Matsiyù 5
5
Jèèn tsɛ waajibia
(Marikì 3.13; Lukì 6.12-16; 6.20-26)
1Àyìwà, Yesù jàmaà jàu, è tèyn, è tsuù jèn sɔn tsɛ. Tɔ̀un, à re kàràndzin neè yè e kpɛrɛ̀ à ra. 2Àwà, è maa è kàr'na. À ci:
Xɛɛrɛ dziitsyɛunmaà
(Lukì 6.20-23)
3«Nìì reè y'à jàa ye gbaɔ̀ Ŋaablà kajaa tsɛ, twɛy raa wùbeu, kàtsu Ŋaablà re Màsàbee twɛy rìì laa.
4Nìì reè vunuun kɔɔ̀n, twɛy raa wùbeu, kàtsu Ŋaablà nà è vunun cin.#Ekk 61.2.
5Nìì reè vunun ma dzi, twɛy raa wùbeu, kàtsu, è nà dzɔ̀nxɔɔ̀ tàrà shɛn.#Zab 37.11.
6Terenbee dzuà ko à mìnoò ni nìì reè rà, twɛy raa wùbeu, kàtsu è nà cɛn.#Ekk 55.1-2.
7Nìì reè màtsur'la, twɛy raa wùbeu, kàtsu, Ŋaablà sa nà màtsuru è ra.
8Nìì reè duùn fyɛɔ, twɛy raa wùbeu, kàtsu, è nà Ŋaablà ja.#Zab 24.3-4.
9Nìì reè y'à gaa jaancin yè bà ni, twɛy raa wùbeu, kàtsu, è nà kiri Ŋaablà dzin ì.
10Nìì reè xɔn bìiŋnà terenbee yè bà saabu, twɛy raa wùbeu, kàtsu, Ŋaablà re Màsàbee twɛy rìì laa.#Piy1 3.14.
11Mòdzian ye ba ye ɲɛ̀ɛn, yè ye byɛn, yè ɲanbee kaatsià sapɛ doò wɔ ye ra mun kamà, ye raa wùbeu.#Piy1 4.14.
12Ye e taama dzibe, taamadzibe brìsi ka, kàtsu, ye nà bàràji bla tarà Ŋaablà re. Kɛɛra niì reè dɔ̀n bou ye jɔun, è twɛy sa byɛun tɔ̀ rii tsuru.#Mbk2 36.16; Kɛf 7.52.
Yesù ci wò re kàràndzin neè rìì dziɲaan kòo, ko à vyevyeè
(Marikì 9.50; 4.21; Lukì 14.34-35)
13 #
Mar 9.50; Luk 14.34,35. Ye rìì dziɲaan kòo. Kòo to ye maà, fee soo dzia à sèè dzibe kɔn ? Àwà, à na gèsɔn wùbee tɔ̀un dɛ, fɔ è maa da rɔn mòdzian y'à tɔ̀rɔ̀ e san dzuun. 14#Yux 8.12; 9.5.Ye rìì dziɲaan vyevyeè. Wɔ̀ rìi tsùuŋnà jèn tsɛ, tɔ̀ na dzia mɛnɛn waa. 15#Mar 4.21; Luk 8.16; 11.33.Mòò to na fìtsina dzu wɔɔ̀, è gè kuu à kùùn waa. À y'à tsùɔ fìtsìnà tsuuma nɔ̀n nì, à vyeè yè bo gbàdòùndzin neè sapɛ re. 16#Piy1 2.12.Tɔ̀ soo tsuru, ye sa raa vyevyeè yè bo mòdzian rè, yè bà ni ye faadzii wuu reè jà, yè tsoo dzi ɲɛn ye Fàà tsɛ, tɔ̀ riì ni jìrànxɔ rɔ̀n.»
