LUKA 2
2
Aseing Yesu Khu: Lo Da" Khyoo:
(Mat 1:18-25)
1Hau: ayo, moo Roma da" mung" goin" jang" mo- Mung" byu yi myeing kaid wa da" shid' re" khokham Agustu gi amyeing" khyo' kaid bye. 2Hau: mung" byu yi myeing kaid da" zigi Suri mung" moo Kureni Mung" zoug: koid: nyid uri xang: shed" koid: da" zhayen" nghoid. 3Byu dangain" mo, gi zhayen" kaid wa shid' re" nyang: nya: mung" khyoo: zeing: lo" boem.
4-5Yoseb we nyang: loxo' wa ga: dang: myed: to" da" Mari yo" dage" Galile mung" Nazared voogung mo wigi Yuda mung" Bedlehem ga: da" David khokham" da" voogung khyoo: yhe: lo" ago". Mari gi zoo: khu: wa jen" jen" nghoid bye. Yoseb gi David khokham" da" nya: myid: nya: zoo: nghoid yoomo Bedlehem voogung khyoo: yhe: lo" zi nghoid. 6Bedlehem moo nyid da" uri Mari gi zoo: khu: wa ayo, ju" yoomo Zoo: shid" yuggi zoo: ri khu: kaid bye. 7Being" dab moo nyangnu" shid' re" joyoo aboo loo yoomo zoonu" ri boug: bang" yo" thoeb lho: Nu: zo: thung" lhang" moo lheing: to.
Yang Zung" Mo, Yo" Mau: Lagyoo: Yi
8Hau: mung" ayam aqei: moo yang zung" mo, dayham" nyid ago"- nyangnu" gi myen" ayo, moo dain" dam moo yang zung" nyid ago". 9Hau: uri Mougkhung: mo Mangso da" lagyoo: gi yang zung" mo, shid' moo re" thu' yab lang" hau: ayam aqei: dangain" doug bang lo wigi nyangnu" gi gye" gyoug dain nyid boem bye. 10Mouglagyoo: gi agyug goo"- ngoo gi byu dangain" mo, shid' re" gye" gau yi ge da" lu dang: ri nanu" jang" moo voin ri" bye. 11David da" voogung moo Aseing: Khristu ga: da" khyoid yu Aseing: gi Nanu" shid' re akhid" nyid" khu: loo bye. 12Noug" nu" dayug gi boug: bang" yo" thoeb lho: nu: zo: thung" lhang" moo lheng: to" zi nanu" myang goo" wa. He: da" khyoo: ri shau" myang lang" zoonu" nghoid khyoo: ri si' goo" wa" ga: tid.
13Hau: da" Mauglagyo: nam, moo dalheing dam- Mougkhung: lagyoo: yi ajoem ayoo thu' myhang re" boem lho:
14Mougkhung: moug: di moo Mangsoo gi myonhoo: phung" yoeb bo nyid baja"-
Myidjang: tho' moo we' nyang: vho: ngei da" byu yi moo myen, jham" ngei pyo: khyoo: gi dajo, jo, baja" o"- ga: Mangso da" myeing khyang" ri coung" nghei boem ago".
15Mouglagyoo: yi mougkhung: khyoo: doem lo" byug boem thang: ri yang zung" mo, gi ngoonu" gi Bedlehem voogung khyoo: yhe: yu" boem shang Ngoonu" ri Aseing: re" tid kyo" khyoo: ri yhe: yu" yu" boem shang Ga: nyang: cang" nyang: tid go" lho: Bedlehem voogung khyoo: myab myab yhe: lo" boem.
16Nyangnu" gi Mari yo" Yoseb ri we' nu: zo: thung" lhang" moo lheing: to" da" zoonu" ri we' yhe: myang boem. 17Zoonu" ri nyang: bang: shau" myang lang" gi zoonu" yo" sen: da" khyoo: nyangnu" myang yu" ziyo' shau" gyo: da" khyoo: ri tid kyo lo". 18Yang zung" mo, tid kyo" da" khyoo: ri shau" gyoo: mo, dangain" gi gye" gyo: mau" nyid boem. 19Nghoidloug we' Mari koem gi hau: khyoo: dangain" ziri gyo: xoem" yu lho: myed soin: yu" nyid. 20Yang zung" mo, koem gi Mouglagyoo: yi toin" shid' ziyo' dakhyoo" ti"- shau" gyo: shau" myang yoomo Mangso da" myonhoo: phung: yoeb ri coung" nghei myed: lho: doem lo" ago".
