ZEKHARIA 11
11
Zoug: Lain: yi Gyoeb Gyo" Lo" Khyoo:
1Lebanon we" re" da" khoem" duang: joem ri phang too" we'
Re" da" Shamu gam joem nge" pyam' wa nghoid.
2Gyoin: gam joem we" ngoug khyang" fang" nyid we'.
Shamu gam joem gyau: leung loo" byug bye:.
Gye" bug thu da" seig moo" gam joem gi phyo' shoin' pyam' zi shoug" bye:.
Bashan mo Shookhi" gam joem we' ngoug khyang" fang" nyid we'.
Yooyang" no, yoid yoo thug hain" pyam' boem bye:
3Zoug: yi da" phung" yoeb ci: phyug pyam' boem yoomo
nyangnu" koug ngau nyid abye: go"
Khang khyi joem myeing myhu" nyid ziri tam" gyoo: we'.
Yodan gyid yam cang mo nyangnu" da" siyoo joyoo joem we' pyo, sain" pyam' zi shoug" bye:.
Yang Zung" Su: Eig Yug
4 Aseing nga" Mangsoo ngoo ri hidsu" ga: tid «Said wa soin' to" da" yang phung: ri zoem: nyid da" yang zung" su: yhang: ti" koid we'. 5Yang seing: yigi yang joem ri said loug we' ce: yooboo dam abyid:. Nyangnu" gi yang shoo" ri oung" lho Aseing ri coung" byid: we'. Ngoonu" gi yoo" zoo: yoo" shug bang: bui" bye: ga: tid boem. Yang ri zung" mo, lang" yang joem ri nheig akhyeug» ga: tid.
6(Aseing tid zigi ngoo we' mougmyid byu yi hang" ri we' nheig akhyeug loo: wa. Byu dangain" ri ngoo gi zoug: yi da" lo, moo ab byid: pyam' wa. He: mung" vhoeb zoug: yigi myid jang ri byo, yoin" loo" nhang: goo" wa. Nyangnu" da" yoem: so' mo ngoo akhyoid yu.)
7Yang ri said lho: ung" wa mo, gi ngoo ri vhu" kung: lhung: to". Houg: yoomo said pyam' wa da" yang joem ri zung" da" yang zung" su: bue" loo bye:. Houg: yoomo ngoo gi lhamdung: eig khaid ci: lho: dakhaid rigi «je"Ju"»- dakhaid rigi «sham: shoin"» ein: myheing too" byid: bye:. Houg: yoomo yang phung: ri ngoo bo zung" bye:. 8Ngoo gi ngoo ri ngheing" da" yang zung" mo, gootu: soem" yug ri atho' kham zeing: loo: yoomo lhammoo" dakhyab' khoug: moo za: nyangnu" dangain" mo, ri khaid thu pyam' bye:. 9Houg: lang" yang phung: ri hidsu" tid bye: «Ngoo gi nanu" yang zung" su: anghoid loo: wa. Shid: wa mo, gi shid: looge'. Said pyam' wa mo, we' said pyam' zi shoug" goo" baja". Deung nyid mo, gi dadu: wigi dadu: ri ngaid zoo: go" loo" ge"» ein: tid bye:. 10Houg: yoomo ngoo gi byumyu" yi yo' koid to" da" dang: thang" cab' ri byo, loo" nhang: wa shid re" «jeju"» ga: myheing to" da" lhamdung: ri yu lho: khyau" pyam' bye:. 11Hau: nyid" mo wigi dang: thang" cab' gi byo, loo" bye:. Houg: yoomo ngoo ri nheig nhei: nyid da" yang phung: mo qei ung" mo, gi ngoo ri zung" yu" nyid boem wigi Aseing gi ngoo koid da" moo" zoo" khyo" tid nyid ziri nyangnu" se' yu" ago". 12Houg: lang" ngoo gi nyangnu" ri «Nanu" byid: nau zigi ngoo ri vhukung: phoug" shang" we'. Anoug byid: lang" we' abyid: goo"» ein: tid. Houg: yoomo nyangnu" gi vhukung: phoug" khyo" ngei soem" xi: pyi" leig byid: bye:.
13 Aseing gi ngoo ri tid «Hau: ngei ri alu: koid: zei: khoug: moo du" khyo' kaid we'» Hau: ngei gi nga" da" aphoug" ri moin: yi" sho' byid: da" nga" aphoug" nghoid. Houg: yoomo ngoo gi ngei soem" xi: ri yu wigi Aseing yhoem: moo" mo alu: koid: zei: moo kaid too' bye:. 14Hau: thang: ri ngoo gi «sham: shoin"» ga: myheung to" da" lhamdung: ri khyau" pyam' byid: wigi Yuda yo' Israela sham: shoin" go" da" khyoo: gi byo, sain" loo" bye:.
15Hau: thang: ri Aseing gi ngoo ri hidsu" ga: tid bye: «Nang gi yang zung" su: ti" dalheing: doem koid we'. He lheing gi akhyeing" da" yang zung" su: ti" nghoid nyid. 16Ngoo gi he: mung: moo joem: loo" bang: ri akoem" yu" mo, gang: go" lho: byug shang lo" ziri we' ashoo: mo, no nyid ziri we' aze: gi mo, yoem: bo nyid shi" ziri we' mhain" akaid zho" da" yang zoem: su: dayug ri ngoo lhung: nyhed too" bye:. Nyang: gi xu: thang da" yang shoo" ri zo: lho: nya: khoo: ri we' lang: ceug pyam' wa nghoid. 17Hau: akhyeing" da" yang zung" su: gi byo, yoin" loo" wa. Nyang: gi nya: yang phung: ri she: pyam' abye:. Gyipui" gi nya: yoem: so' ri bain sho' phyo' shoin' pyam' wa. Nya: lo, yoem: gi shid: kyung: loo" wa. Nya: lo, yo shoid myo, jed" gi jed loo" wa nghoid.
Currently Selected:
ZEKHARIA 11: LCL
Highlight
Share
Copy
Want to have your highlights saved across all your devices? Sign up or sign in
Lacid Bible © Bible Society of Myanmar, 2009.