Yesù ci wo naɔ̀ Ŋaablà re shi kpadèuma rèè dzii tsyɛn
17Àyìwà Yesù ye dzin kɔn ci: «E maà à siin ci mun naɔ̀ sàrìyaa gooma reè, tàmafa Kɛɛra reè rè gooma reè mɛɛy rìì dɛ ! Mun na naɔ̀ è mɛɛy waa, mun naɔ̀ è bo e shi tsɛ rìì. 18#Luk 16.17.Sààben na, mun nì ci e ra, fɔ ŋaablaxɔɔ̀ ko dzɔ̀nxɔɔ̀ sa yeè bè dò, arì Ŋaablà re sàrìyaa goomadziniin, tàmafa à sɛbɛndziniin, tɔ̀ pɛn fa dò waa, fɔ goo rèè sapɛ yeè bè fa do. 19Tà doùn, mòò o moò ye to Ŋaablà dzugooma xɔù rèè soo latsùù bɛy, arì è ɲan kiɲaaniàn, è mòdzian kàràn ci è sa y'a fa tà tsuru, tà tsìfa sa nà kiri Jìrànxɔɔ̀ Màsàbee doùn mòdzin kiɲaaniàn. Mòò o moò to nà è shi jiì, à yè è kàràn dzyee rèè sa ra, tɔ nà kiri Jìrànxɔɔ̀ Màsàbee doùn mòdzin blaa. 20Àwà, mun nì ci e ra, ye raa terenbee ma geren Sàrìryà Kaamoo reè ko Faridziɲɛn rèè raà tsɛ fyeu, dɔ̀n goòmà na ni ye mà Jìrànxɔɔ̀ Màsà ganee doùn waa.
Yesù ci min goo nìì reè shi jiì
(Marikì 11.25; Lukì 12.57-59)
21 #
Jdk 20.13; Sdk 5.17. Àwà, ye y'à myɛ̀un, ci à dèu fàbɔɔ rèè rà ci:
"Maà mòò vu waa. Ci mòò riì ye mòò vu, tɔ̀ tsìfa wù kitsia ka."
22Ŋà, mun nì ci e ra, mòò o moò nà e vunun ta e modzìnsia ka, tɔ wù è kitsi. Mòò riì nà e modzìnsia ɲɛ̀n ci à manan, à wù tɔ̀ yeè kitsi kitsi kunun kur'là mòdzin neè rè. Mòò riì to nà e modzìnsia ɲɛ̀n ci à fàkɔɔn, tɔ wù jààndamaan sàà ka. 23Tɔ̀ kamà, a re saaka boràmaà Ŋaablà re, e ba nà à bo saakabomaà tsɛ, a taa ye to ci moo tsyèè tàraɔ̀ a ma, 24saakaà tsùù to mɔn saakabomaà tɛyn, e bè, ye bè byɛ̀n à mà ŋe. Tà shɔ̀ùn, e kòmànà bè a re saakaà bo.
25È ba a ci goo dɔ̀un a ko mòò fi, ye bà nà bè à kitsi kunùn, à yè e to shia tsɛ, a maxɔbe ye byɛ̀n à mà tabe. Tà boshɔ̀ùn wo kitsifasià ye be wo wɔ kitsikununbaà suun, tɔ nà wo wɔ kàsògbaà kplatsuubaà suun, yè wo ji kàsoò doùn. 26Sààben na, mun nì ci a ra, ɲɛyn niì sapɛ jiɔ̀ wo jɔun, wo ma tɔ̀ sàrà do fyeu, wo na boò mɔn byɛ.
27 #
Jdk 20.14; Sdk 5.18. Ye y'à myɛ̀un, ci à dèu ci:
"Maà ɲànmɔ̀ɔ̀be fa waa."
28Ŋà, mun nì ci e ra, mòò o moò taàn siɛ̀n à jaàn yè bo à re, tɔ ɲànmɔ̀ɔ̀be fau à ka e duùn nòn. 29#Mat 18.9; Mar 9.47.Àwà, sani a sirama sia rè jaadzian yè bà saabu e gooɲaantsii tarà, à kwey bo, a maa jeenà. E fɔn a gɔɔ̀n gàne soo ɲan, tɔ fyan a ko e kur'la yè bè jààndaman. 30#Mat 18.8; Mar 9.43.Sani a sirama sia to yè bà ni ba saabu e gooɲaantsii tarà, à kùnùn bo, a maa jeenà. E fɔn a gɔɔ̀n gàne soo ɲan, tɔ fyan a ko e kur'la yè bè jààndaman. 31#Sdk 24.1-4; Mat 19.7; Mar 10.4.À deò ci:
"Mòò riì ye ba e re tààn bàjia, è furu san sɛbɛ̀n sìn à ra."
32 #
Mat 19.9; Mar 10.11,12; Luk 16.18; Kor1 7.10,11. Ŋà, mun nì ci e ra, mòò o moò yè re tààn bàjia, à mà bà kɛ̀kɛ̀ɛ̀ybe kamà fyeu, tɔ̀ ye e re tààn jaa kaà ɲànmɔ̀ɔ̀be rii là. Mòò riì to tàan bàjiumaà seen, à sa ɲànmɔ̀ɔ̀be rii.»
