Phŭn Blŭng 18

Ơi Adai uăn hr̂ŏm Abrahăm dua ñu Sara laĭ gơñu ti hmâo nă

1 Yêhôwa pơƀôh br̂ơi Abrahăm ƀôh ñu jĕ phŭn kơyâo dŭt-dŭt#18:1 Phŭn kơyâo dŭt-dŭt nŭn Hêbrơ laĭ «Phŭn kơyâo Êlôn.» An Phŭn 12:6. ơi Mamrê, pah ñu dŏ ben ti bah amăng sang seng tŏng, mông yang r̂ơi pơiă kơtang. 2Ñu ngak ƀŏ ñu ƀôh đahkơi klâo r̂ăng dŏ dŏng gah năp ñu. Tơl ñu ƀôh môt đahkơi nŭn, ñu biă mơ̆ng bah amăng sang seng tŏng, kluh nao tơkă, jr̂ŏng nŭn ñu bon tơl pơ kơnah. 3Jr̂ŏng nŭn Abrahăm laĭ: «Ơ Khua Yang,#18:3 Ơ Khua Yang lơ «Ơ môt khua.» jơ̆ laĭ ih čiăng kâo, dueh mơ̆ng ih anăm bat dr̂ong lôi kâo hlŭn ih ôh. 4Dŏ gon r̂ăng ba r̂ai ia sĕt-mĕt, gô-ih mơ̆ng r̂ao le. Dueh mơ̆ng gô-ih bơdơi dăng gah yô̆ phŭn kơyâo ne ƀơĭ. 5Yua gô-ih pŏ kâo hlŭn gô-ih boih, nŭn yơh br̂ơi gô-ih dŏ gon kâo nao tô̆ nŭmpăng sĕt-mĕt br̂ơi gô-ih ƀŏng, čiăng gô-ih hmâo pr̂an, jr̂ŏng nŭn gŭ bat dŏng.» Môt đahkơi nŭn til glaĭ: «Br̂ơi ngă tui klơi ih hiăp nŭn wŏ.» 6Jr̂ŏng nŭn Abrahăm mŭt nao tăñ pơ Sara tăm sang seng tŏng, ñu laĭ: «Br̂ơi tô̆ pŭng dai sali hiam klâo i,#18:6 Pŭng dai sali hiam klâo i dơmô pŭng pluh dua kilô. jr̂ŏng nŭn lŭk ngă nŭmpăng tăñ-tăñ.» 7Jr̂ŏng nŭn Abrahăm nao pơ phung mo mă nă mo ha dr̂ơi săl ñu wăn hiam, jr̂ŏng nŭn mop br̂ơi hlŭn ñu, čiăng ñu bơwih-bơwăng tăñ-tăñ. 8Jr̂ŏng nŭn ñu tô̆ ia sâo be kŏng, dăp ia sâo be hlao, wŏt djăm nă mo ñu pơkr̂a nŭn, pô̆ br̂ơi môt đahkơi klâo r̂ăng nŭn. Pah môt nŭn dŏ ƀŏng, Abrahăm dŏ dŏng jĕ gơñu gah yô̆ phŭn kơyâo nŭn mơ̆n.

9Jr̂ŏng nŭn gơñu kơña Abrahăm: «Sara bơnai ih, ñu dŏ pơ pă?» Abrahăm til glaĭ: «Dŏ tăm sang seng tŏng.» 10Jr̂ŏng nŭn, tăm môt gơñu hmâo ha r̂ăng, ñu laĭ: «Tơl thŭn dơi kăl, kâo ti wŏt glaĭ pơ ih dŏng, pah anŭn Sara bơnai ih ñu hmâo nă đahkơi boih.»#18:10 Phŭn 12:1-3; 15:1-21; 17:1-27; 22:16-18 r̂ă r̂oi mơ̆ng klơi Ơi Adai pơhiăp uăn hr̂ŏm Abrahăm mơ̆n. Plai Sara dŏ kơmŏng ti bah amăng sang seng tŏng, gah r̂ŏng ñu. 11Abrahăm dua ñu Sara tha jat boih, wŏt Sara bĭ hmâo ƀôh bĕn dŏng tah. 12Jr̂ŏng nŭn Sara klao tăm bŭt ñu, ñu laĭ: «Kâo tha kal ne boih, hiư̆m, kâo ti hmâo klơi ak nŭn mơ̆n? Gah khua kâo ñu tha mơ̆n.» 13Nŭn Yêhôwa pơhiăp hr̂ŏm Abrahăm: «Yua yĕt Sara klao nĭng nŭn, dăp laĭ, “Kâo tha kal ne boih, hiư̆m, kâo ti hmâo nă mơ̆n?” 14Hiư̆m, hmâo mơ̆n, buă yĕt Yêhôwa bĭ thâo ngă?#An Lŭk 1:37. Thŭn dơi kơñ, tơl r̂ơi kâo pơkă, kâo ti wŏt glaĭ pơ ih dŏng, pah anŭn Sara hmâo nă đahkơi boih.» 15Jr̂ŏng nŭn Sara huĭ, nŭn ñu hiăp ƀlơl: «Kâo bĭ klao ôh.» Nŭn Yêhôwa laĭ: «Bĭ ôh, ih klao yơh!»

