LUKA 7
7
Yesu Roma Gyizoug: Phoo Da" Deizoo: Ri: Noo Ge Loo" Nhang:
(Mat 8:5-13)
1 Aseing Yesu gi Byu yi ri hid: su" ga: bain jhoug" byid: lang" gi Kaperna-um voo khyoo doem lo. 2Hau: da voo moo moo" eung: da" gyidab vhoeb zoug: phoo dayug moo deizoo: dayug bo. Dab vhoeb zoug: gi hau yug ri gye" jheddab. Hau: yug gi no lho: shid: loo" yid danghoid lo. 3Hau: zoug: phoo gi Yesu da" lu dang: ri shaug" gyoo: lang" Yuda byumyu" vhu" jhung: yi ri Yesu jhang khyoo: nhang: kaid lho: Aseing: re" wigi nya: deizoo: ri ze: gi byid: wa shid' re" pyeung: kaid. 4Yesu jang" moo zheung: ju" yhi: lang" Yuda vhu" jhung: yi gi hau: gyizoug: phoo gi Aseing: da" jeju" kham: zo: wa moin: yi" su: nghoid. 5Ngoonu" da" byumyu" ri jheddab yoomo Tarha" jung daloem: ri zhug byid: su: nghoid- ga: wigi zhug zhug bo tid byid: boem.
6 Aseing Yesu gi nyangnu" yo" dage" bo re" lho: dab vhoeb zau: da" yhoem: yo athei" ve: jang" moo ju" nyid. Houg: lang" gyizoug: phoo gi bidnoem yi ri Aseing: jhang nhang: kaid lho: Aseing: we" jamjau asho: yen"- ngoo gi amoin: ayi" su: nghoid. Nga" da" yhoem: khoug: moo Aseing: vang ri" wa zigi amoin: yi"- Houg: yoomo ngoo we' Aseing: jhang ri" wa zigi moin: yi" su: anghoid ein: myid. 7Amyeing" za: byid: kaid lang" gi nga" deizoo: yangzain: loo wa bye: ein: loem ga: tid. 8Ngoo nyang: we' tho' mo zoug: yi da" vhoo: moo moo" voin su: nghoid yoomo nga" vhoo: moo we' gyizoo: yi nyid shi. Gyizoo: dayug ri loo we' ein: lang" nyang: gi lo. Gootu: dayug ri loo" we' ein: lang" lo. Nga" join ri he: zi zei: we' ein: lang" nyang: zei ga: wigi tid.
9He: da" dang: ri Yesu shaug" gyoo: lang" gye" gyo: mau" nyid. Nyang: gi thang: moo cang lo da" byu phung: ri lheing: yu lho: ngoo tid zigi hid: yhi loem" jeing" da" khyoo: ri Israela byumyu" moo ngoo amyang yu" ashau" yu" shi" ga: tid.
10Lagyoo: dab vhoeb zau: da" yhoem: moo doem ju" lo" rigi hau: zoug: phoo da" deizoo: gi yang" yang" danyid lang" lo: zi lo" myang boem.
Yesu Cougmoo" Myhi, Dayoug Da" Nya: Zoo: Ri: Doem Dei Loo Nhang:
11Hau: thang: ri Yesu gi Na- in ga da" voo moo ju" lo" ri cangzoo: yi yo" byu phung: moo" yi gi cang lo boem. 12Voo khoem" moo" duang: nam, moo Yesu ju" lo" ri byu yi gi cougmoo" myhi, dayug kyeing" da" yuggi zoo: da" mang ri myhoeb wa shid' re" dang phoug go" thu, ri" lang. Hau: cougmoo" myhi, yo" dage" voo byu yi gi bo de" kaid re" boem. 13Aseing: gi hau: myiyi: myhi, ri myang lang" nheig yu" khyeig yoomo angoug ga: nyang: ri tid. 14Hau: thang: ri ayam moo yhe: lho: mang dangzuang moo lo, wigi yhe: tain" byid. Houg: lang" mang dang mo gi yab jo. Yesu gi zooyam phoo we"- to' we' nang ri ngoo nang ri tid. 15Shid mang gi to' zhoung: lho: dang: tid nyid. Hau: thang: ri Yesu gi nya: yhed ri ab byid:.
16Nyang: nu" dangain" mo, gi gyoug phau" lho: Mang" soo: ri caung" boem ngoonu" moo lapi: zeung dayug thu' loo: bye" ga: Mangsoo gi nya: da" byu phung: ri khyoid yu wa ju" ri" bye ga: tid boem.
17Yesu da" lu dang: gi Yuda mung" dangain" yo,- ayam aqei: mung" moo we' fu" ju" lo" boem bye.
