MATHE 7

Subi" Ri: Yooboo Byid: Dang: Age kho" Da" Khyoo:

(Luk 6:37-38,41-42)

1«Nanu" ri yooboo byid: dang: kho' zi ashau" baja"- subi" ri yooboo byid: dang: khoo' zi akoid: goo. 2Khasu" wim gari Nangnu" nyang: yooboo byid: khyo" cang wigi nanu" ri we' yooboo byid: dang: kho' zi shau" goo" wa. Nanu" nyang: leig byid: kaid da" tang mo nanu" nyang: ri doem leig byid: wa. 3Nyang: nya: myojid" moo bo da" thang" tung" rigi amyed yu" loo:- re" mang: re" nhoung" da" myojid" moo bo da" phei" lhoug: ri cikoid: yu" nyid, go" lha". 4Yu" we' re" da" myojid" moo thang" tung" kaid to" lho: ‹ahain: shi"- re" da" myojid" mo phei" lhoug: yu pyam' byid: wa› ga: re" mang: nhung" phoo ri khasu" wim se' tid nyid lha". 5Akug void to" mo, we"- re" da" myojid" mo thang" tung" ri xang: shid" yu pyam' we' hau: thang: ri she' re" mang: nhung" pho, da" myojid" mo myo, vang ri yu pyam' byid: we'.

6«Gyeungshang: da" ziri lakhuid" joem ri abyid: goo. Nanu" da" vhu" shid ri vu, joem da" shid khoin" moo ashe: pyam' too" goo"- houg: su" anghoid lang" vu, joem gi nang: nhe" pyam' wa. Lakhuid" joem gi lo tau" ngaid boem wa.

Mho' Ge'- Shoo: Ge'- khoem" Moo Ko' Ge'

(Luk 11:9-13)

7«Mho' ge'. houg: lang" nanu" yo" yu goo" wa. Shoo: ge'. houg: lang" nanu" shau" myang goo" wa. Ko' ge' houg: lang" nanu" shid re" khoem" phang byid: wa. 8Khasu" wim gari mho' mo, hang" we' yo" yu shoo: mo, we' shau" myang. Ko' nyid mo, ri we khoem" hpang byid. 9Nangnu" mo hang" nghoid loug we' nya: zoo: gi zooyho' mho' ri lug pyi" byid: wa la". 10Ngoo: do, mho' ri lhang: myu byid: wa la". 11Houg: su" wigi nanu" lang" akhyeing" ashoeb nyid mo, nyang: nya: da" zoo: yi ri ge da" jhung: shug se' byid: nghoid rigi hau: tho' re" je ge da" mougkhoung: tho' mo nanu" da" nya: phoo gi nyang: ri mho' mo, ri ge da" jhung: shug abyid: wa ein: go" la".

12«Subi" nanu" ri pang" thoug byid: wa nanu" vho: nyid ziyo' dakhyoo" ti"- subi" ri we' nanu" cang pang" thoug ge'. Hau: da" zigi toung: to" da" tarha" yo"- lapi: yi da" dang: gung nyang: nghoid bye.

Jhab' Da" khoem" Duang:

(Luk 13:22-24)

13«Jhab' da" khoem" duang: khyo" vang loo ge'. khasu" wim gari joem: lo" jang" moo ju" yhe: da" khoem" duang: gi gye" lam: ziyo'- khyoo: we' gye" yhi: lei wigi houg: khyoo vang loo" mo, gye myo: ago". 14Apyaid' atoo: kangso' dei da: khyoo moo ju" da" khoem" duang: yo" khyoo: gi soo" soo" jhab' yoo mo shau" sho: vang loo" mo, atham.

Agam Yo' Ashi" Da" Khyoo:

(Luk 6:43-44)

15«Nheugloem: ung: khoug: moo gi lang: kyen: phyo' zoo: wa ga: zeigne nheigloem: kaid ci: lho: yang yid void to" mo, nanu" jang" moo ju" loo wa mhau' da" lapi: yi ri jang" pyam' ge'. 16Nyangnu" nya: da" ashi" yo, nyangnu" ri si' wa zi nghoid. Zukyen: byab moo zabyidd" shi"- salau" gam mo shi" myho, shi" yo" phyo' yu" la". 17Houg: su" wigi ge da" shi" gam moo gi ge da" ashi" zei: jo. Age da" shi" gam moo gi age da" ashi" zei: jo. 18Ge da" shi" gam moo gi age da" ashi" zei: wa zi anghoid. Age da" shi" gam gi ge da" ashi" zei: wa zi anghoid. 19Amo da" ashi" zei: da" shi" gam jo, moo jo, rigi thoug lheing: pyam' lho: myi: khyoem moo du" zei pyam' zi shau" nyid ago". 20Houg: su" wigi nyangnu" nya: da" ashi" yo"- nyangnu" nya: da" akhyoo" ri yo" se' da.

Nanu" Ri: Khanham We Ngoo Asi

(Luk 13:25-27)

21«Ngoo ri ‹Aseing we"- Aseing we"› ga: mho' mo, dangain"- Mougkhung: mungdain: moo yo" vang loo" wa zi anghoid. Mougkhung: tho' moo nyid da" nga" pho, nheigloem: yo" cang su: za: dayo" vang loo" wa. 22Hau: bidnyid moo ‹Aseing we"- Aseing we"- ngoonu" re" da" myeing yo" tarha" we' gye" kho" boem bye:- re" da" myeing yo" yu khaid pyam' ziyo' re" da" myeing mo mau" pho" moozoo" ri gye zei: boem bye: anghoid la"› ga: myoo" sho' mo, ngoori tid boem wa. 23Hau: uri ‹ngoo nanu" ri khanham we' asi"- atarha" da" moo" zei: mo, we"- nga" jang" mo gang: loo" ge'› ein: wigi ngoo nyanu" nyang: ri tid wa zi nghoid.

Yhoem: Zhug Mo, Eig Ja:

(Luk 6:47-49)

24«Hid: nga" da" dang: ri shau" gyo: lho: cang zei: loo" mo, hang" nghoid loug we' nyang nya: da" yhoem: ri lugmoo" boem tho' moo zhug to" da" phajhi" boo su: yo" du nyid. 25Hau: mougvo lo wigi gyid je: lo ziyo'- uglid hau' lo lho: hau: yhoem: ri lo doin: nghoid loug we' lugmoo" boem moo zhug too" yoomo aleing loo.

26«Hid: nga" da" dang: ri shau" gyo: lho: wigi acang zei: mo, hang" nghoid loug we' nyang nya: da" yhoem: ri midcoo: dam moo koid: to" da" adu: adam: foin" da" byu yo" du nyid. 27Hau: mougvo lo wigi gyid je: lo ziyo'- uglid hau' lo lho: hau: da" yhoem: ri lo doin: lang" hau: yhoem: gi leung gyoeb lo"- houg: leung gyoeb' lo" da" yhoem: gi mhoin nyang: kaid' bye» ga: kho" kyo".

Aseing Yesu Da" Amyeing" A: Na:

28Akhid" Yesu gi hau: mungdang: joem ri bain kho" kyoo" lang" nya: da" jhoug" myeing" jhoug" thui: ri mung" byu yi gye" gyo: mau" boem. 29Khasu" wim gari nyangnu" nya: da" tarha" sara: yi yhangti" anghoid. Amyeing" a: na: yo" nyanu" nyang: ri jhoug" byid.

Currently Selected:

MATHE 7: LCL

Highlight

Copy