Yesu Ri Myeing Myheing Byid: Khyoo:
21Zoonu" gi shed' nyid" ju" bye: yoomo a thang: yham" da" khyoo: kham: yu wa shid' re" ayo, ju" lang" Nyang: ri Yesu ga: myeing myheing byid: ago". He: da" myeing gi zoonu" gung lhang" alei loo shi" ri Mouglagyoo: myheing nhang: da" myeing nghoid bye.
Yesu Ri No Ku" Yhoem: Moo" Moo Ab Byid: Da" Khyoo:
22Moshe da" toung: to" da" tarha" moo shed to" ziyo' dakhyoo" ti"- nya: myhi' yo' nya: pho eig yug gi young" shang: khyoo: koid wa shid' re" ayo, ju" bye: yoomo zoonu" ri Yerusalem voo khyoo: shu" yhe: lho: Mangsoo ri ab byid: ago". 23Zoo: shid" yug khang" moo" ri Mangsoo ri ab byid: ca" ga: wigi we' 24Pheing" kyoug" eig du: anghoid lang" gi jid u: nu" eig du: nghoid loug- xoin" to' byid: ca" ga: ziyo' dakhyoo"- Mangso da" mungdang: moo tid too" yoomo xoin" ri we to' byid: bye.
25Hau: uri Yerusalem voo moo Simun ga: da: byu dayug nyid. Hau: yug gi Mangso da" tarha" ri cang- loem" jeing" da" deung main" su: dayug nghoid. 26Gyeungshang: da" Venyi: gi nyang: yo" dage" nyid. Nyang: gi Mangso dang: theing to" da" Meshia ri ashau" noku ku" gi ashid: wa" ga: gyeungshang: da" Venyi: khyo" wigi ayoeb abang ri yo" kham: yu nyid su: nghoid. 27Nyang: gi Venyi: wigi poin" kyeing" zi shau" yoomo No' ku" yhoem: moo" khyoo: vang yhe. Toung: to" da" tarha" yo' dakhyoo" ti"- zei: wa da" moozoo" ri zei: wa shid' re" nya: myhi' tang: nya: phoo gi No' ku" yhoem: moo" khyoo: shu" yhe: lo" da" uri 28Simun gi zoonu" ri lhoem: vu yu lho: Mangso da" myonhoo: ngilang Jeju" ri coung" nghei zoore" tid da" zigi
29Aseing: Mangso da" dang: theing khoin" gi joeb byeung" loo bye
Yoomo- Aseing: da" join phoo ri akhid" loo" nhang: kaid re" o"-
30Tungbau Byumyu" yi ri Aseing: vho: da" khyoo: yo" toin" shid wa yoeb bang bui" nhang: wa ziyo'-
31Aseing: da" Byu phung: nghoid da" Israela gi myonhoo: phung" yoeb doug bang thu' loo wa shid' re" Byumyu" bain sho' da" shid' khoin" moo
32Aseing: soin jen" to" da" khyoid yu jeju" ri ngoo gi myang nyang: myang kho" bye- ga:
coung" byid.
33Nya: myhi' yo' nya: phoo gi zoonu" yo" sen: lho: wigi Simun tid da" dang: ri shaug" gyoo: lang" gye" gyo: mau" nyid ago". 34Simun gi nyangnu" ri mainkaid byid: lho: Israela byumyu" moo byo, yoin" joem: thang loo" mo, yo' khyoid yu shau" mo, po" thu' loo wa shid' re" He: zoonu" ri Mangsoo khyen: nyheing too" bye. Nyang: gi Mangso da" thang" cab alhoo: nghoid wigi nyang: ri byu myoo" sho' mo, ngeig se: yooboo foin: khyo" nyangnu" nya: da" nheigloem: mo myid khyoo: ri thoid shug goo" wa. 35Re" da" nheigloem: seing" khyab gi sham: coin" thau" yhangti" kham: zo: wa" ga: nya: myhi' Mari ri tid.