Babtisma Sara: Yohan Jhang Mo Lagyoo: Yi
(Mat 11:2-19)
18-19 Yohan ri nya: cangzoo: yi gi he: da" khyoo: bain sho' tid kyo" boem bye. Houg: lang" nyang: gi cangzoo: eig yug ri khe: yu lho: 19Aseung: jang" moo dang: myed: nhang: kaid' Aseing: nang gi ju" ri" wa ga: su: nghoid bye la". anghoid lang" ngoonu" gi gootu: dayug ri lang" nyid shi" wa la"» ga: myid: nhang: kaid.
20Hau: eig yug gi Yesu jang" moo ju" yhe: lho: Aseing: gi ju" gyoo" loo wa ga: da" Aseing: nyang: nghoid bye la". anghoid lang" ngoonu" gi-gootu: dayug ri lang" nyid shi" wa la". hid: su" myid: yu" wa shid' re" Babtisma sara: Yohan myid: nhang: kaid ga: yhe: tid ago".
21Hau: uri Aseing Yesu gi Byu yi da" noophyoo" joem ri ge loo" nhang. Yu join: joem ri khaid thu' pyam byid. Myo, amyang mo, ri myang loo: nhang. 22Nyang: tid zigi Nanu" myang yu" khyoo:- shau" gyo: da" khyoo: dangain" Yohan ri lo" tid kyoo" ge'. Myo, amyang mo, gi myo, doem myang lo. Khyid: gyoug: mo, gi khyoo: doem yo" so" lo. Manggam: dab mo, gyeungshang: lo. Nujed mo, nukhyab doem shau" gyo:- shid bye mo, doem dei lo. Sho" jhen: mo, lu dang: gi shau" gyo: lo. 23Ngoori aloem" shoid su: gi ngi lhoo wa" ga: wigi Yohan da" cangzoo: yi ri phed: kyo.
24Yohan da" cangzoo: yi gi Aseing: jang" mo thu' loo" lang" Yesu gi Yohan da" khyoo: yo' sen: lho: byu phung: yi ri nanu" gi ce: noem ri yu" wa ein: wigi dain pyoid yoo khyoo: yhi: go" lha". lid' hau lhei, nyid da" jam pheing" gam ri yu" wa shid' re" nghoid go" la". 25Houg: su" anghoid lang" gi byi yung" lhoo" yung" void ci: su: ri yu" wa ein: go" la". Byi: gi mi gi void ci: mo, gi zoug: khokham" yhoem: moo danyid boem. 26Ngoo ri tid kyoo" we' Lapi: ri yu" wa shid' re" nghoid go" la". Nghoidbye nghoid loug we' Lapi: tho' moo je gyi: su: ri yu" wa shid' re" nghoid bye. 27Jhoem: mougsoug" moo" tid zigi - Re" da" khyoo: ri nyheing wa shid' re" Nga" lagyoo: ri re" da" shid' moo nhang: kaid wa ga: Mangsoo tid to. Yohan gi hau: lagyoo: phoo nyang: nghoid bye. 28Myiyi: mo khu: lo da" byu dangain"- Yohan tho' moo je gyi: zigi dayug we' aboo loo ein: ngoo nanu" ri tid. Nghoidloug we' Mangsoo Mangsoo mungdain: moo gye" nge thang su: gi Yohan tho' moo je gyi: ga: tid kyo.
29Kheing" khyu: zoo: mo, yo" dage" byu phung: moo" yi gi Yesu da" mungdang: ri shaug" gyoo: lang" Mangso da" deingmain" khyoo: ri coung" nghei byid: boem ago". Khasu" wim gari nyangnu" gi Yohan jang" mo Babtisma ri kham: yu mo, nghoid yoomo nghoid bye. 30Nghoidloug we' Pharishe yo" tarha" sara: yi gi nyang: nya: da" shid' re" Mangsoo byid: to" da" soin nyheing adi ato' ri phyo pyam mo nghoid yoomo Yohan jang" mo babtisma ri akham: yu boem nghoid ago".
31Yesu gi He: pyaid mo, byu yi ri ce: noem dangtu' yo" tu, wa lha". nyangnu" gi khate" mo, yo" du go" nyid boem lha". 32Nyangnu" gi kid" vang" khoug: moo zhoung: jo, lho: ngoonu" gi gye" pyoo: sho' moid baid myheing nghoid loug we' nanu" gi ato' ka, boem. Ngoonu" gi ngau kyoo" nghoid loug we'-nanu" gi abo ngoug- ga: wigi nyang: cang" nyang: yoid nyhoo: go" nyid da- zooshang: mi" yo" dadu nyid. 33Khasu" wim gari Babtisma sara: Yohan gi zoo: noem ri we' azoo:- zabyid yhid ri we' ashug loo: re" ri nanu" gi he: yug gi yu vang su: nghoid ga: tid ago". 34Byu da" nya: zoo: gi zo: lho: shug lho: ri" lang" yen gi nanu" gi yu" ge' he: yug gi zo: lid shug lid su: nghoid ga: kheing" khyu: zo: mo, yo"- Phung: thu' mo, ri bidnoem noem su: nghoid ga: tid ago". 35Nghoidloug we' Mangso da" nyain: phajhi" ri kham: yu mo, dangain" gi hau: nyain phajhi" gi deingmain" da" khyoo: ri toin" shid nyid ga: tid.