Klơi tr̂ĕ kơđi plơi Sôđô̆m

16Jr̂ŏng nŭn môt đahkơi klâo r̂ăng nŭn gŭ đuĕ mơ̆ng anŭn, nŭn gơñu ep tr̂ŭn pơ plơi Sôđô̆m. Abrahăm bat hr̂ŏm gơñu mơ̆n, čiăng ba bơbiă gơñu. 17Jr̂ŏng nŭn Yêhôwa laĭ: «Buă kâo iă ti ngă, kâo bĭ bơdŏp mơ̆ng Abrahăm ôh, 18yua Abrahăm ti jr̂ŏng sô̆n-sat pr̂ŏng dăp kơtang, bih-tih sô̆n-sat dŏ mơ̆ng lŏn kơnah ti hmâo klơi nŭk-nua yua mơ̆ng ñu. 19Yua kâo r̂ih ñu,#18:19 Kâo r̂ih ñu Hêbrơ laĭ «Kâo thâo kr̂ăn ñu.» čiăng ñu pơto br̂ơi nă-bă ñu, dăp khŭl-khap sang-nŏ ñu dơdơi kơñ, gơñu mơ̆ng djă čr̂oh glan Yêhôwa, čiăng gơñu ngă klơi djơ̆ dăp klơi kơpă. Nĭng nŭn yơh, Yêhôwa ti br̂ơi Abrahăm, bih nŏ yĕt-yĕt ñu hiăp uăn hr̂ŏm Abrahăm.» 20Jr̂ŏng nŭn Yêhôwa laĭ: «Kâo hmĭ i klơi set plơi Sôđô̆m dăp plơi Kômôra ngă, yua klơi glaĭ nă plơi lan nŭn ngă dr̂ă jat. 21Yua nĭng nŭn yơh, kâo mơ̆ng tr̂ŭn nao ep lăng, čiăng thâo kr̂ăn laĭ, klơi set gơñu ngă nŭn, hla ti kâo hmĭ i mơ̆n ah. Jơ̆ laĭ bĭ, kâo ti thâo mơ̆n.»

