ƀon Ơi Adai pơhiăp hr̂ŏm ñu, jr̂ŏng nŭn ñu ling ia pai boh ƀâo gah ngŏ bohtâo nŭn pơyŏl đĭ Ơi Adai, jr̂ŏng nŭn ñu mă ia muă boh ôliw ling gah ngŏ bohtâo nŭn mơ̆n.#An Phŭn 28:18-19. 15Nĭng nŭn yơh Yakô̆p iâo ƀon Ơi Adai pơhiăp hr̂ŏm ñu, “Ƀêt-el” (čiăng laĭ “Sang Yang Ơi Adai”).

Klơi a pơpôn Ƀênyamin dăp klơi Račel djai

16Jr̂ŏng nŭn gơñu bat biă đuĕ mơ̆ng Ƀêt-el. Pah gơñu bat nao ka tơl pơ plơi Êbrata ôh, dŏ taih mơ̆ng anŭn, pah anŭn Račel wă čian ti đih phui, nŭn ñu đih phui r̂ai kơnap-tap jat. 17Pah ñu dŏ đih phui kơnap-tap nŭn, yă ƀoi r̂ă br̂ơi ñu: «Anăm huĭ ôh, yua ih hmâo nă đahkơi ha r̂ăng dŏng.» 18Pah ñu ti lŭč pr̂an jiăm ti djai, ñu iâo ƀŏ nă nŭn “Ƀên-ôni,”#35:18 Ƀŏ Ƀên-ôni tui tam Hêbrơ čiăng laĭ «Nă đahkơi biă mơ̆ng klơi kâo kơnap-tap.» plai ma ñu dŏng iâo ƀŏ ñu “Ƀênyamin.”#35:18 Ƀŏ Ƀênyamin tui tam Hêbrơ čiăng laĭ «Nă đahkơi dŏ gah nuă kâo.» 19Račel djai hĕ, jr̂ŏng nŭn r̂ăng dŏl lôi ñu wang glan a nao pơ plơi Êbrata (plơi Êbrata a iâo ha tô̆ dŏng plơi Ƀêthlêhĕm). 20Jr̂ŏng nŭn Yakô̆p bơdŏng đĭ bohtâo ha boh ngŏ ƀon a dŏl lôi Račel. Bohtâo ñu bơdŏng đĭ mơ̆ng ƀon a dŏl Račel ne dŏ hmâo khă tơl r̂ĭm r̂ơi ne. 21Nŭn Israel bat nao dŏng, jr̂ŏng nŭn bơdŏng sang seng tŏng gah dih Sang Gak Glong Răng Krăp Ep Phung Triw.#35:21 Sang Gak Glong Răng Krăp Ep Phung Triw lơ «Sang gak glong êđơ.»

22Pah Israel dŏ mơ̆ng ƀon nŭn, Ruƀên nao đih hr̂ŏm Ƀilha bơnai ma ñu, Ƀilha nŭn bơnai bĭ tĭm sĭt.#An Phŭn 29:29; 49:4. Jr̂ŏng nŭn Israel thâo kr̂ăn klơi nŭn.

Yakô̆p hmâo nă đahkơi pluh dua r̂ăng.

23Nă đahkơi Lêa: Hmâo Ruƀên (ñu nŭn nă phŭn Yakô̆p), Simien, Lêwi, Yuđa, Isakha, dăp Săpyulôn. 24Nă đahkơi Račel: Hmâo Yôsep dua ñu Ƀênyamin. 25Nă đahkơi Ƀilha, đahmơi hlŭn Račel: Hmâo Đăn dua ñu Nepthali. 26Nă đahkơi Silpha, đahmơi hlŭn Lêa: Hmâo Kat dua ñu Êsơ.

Nŭn yơh nă đahkơi a pơpôn br̂ơi Yakô̆p mơ̆ng ƀon Pađăn-ơram.

Isă djai

27Jr̂ŏng nŭn Yakô̆p nao pơ Isă ma ñu pơ ƀon Mamrê mơ̆ng plơi Kiyat-ơƀa (plơi Kiyat-ơƀa a iâo ha tô̆ dŏng plơi Hêbrô̆n), ƀon nŭn yơh Abrahăm dăp Isă dŏ ahlâo.#An Phŭn 13:18. 28Isă dŏ dĭp hmâo 180 thŭn. 29Tơl Isă hmâo ayŭ wĭ, wŏt hr̂ăp mơ̆ng klơi hơdĭp ñu, jr̂ŏng nŭn ñu tĕ pr̂an djai hĕ. Nĭng nŭn yơh ñu tui nao pơtŭm hr̂ŏm ơi yă ñu. Jr̂ŏng nŭn nă ñu Êsao dua ñu Yakô̆p ba nao dŏl lôi ñu.#An Phŭn 49:29-31.

Currently Selected:

Phŭn Blŭng 35: JKB

Highlight

Copy