Pharishe" Simun Da" Yhoem: Moo Yesu Loung" Jo Uri
36Pharishe" dayug gi Yesu ri nyang: yo" dage" myen" xoin: zo: shang ga: re" lhoung. Yesu gi pharishe" yhoem: moo vang yhe: lho: zo: zhoung: jo. 37Hau: da" voo moo yooboo shoid da" myiyi: dayug nyid. Nyang: gi pharishe yhoem: moo Aseing: myen" xoin: zo: nyid zi si' lang" nam, pyo: da" xu: byeung" bo da" juang: daloem: ri ci: re" lho: 38Yesu da" nung thang khyid: yang: moo re" ngau nyid. Nya: da" ngoug byid gi Yesu da" khyid: moo gyo" nyid lang" nya: xam: wigi soid pyam byid. Hau: lho: hau: myiyi: gi Yesu da" khyid: moo boobug boug lho: nam, pyo: xu: joid byid: nyid. 39Yesu ri khe: da" Pharishe phoo gi myiyi: houg: su" koid: ziri myang lang" He: yug gi Lapi: nghoid rigi lho: nya: khyid: moo zei: da" myiyi: gi hang" nghoid zi we' ce: noem yoobo shoid su: nghoid zi we' si' wam: bye ga: myid nyid.
40Hau: uri Yesu gi hau yug ri «Simun we"- nang ri ngoo tid wa zi daja: bo» ga: tid.
Simun gi «sara: we" tid we'» ga: tid.
41Yesu tid zigi «ngei jhid" zo: su: dayug bo- ngei wim: shoo: kyab- dayug gi wim: xi: kyab jhen: dab. 42Nya: eig yug gi jhen: ayo" xab loo: yoomo jhen: seing: gi hau: eig yug goin" da" jhen: ri khyoid pyam byid: bye. Hau: eig yug mo kha: yug gi jhen: seing: ri je jheddab wa lha"» ga: myid:.
43Simun gi «ngei je myo: khyoid pyam byid: su gi je jheddab wa» ga: tid.
Yesu gi «nang myid soin khyoo: gi jo» ga: tid. 44Hau: thang: ri myiyi: myhi, shoid khyoo: lheing: lo" lho: Simun ri «Nang he: myiyi: ri myang yu" la". ngoo gi re" da" yhoem: moo vang lo ri nang gi khyid: cid" gyid abyid. Nghoidloug we' nyang: gi nya: ngoug byid' yo' nga" khyid: cid" byid: lho: xam: yo' soid byid: bye. 45Nang gi ngoori- boobug we' abug- he: myiyi: gi ngoo he: yhoem: moo vang lo u" mo nga" khyid: moo beung abyid. Boobug boug nyid. 46Nang gi nga" vhuloem moo vhu" xu: ajoid byid. Nyang: gi nga" khyid: moo nam, pyo: xu: joid byid: bye. Houg: yoomo nang ri ngoo tid zigi he: myiyi: gi yooboo myoo" sho' mo loid loo" bye. 47Houg: su" yooboo mo loid lo" zigi Nya: da" gyi: thang jheddab nheigloem: gi sagse: kham: nyid. Yooboo dajhi' za: te: loid loo" su: gi dajhi' date: se' jheddab» ga: tid.
48Hau: thang: ri Yesu gi myiyi: ri «Re" yooboo khyoid pyam byid: bye» ga: tid.
49Yesu yo" dage" myen" xoin: zo: nyid mo, gi «Yooboo ri lang" yo" khyoid pyam byid: da" he: yug gi hang" nghoid lha"» ga: nyang: cang" nyang: myid go" nyid boem.
50Nghoidloug we' Yesu gi hau: myiyi: ri «Re" da" loem" jeing" khyoo: gi nang ri khyoid yu bye. Nheugloem: pyoo" pyoo: za: daloo" re'» ga: tid kaid.
Currently Selected:
LUKA 7: LCL
Highlight
Share
Copy
Want to have your highlights saved across all your devices? Sign up or sign in
Lacid Bible © Bible Society of Myanmar, 2009.