22Jr̂ŏng nŭn môt đahkơi nŭn biă đuĕ mơ̆ng anŭn,#18:22 Jơ̆ ta an Phŭn 19:1, ta ƀôh laĭ hmâo đahkơi 2 r̂ăng đơč nao pơ plơi Sôđô̆m. Ha r̂ăng dŏng dŏ glaĭ hr̂ŏm Abrahăm, ñu nŭn Yêhôwa. bat nao pơ plơi Sôđô̆m, plai Abrahăm dŏng, ñu dŏ nŏng dŏ dŏng ti năp Yêhôwa. 23Pah anŭn Abrahăm nao jĕ Yêhôwa, ñu laĭ: «Hiư̆m, ih ti ngă bơr̂ăm lôi mơnuih kơpă hr̂ŏm mơnuih set dơdi mơ̆n ah? 24Jơ̆ laĭ hmâo mơnuih kơpă ma pluh r̂ăng dŏ tăm plơi nŭn, hiư̆m, ih ti ngă bơr̂ăm lôi ƀon nŭn mơ̆n? Hiư̆m, ih bĭ pap-dr̂ap plơi nŭn ôh, jơ̆ laĭ hmâo mơnuih kơpă ma pluh r̂ăng dŏ tăm plơi nŭn? 25Klơi ih pơdjai lôi mơnuih kơpă hr̂ŏm mơnuih set, ih bĭ juăt ngă nĭng nŭn ôh. Jơ̆ ngă nĭng nŭn, mơnuih kơpă ha luaĭ ti mơnuih set mơ̆n. Ih bĭ juăt ngă nĭng nŭn ôh. Ih khua tr̂ĕ kơđi bih-tih mơnuih mơ̆ng lŏn kơnah, hiư̆m, ih bĭ tr̂ĕ kơđi mơ̆ng klơi kơpă ôh?» 26Nŭn Yêhôwa laĭ: «Jơ̆ laĭ kâo ƀôh mơnuih kơpă ma pluh r̂ăng dŏ mơ̆ng plơi Sôđô̆m, nŭn kâo ti pap-dr̂ap bih mơnuih ƀon nŭn, yua mơ̆ng môt gơñu.» 27Jr̂ŏng nŭn Abrahăm hiăp đĭ: «Kâo dueh mơ̆ng ih pap br̂ơi kâo he kâo khĭn pơhiăp hr̂ŏm ih Khua Yang, wŏt kâo kơnah ƀô̆k dăp pul đơč. 28Tăm môt mơnuih kơpă nŭn, jơ̆ laĭ hmâo kăn pă pluh ma r̂ăng đơč, hiư̆m, ih ti bơr̂ăm lôi bih mơnuih mơ̆ng plơi nŭn mơ̆n, yua ñu ñă lôi ma r̂ăng nŭn?» Nŭn Yêhôwa laĭ: «Jơ̆ laĭ kâo ƀôh pă pluh ma r̂ăng dŏ pơ anŭn, kâo bĭ bơr̂ăm lôi ôh.» 29Jr̂ŏng nŭn Abrahăm pơhiăp dŏng: «Hiư̆m lĕ, jơ̆ laĭ ih ƀôh pă pluh r̂ăng đơč dŏ pơ anŭn?» Nŭn Yêhôwa laĭ: «Kâo bĭ bơr̂ăm lôi ôh, jơ̆ laĭ hmâo pă pluh r̂ăng.» 30Jr̂ŏng nŭn Abrahăm laĭ: «Ơ Khua Yang, dueh mơ̆ng ih anăm hêl ôh, jơ̆ laĭ kâo pơhiăp dŏng. Hiư̆m lĕ, jơ̆ laĭ ih ƀôh klâo pluh r̂ăng đơč dŏ pơ anŭn?» Nŭn Yêhôwa laĭ: «Kâo bĭ bơr̂ăm lôi ôh, jơ̆ laĭ kâo ƀôh klâo pluh r̂ăng.» 31Jr̂ŏng nŭn Abrahăm laĭ: «Kâo dueh mơ̆ng ih pap br̂ơi kâo he, kâo khĭn pơhiăp hr̂ŏm ih Khua Yang. Hiư̆m lĕ, jơ̆ laĭ ih ƀôh dua pluh r̂ăng đơč dŏ pơ anŭn?» Nŭn Yêhôwa laĭ: «Kâo bĭ bơr̂ăm lôi ôh, jơ̆ laĭ hmâo dua pluh r̂ăng.» 32Jr̂ŏng nŭn Abrahăm laĭ: «Ơ Khua Yang, dueh mơ̆ng ih anăm hêl ôh, jơ̆ laĭ kâo pơhiăp ha wŏt ne dŏng đơč. Hiư̆m lĕ, jơ̆ laĭ ih ƀôh pluh r̂ăng đơč dŏ pơ anŭn?» Yêhôwa laĭ: «Kâo bĭ bơr̂ăm lôi ôh, jơ̆ laĭ hmâo pluh r̂ăng.» 33Tơl Yêhôwa pơhiăp hr̂ŏm Abrahăm jr̂ŏng boih, nŭn ñu biă đuĕ. Plai Abrahăm dŏng, ñu wŏt glaĭ pơ ƀon ñu dŏ.

Currently Selected:

Phŭn Blŭng 18: JKB

Highlight

Copy