33 #
Sak 19.12;
Dɛk 30.3; Sdk 23.22. Yesù yè geren goomaa rè ci: «Y'a myɛun sa, ci à dèu fàbɔɔ rèè rà ci:
"A y'a kɛɛ̀y nìi ra, tɔ̀ bo e shi tsɛ. A y'a kɛɛ̀y goo o goo ra Tsìfa Ŋaablà kajaa tsɛ, tɔ̀ bo e shi tsɛ."
34 #
Yak 5.12;
Ekk 66.1; Mat 23.22. Ŋà, mun nì ci e ra, e maà e kɛɛ̀y tsu rii waa. E maà e kɛɛ̀y ŋaablaxɔɔ̀ rà, kàtsu tɔ Ŋaablà re màsà gbaaniɛn nì. 35#Ekk 66.1; Zab 48.3.E maà e kɛɛ̀y dzɔ̀nxɔɔ̀ rà, kàtsu, tɔ Ŋaablà santsuumaà nì. E maà e kɛɛ̀y Yerusalɛmùn wɔ̀ɔ̀ rà, kàtsu tɔ màsa blaa rè wɔ̀ɔ̀ rìì. 36Maà a kɛɛ̀y a yɛrɛ̀ kungɔɔ tsu ra waa, kàtsu wo fa dzi a kungwɛ̀ɛn soo ba fyɛu, tàmafa wo y'à bà tsìù waa. 37E re ɔ̀ɔn ye bà ɔ̀ɔn, ɔ̀ɔɔn ye bà ɔ̀ɔɔn, dzyee gè o ge bàa tɔ̀ tɛ̀y, tɔ̀ sapɛ boò Sùtana ɲan.
38 #
Jdk 21.24; Sak 24.20; Sdk 19.21. Àwà, y'a myɛun, ci à dèu ci:
"E mòò jaa ci, a sa raà yè ci. E mòò ɲin kɛɛy, a sa raà yè kɛɛy."
39Ŋà mun nì ci e ra, mòò riì y'à gaa wò yeè ɲaan fa a ra, maà a gɔn à ra waa. Mòò ye sitaa zhɛ a sirama sia tààkuàn ɲàn, soo sa tsuù à re. 40Mòò to ye ba ni à re è b'à ka kitsima, à re mɛ̀yɛɛ tsi a ra, a re mɛ̀yɛ blaa sa to à re. 41Fààntsià sɔn ye seyn tsuù a kuùn, ci a ka gànè xɛkɛɛ̀ sɔn jiì, à ka à tsuru fii jìì. 42Mòò y'a fyɛn gè rà, à kɔ̀ ! Mòò to ye gè dandan a re, maà a nɔn waa.
43Àwà, y'a myɛ̀un, ci à dèu ci:
"A naà a wuɔ kɛ̀n, a ɲaàn goo xɔbe a ma."
44Ŋà, mun nì ci e ra, ye ɲan rèè kɛ̀n. Nìì reè yè e kuun'n kuru ɲaan faa, ye Ŋaablà mafyɛ̀n twɛy rè. 45Ye tɔ̀ fa, sànko ye bà ni ba e Fa Ŋaablà dzin ì, tɔ̀ riì ni jìrànxɔ rɔ̀n, è bà e re bwèè boò mòdzìn ɲan reè ko mòdzin wuu reè sa re, è ŋaà nàa mòdzin tereunma rèè, ko terenbɛy reè sa re. 46Ye ye e kɛnbaa rèè bàsɔùn goo dzibe e ra ɔ, ye ni bàràji kɛn ni tàrà tɔ̀ ɲan ? Xɔnsɔɔn tsi reè sa na tɔ̀ soo rìì fara ɔ ? 47Ye to ye ba e neemasi reè bàsɔùn nì tswàa, tɔ goo blà rii fakɔɔn ye re o ? Ŋaabla tɔ bɛy reè sa na tɔ̀ soo rìì faa gbɛ ? 48#Sak 19.2; Sdk 18.13.Àwà, ye bà mòdzin dziitsyɛunma ì, a ci ye Fà rìi ni jìrànxɔ rɔ̀n, tɔ̀ dzii tsyɛɔ̀n nìi tsuru.»
Currently Selected:
Matsiyù 5: BDZU
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
© 2024 Église Évangélique Mennonite du Burkina Faso (EEMBF) et SIL International