ZEKHARIA 14
14
Yerusalem Voomoo" yo' Byumyu" yi
1 Aseing dang: phyed loo wa da" bidnyid gi jhang jo, bye:. Houg: lang" Yerusalem gi ziyoo lhoid yu pyam' zi shau" loo wa nghoid lho: hau: ziyoo joem ri nanu" da" myo, shid ti: moo gam go" shoug" zi shau" boem wa nghoid. 2Aseing gi byumyu" yi dangain" ri Yerusalem voomoo" ri zain: wa shid re" khe: zheing" loo wa nghoid. Voomoo" rigi nyangnu" yo" zain: yu pyam lho: yhoem: joem ri we' phyo' pyam' boem wigi myiyi: yiri we' rue" pyam' boem wa nghoid. Vookhoug: mo mung" byu agung dayi" rigi myheug she: lo" lho: agung dayi" rigi teung too" khare" boem wa. 3Hau: thang: ri Aseing gi shid phyang" nyang: meing: zain: lo yu" bye: yhang: ti" nyangnu" ri shu" thu lo" lho: hau: byumyu" yiri zain: loo wa zi nghoid. 4Hau: bidnyid ri Aseing gi Yerusalem bidthu shoid mo zhainloin: boem moo re" yab wa zi nghoid. Houg: lang" zhainloin: boem gi bidthu shoid khyoo: dakhyam"- bidvang shoid khyoo: dakhyam" gyam: lo" wigi lang: khoug: moo" zeing bue" lo lho: boem dakhyam" gi gyid moin khyoo: - dakhyam" gi gyid byeing: khyoo: yu: loo" wa. 5Nanu" koem gi boem eig gang gyam: lo" da" lang: khoug: khyo" wigi phang: thu loo" goo" wa nghoid. Yuda khokham" Uzia pyaid moo myid leig leig da" uri nanu" phoug" phyid" yi phang: lid lo" yhang: ti" nanu" shau" phang: loid loo" goo" wa. Hau: uri Aseing nga" Mangsoo gi nya: moug: lagyoo: yi yo' dage" ju" loowa nghoid.
6Hau: ayo, ju" loo lang" ngam" khyoo: aboo- nghain: khi' we' agyoo"- 7Hau: lho: moug: coid ga: zi we' ajo, loo wa. Hau: bidnyid moo Myen" rilang" nyid" kyoug su" dabang jo, wa. Houg: zi kha: yo, bui" wa ziri Aseing dayug kyeing" dase'.
8Hau: bidnyid ju" loo lang" gi Yerusalem voomoo" mo gyid gyeing" yau thu loo wa. Dayham" gi xoo" thoem" khyoo:- dayham" gi Meing: gung panglai khyoo: yau loo" wa. Hau: gyid lang gi zain ri xung" ri dayau nyid wa zi nghoid. 9Hau: bidnyid moo Aseing gi moug: gyab goin' jang" moo khokham koid loo wa nghoid. Byu yugkhang" moo" gi Mangsoo ri kyeing" goeb noku lho: nya: myeing ri kyeing" dasi' loo: wa.
10Mougzhung: shoid mo Geba moug: mo wigi mougpyi: shoid Rimon joyoo ju" sho' damung" goin" pa: dam bue" loo wa zi nghoid. Yerusalem gi ayam aqei: moo jo, da" mungdain: dangain" tho' moo je" myhang: da" myid byu jang: bue" loo wa zi nghoid. Hau: da" vang gi Benyamin khoem" duang: mo zi xang: shi" mo vang nghoid da" vang jhoin: mo khoem" duang: moo ju" loo" sho' Hanaela gyipyu zung mo wigi khokham yi da" zabyid pyeig jang: moo ju" sho' gyi: sheung: loo" wa zi nghoid. 11Mung" byu yigi hau: da" akhoug: moo gau: nyu: nyid boem. Thang: phyang" byo, yoin" khyoo: ashoug" loo: wa.
12Yerusalem voomoo" ri zain: lo da" byumyu" yi dangain" tho' moo Aseing gi gyoug pho" noo phyoo" daja: ri bue" loo nhang: wa nghoid. Nyangnu" gi dadei nyid shi" rilang" nyangnu" da" gung shoo" gi boeb loo" wa. Nyangnu" da" myojid" yo' yhoo: joem we' boeb lo" boem wa nghoid.
13Hau: bidnyid moo Aseing gi nyangnu" ri vhu" nhung nhung nhang: lho: gyoug dain nhang: wigi nyang: cang" nyang: zei: go" ci: lho: zain: goo" nhang: wa zi nghoid. 14Yuda byumyu" yigi Yerusalem ri lhoug zung" yu wa shid re" zain: loo wa nghoid. Nyangnu" gi byu yi dangain" mo, da" ngei sheing: yo' nyangnu" da" jonu" void mi void byi: myoo" sho' lhoid ci: lo boem wa nghoid.
15Gyivoo joem da" myang: yo' loo zei:- loo kung"- Gola-ug yo' gyidab khoug: mo gougnyhoug dangain" tho' moo we' gyoug pho" yoem" gyo" loo wa.`
16Yerusalem voomoo" ri zain: lo nyid da" byumyu" yi mo wigi deung jo, mo, gi yoem: moo" bo da" Aseing ri khokham ri yhang: ti" goeb noku boem wigi seig kyang: pui" koid boem wa shid re" hau: joyoo khyoo: zain khang" moo" yhe: lo" boem wa nghoid. 17Ce: ja: byumyu" nghoid loug we' yoem: moo" bo da" Aseing ri yhe: lho: khokham khyo" goeb noku wa shid re" he: pyam' nghoid rigi nyangnu" da" mungdain: tho' moo moug: avoo wa. 18Egutu byumyu" yigi seig kyang: zoem" pui" koid wa shid re" he: pyam' nghoid rigi Aseing gi hougsu" he: pyam' da" byumyu" khang" mo" tho' moo khyo' kaid wa da" noo phyoo" yoem" yo' nyangnu" ri we' bo loem zoo: nhang: wa nghoid. 19He: zigi Egutu yo' seig kyang: zoem" pui" akoid da" gootu: byumyu" yi dangain" mo, shoug" kham zoo: wa da" yooboo dam nghoid.
20Hau: bidnyid moo «Aseing shid re" gyeung" shang: joyoo» ga: wigi myang: jhu: joem moo lhid" tab to" boem wa nghoid. Noku yhoem: Moo" moo jo, da" oug" joem gi phoin: nam moo jo, da" khu joem yo' dakhyoo" ti" gyeung" shang: wa nghoid. 21Yerusalem yo' Yuda mung" joem mo oug" dangain" gi yoem: moo" bo da" Aseing ri goeb noku jang" moo ci: yhung: wa shid re" khyen: nyheung too' wa nghoid. Said shugbyid: da" xoin" ci: ri" mo, gi oug" hau: ziri yu lho: xoin" to' shoo" yhung wa zi nghoid. Hau: da" bidnyid ju" lo ri myhang: thang Aseing da" yhoem: moo" khoug: moo phaga: koid mo, hang" we' anyid loo: wa nghoid.
Currently Selected:
ZEKHARIA 14: LCL
Highlight
Share
Copy
Want to have your highlights saved across all your devices? Sign up or sign in
Lacid Bible © Bible Society of Myanmar, 2009.