36-37Hau: tho' moo gootu: Ashe byumyu"- Phanuela myiyi: zoo:- Anna: ga: da" myiyi: lapi: myhi,- dayug nyid. Nyang: gi apyaid gye sheing: bye: su: nghoid. Nge yo, mo deung khu: vang lho: yhoem: seing: phoo yo" nyhed zain date: zoem" nyid. Hau: thang: ri apyaid' shed' xe: myid: zain ju" sho' cougmoo" mo" nyid. Nyang: gi Mangsoo ri Noku akyu" mho' nyid su: nghoid. nyid" myen" anoo: ayab- Mangso moo" ri zei: pyo: zoore"- No' ku" yhoem: moo" mo athu' loo" loo. 38Zoonu" ri ab nung" byid: da" ayo, moo hau: myiyi: gi ju" re" lho: Mangso da" jeju" ri coung" nghei. Hau: thang: ri Yerusalem voo ri khyoid yu wa ga: nheig byu nyid da" byu dangain" mo, ri zoonu" da" khyoo: ri tid pang kyo.
Nazared Voo Khyoo: Doem Lo"
39Nya: myhi' yo' nya: phoo gi Mangso da" tarha" dangain" ziri bain zei: kho' lho: Galile mung" mo Nazared voo ga: da" nyang: nya: mung" khyoo: doem lo" boem. 40Zoonu" gi gyi: sheung: yang" zain: loo bye. Nyan phajhi" we je se' lo- Mangso da" jeju" we' nya: tho' moo dajo, jo.
Kyu" Mho Yhoem: Moo" Moo Zooshang: Yesu Tarha" Yhe: kho"
41Nya: myhi' yo' nya: phoo gi zain khang" moo" lhed: kaid pui" loem wa shid' re" Yerusalem voo khyoo: lhoung yhe: ago". 42Zooshang: Yesu gi apyaid daxe: eig zain bo uri we' Yerusalem voo khyoo: yhe: lo" ago". 43Hau: da" pui" bain lang" yhoem: khyoo: doem lo" ago". Hau: uri zooshang: Yesu gi Yerusalem voo moo nyid gyoo" kho" zi nya: yhed yo' nya: ba" gi azheing: si. 44Pui" yhi: mo, agyoo: moo boo wam: bye ga: zheing: jho:- danyid" so" gyoem thang: ri bidnoem byen cang" yi phung: moo sho: yu" ri we' amyang loo. 45Sho: yu" ri amyang lang" gi Yoseb yo" Mari eig yug gi Yerusalem voo moo nyang: ri yhe: doem sho. Soem" nyid" ein: nyid" ri zooshang: ri Mangso yhoem" khoug: moo yhe: myang. 46Nyang: gi Yuda sara: moo" yi yo" dage" zhoung: jo, lho: nyangnu" da" tarha" mungdang: ri tam" gyo: wigi nya: nu" yo' doem myed: phoid: go" nyid lang. 47Zooshang: Yesu da" dang: ri shaug" gyoo: mo gi nyang: myed: da" dang: yo" doem phoid: da" dang: khoin" yoomo gye" gyo: mau" nyid boem. 48Yoseb yo" Mari eig yug we nyang: ri myang lang" gye" mau" ago". Hau: thang: ri nya: yhed gi Nga" zoo: we"- nang ciwim wigi nga" tang: ri hid: su" koid: lha". Re" ba" yo" ngoo gi nang ri gye" gung youg yau wigi cang sho: yen" ga: tid.
49Zooshang: Yesu gi yhed yo" ba" ciwim wigi ngoori cang sho: yen" go" lha". Ngoo gi pho da" yhoem: moo nyid wa ziri asi goo" rhe" ga: doem tid. 50Nyang: tang: gi hau: dang: ri ase' gyoo.
51Hau: thang: ri zooshang: Yesu gi nya: yhed yo' nya: ba" tang: jang" moo cang lo" lho: Nazared voo moo ju" loo" lang" gi myhi, pho tang: da" dang: ri tam" gyo: nyid. Nya: myhi' Mari koem gi hid: su" bue" da" khyoo: dangain" ziri nya: nheigloem: moo xoem" to. 52Zooshang: Yesu gi Gung shoo" gyi: sheung: lo zoore"- se' da" phajhi" myo: loung: lo lho: Mangso shid' khoin" moo we' Byu da" shid' khoin" moo we' myonhoo: rua: loo bye.
Currently Selected:
LUKA 2: LCL
Highlight
Share
Copy
Want to have your highlights saved across all your devices? Sign up or sign in
Lacid Bible © Bible Society of Myanmar, 2009.
