MALAKHI 2
2
1Hau: lho: yoem: moo" bo da" Aseing Mangsoo gi khainjung yiri hidsu" ga: tid.«Khainjung yi we"-he: da" amyeing" tarha" gi nanu" shid re" nghoid. 2Nanu" nga" da" mungdang: ri tam" gyo: lho: nanu" gi ce" noem koid jang" moo we' ngoo ri phau" myang: nyid ca"- hougsu" anghoid rigi ngoo nanu" ri nheung" wa nghoid. Nga" tarha" ri nanu" goolhoo: acang boem yoomo gyeing" gyeing" nyang: akhid" ngoo nanu" ri nheing" wa bye:. 3Ngoo gi nanu" da" zoo: yi myid: yiri dam byid: wa ngoo gi nanu" pui" moo ci: re" da" gougnyhoug khyid" nanu" da" myonhoo: moo joid byid: lho:-nga" shidkhoin" mo houg: khyid" yo' dage" khaid thu pyam wa zi nghoid. 4Hougsu" nghoid lang" nanu" gi ngoo byid: to" da" tarha" ri se' gyo: lo boem wigi khainjung yi Levi da" amyed ashen yi yo' ngoo koid to" da" dang: thang" cab abyo, wa shid re" nghoid» ga: se' lo boem wa zi nghoid.
5Nyangnu" gi ngoo ri gyoug phoug" loo wa shid re" nga" dang: thang" cab moo ngoo dangsoo" byid: to" da" kangso' yo' myenjham" da" khyoo: ri ngoo gi nyangnu" ri byid: bye:. Nyangnu" gi gyeing" gyeing" nyang: ngoo ri phau" myang: lho: gyoug phoug" lo boem bye:. 6Nyangnu" gi anghoid ziri atid loo: za: deingmain" khyoo: ri jhau" byid: bye:. Myenjham" ziyo' dain: da" nheigloem: khyoo" ngoo yo' dage" so" lho: age da" byu myoo" sho' ri nheigloem: phoug loo nhang: boem bye:. 7Khainjung yigi yoem: moo" bo da" Aseing Mangso da" lagyoo: yi nghoid yoomo mung" byu yiri Mangso deingmain" da" lasi phajhi" ri jhau" byid: cang bo nyid. Mung" byu yi we' ngoo vho: ngei khyoo: ri khainjung yi jang" mo yhe: jhoug" yu ca" nyid.
8Nghoid loug we' khainjung yi nanu" gi deingmain" da" khyoo: mo gang: lo" lho: nanu" da" jhoug" myeing" jhoug" thui: mo byu myoo" sho' mo, ri khyoo: vhang: loo" nhang: boem bye:. Nanu" yo' ngoo too" go" da" dang: thang" cab ri we' nanu" wigi lhu: phyo' pyam boem bye:. 9Houg: yoomo nanu" gi nga" da" khyoo: ri acang ziyo' tarha" dang: phyed uri myonhoo: khyen: boem yoomo byumyu" yi dangain" bang: da" shidkhoin" moo ngoo gi nanu" ri aphoug" akhyoid koid lho: phung youg nhang: pyam wa.
Byumyu" yigi Mangsoo moo Nheigloem: Azung" Khyoo:
10Nyha" da" phoo gi dayug kyeing" zi anghoid goo" la". Nyhang" ri phain" so: too" su: we' Mangsoo dayug kyeing" anghoid goo" la". Hougsu" nghoid ri ciwim wigi nyhang" nyang: cang" too" go" da" dangsoo" joem ri phyo' pyam lho: Mangso wigi nyha" phoug" phyid" yi ri koid to" da" dang: thang" cab ri aphoug" akhyoid khasu" wim koid pyam boem lha". 11Yuda byumyu" yi we" Mangsoo moo to" da" dangsoo" ri phyo' pyam lho: Yerusalem yo' Israela dameing" goin" jang" moo we' aco' ajhoid moo" zoo" ri koid nyid boem bye:. Nyangnu" gi Aseing Mangsoo jheddab nyid gyeung" shang: da" yhoem: moo" ri we' aco' ajhoid za: koid pyam boem bye:. Yuda yuggi yigi tungbau yu phara" soolhoo: ri no' da" myiyi: yiri lo, xo' yu boem bye:. 12Hid: su" koid mo, ri Aseing gi Israela byumyu" khoug: mo shang: thu pyam wigi yoem: moo" bo da" Aseing Mangsoo ri yha" byumyu" xoin" ngei" byid: da" phung: moo khanham we' abo shau" vang loo goo" baja".
13Nanu" koid da" moo" zoo" gootu: daja: gi nanu" to' byid: da" xoin" ri Aseing gi akham: yu byid: yoomo nanu" gi ngoug khyang" fang" ziyo' ngoug byid: thu nhang: wigi Aseing da" phoin: moo jhu' loo" nhang: bye:. 14Nanu" gi ‹Ciwim wigi Aseing ngoonu" da" xoin" ri akham: yu lha"› ga: myid nyid ago". He: khyoo: gi nang zooyam yo, ri lo, xo' to" da" myhi' zeing ri byid: to" da" dangsoo" phyo' pyam ziri nyang: se' nyid yoomo nghoid. Nyang: gi re" yhoem: seing: myhi' nghoid bye:. Nya: atho' moo ngoo dang: zung" wim bye: ga› Aseing ri thang" cab koid lho: dangsoo" byid: too" nghoid loug we' nang gi nyang: ri mhau' pyam abye:. 15Nanu" ri dagung dashoo" za: Venyi: daloem: za: bui" nhang: su: gi Mangsoo anghoid goo" rhe". Houg: ri hidsu" bue" lo zigi ce: noem yoomo nghoid lha". Deingmain" da" Mangsoo ri gyoug phoug" se' da" zookhu: du youg wa shid re" nghoid. Houg: yoomo nanu" hang" nghoid loug we' xang: shi" yu to" da" yhoem: seing: myhi' ri she: pyam da" dangsoo" aphyo' wa shid re" zid" lhid nyid we'. 16Israela byu yi nanu" ri Aseing Mangsoo gi hid: su" ga: tid nyid da «Myi: yo' lang gang: khyoo: ri ngoo ngheing" nyid nanu" mo dayug yug nya: yhoem: seing: myhi' tho' moo houg: yhang: ti" nheig khyeug shoo" myen: ase' da" moo" zei: nyid su: ri ngoo ngheing" nyid. Re" yhoem: seing: myhi' ri byid: to" da" dangsoo" zung" lho: aphyo' pyam wa shid re" zid" lhid nyid ge'»
Dang: Phyed wa da" Bidnyid gi Jhang Loo bye:
17Nanu" gi Aseing ri gyo: ngheing" sho' phibu pu' nyid boem wigi «Ngoonu" gi nang ri ce: ja: mo phibu pu' nyid lha"» ga: myid: nyid boem. Houg: lho: nanu" gi akhyeing" moo" ri zei: nyid mo, hang" we' myhang: thang da" Aseing shidkhoin" moo ge nyid zi nghoid nyang: gi akhyeing" da" moo" zei: nyid su: ri we' jheddab nyid» ga: tid ago". Hau: tho' moo gootu: nanu" gi «Deingmain" da" Mangsoo ga: zi khayoo: nyid» ga: tid nyid ago".
Currently Selected:
MALAKHI 2: LCL
Highlight
Share
Copy
Want to have your highlights saved across all your devices? Sign up or sign in
Lacid Bible © Bible Society of Myanmar, 2009.
