Phŭn Blŭng 33

Yakô̆p dăp Êsao pŏ gŏp gơñu

1Jr̂ŏng nŭn Yakô̆p ngak ep nao, ƀôh Êsao pah dŏ bat r̂ai hr̂ŏm đahkơi pă tuh r̂ăng, jr̂ŏng nŭn Yakô̆p pơklah lôi nă ñu phar̂a, čr̂oh hr̂ŏm Lêa, dăp Račel, wŏt đahmơi hlŭn dua r̂ăng he mơ̆n. 2Ñu čr̂oh đahmơi hlŭn dăp nă gơñu br̂ơi bat gah năp, wŏt Lêa dăp nă ñu bat tui klon gơñu, jr̂ŏng nŭn Račel hr̂ŏm nă ñu Yôsep bat dơdơi r̂ăng. 3Pô ñu dŏng bat nao gah năp, jr̂ŏng nŭn ñu bon tơl pơ kơnah juh wŏt, khă tơl jĕ yŏng ñu.

4Plai Êsao kluh nao pơ Yakô̆p, mă kuăl kuôp tơkoi ñu dăp čô̆m, jr̂ŏng nŭn gơñu hia. 5Jr̂ŏng nŭn Êsao ep nao, ñu ƀôh đahmơi-đahmơi dăp nă muai, nŭn ñu kơña: «Môt lơi r̂ai hr̂ŏm ih nŭn?» Yakô̆p til glaĭ: «Ne nă Ơi Adai pha br̂ơi kâo, yua ñu pap-dr̂ap kâo hlŭn ih.» 6Nŭn đahmơi hlŭn dua r̂ăng dăp nă gơñu r̂ai jĕ bon kô̆p kŏ. 7Jr̂ŏng nŭn Lêa dŏng dăp nă ñu r̂ai jĕ bon kô̆p kŏ. Tŏ tui dŏng Yôsep dăp Račel r̂ai jĕ bon kô̆p kŏ mơ̆n. 8Jr̂ŏng nŭn Êsao kơña: «Bih phung čĭm kâo ƀôh bat tr̂ôi mơ̆ng klơi nŭn, ih čiăng ngă hiư̆m pă?» Yakô̆p til glaĭ: «Ơ khua, kâo čiăng ih pap-dr̂ap br̂ơi kâo.» 9Plai Êsao til glaĭ: «Ơ dơi, kâo hmâo lơbeh-lơbai yơh, nŏ ih hmâo nŭn čr̂oh glaĭ ih pô wŏ.» 10Jr̂ŏng nŭn Yakô̆p til glaĭ: «Bĭ ôh, jơ̆ laĭ ih pap-dr̂ap br̂ơi kâo, br̂ơi ih tô̆ dr̂ăm mơ̆ng ngan kâo wŏ, yua kâo ƀôh ƀŏ ih, hla ti kâo ƀôh ƀŏ Ơi Adai mơ̆n, dăp ih hăp tô̆ kâo mơ̆ng klơi ak-oi mơ̆n. 11Dueh mơ̆ng ih tô̆ wŏ dr̂ăm#33:11 Dr̂ăm Hêbrơ laĭ «Klơi nŭk-nua kâo.» An Phŭn 27:35-36. r̂ăng ba nao pơ ih, yua Ơi Adai pap-dr̂ap kâo, nŭn kâo hmâo tôm-tĕč yơh.» Yua Yakô̆p dŏ pơtr̂ŭt ƀel, nŭn Êsao tô̆ hĕ.

12Jr̂ŏng nŭn Êsao laĭ: «Nah ta, bat nao pơ năp dŏng. Kâo ti ba glan ih.» 13Plai Yakô̆p til glaĭ: «Ơ khua, ih thâo kr̂ăn yơh, nă-bă kâo dŏ djĕ, dăp phung triw phung be phung mo dŏ hr̂ŏm kâo dŏ pơmĕm nă, jơ̆ ta pơkhŏm br̂ơi ñu bat gơbal, wŏt ha r̂ơi đơč, nŭn phung čĭm ti djai bih blao yơh. 14Nĭng nŭn yơh, ơ khua, br̂ơi ih nao hlâo kâo hlŭn ih wŏ, kâo ti bat tr̂et-tr̂ot-tr̂et-tr̂ot tui pr̂an čĭm bat gah năp kâo, dăp tui pr̂an nă muai he mơ̆n, khă tơl kâo tr̂uh nao pơ ih mơ̆ng ƀon Sie.»

15Jr̂ŏng nŭn Êsao laĭ: «Br̂ơi kâo čr̂oh mơnuih kâo pơanah dŏ hr̂ŏm ih wŏ.» Plai Yakô̆p til glaĭ: «Ơ khua, čr̂oh yĕt lĕ? Kâo bơni ih lô, yua ih pap-dr̂ap br̂ơi kâo.» 16Mơ̆ng r̂ơi nŭn mơ̆n, Êsao wŏt glaĭ pơ ƀon Sie dŏng. 17Plai Yakô̆p dŏng, ñu bat nao pơ ƀon Sukôt, nŭn ñu ngă sang pô ñu ha boh, dăp ngă wal čĭm he mơ̆n. Yua nŭn yơh r̂ăng mơ̆ng iâo ƀon nŭn “Sukôt” (čiăng laĭ “Wal”).

Yakô̆p tr̂uh nao pơ plơi Sigem

18Pah Yakô̆p biă mơ̆ng ƀon Pađăn-ơram, nŭn ñu bat nao tơl pơ plơi Sigem tăm lŏn-ia Kanan mơ̆ng klơi ak-oi. Jr̂ŏng nŭn ñu bơdŏng sang seng tŏng gah năp plơi nŭn. 19Ƀon čol ñu bơdŏng sang seng tŏng nŭn, ñu blơi tô̆ pơanah mơ̆ng môt nă čo Hamâo, Hamâo nŭn ma Sigem. Kha ñu blơi kơnah nŭn, mơ̆ng pr̂ăk ha tuh kêsita#33:19 Mơ̆ng nôk đim ka hmâo len ka hmâo kăk ôh. R̂ăng tô̆ pr̂ăk tĭt tui tam kêsita, hla ti ta tĭt maih tui tam gr̂am. Ta bĭ thâo kr̂ăn ôh ha tuh kêsita nŭn hmâo dơm gr̂am..#An Yôs 24:32; Yôh 4:5. 20Ñu ngă pr̂a ngă yang pơ anŭn, jr̂ŏng nŭn ñu iâo ƀŏ pr̂a nŭn: “El-elôhê-israel” (čiăng laĭ “Ơi Adai Yang Israel”).

Currently Selected:

Phŭn Blŭng 33: JKB

Highlight

Copy