LUKA 17
17
Yooboo
(Mat 18:6-7,21-22; Mar 9:42)
1Yesu nya: cangzoo: yi ri tid zigi Byu ri yooboo bui" nhang: wa khyoo: gi deing deing jo. Nghoidloug we' byu ri yooboo koid: nhang: su: gi deing deing joem: loo" wa. 2Zooshang: dayug yug ri yooboo koid: nhang: su: gi nya: da" leingzeing: moo gyi: da" lug lheing: gyab tei" tab lho: no, thang da" Panglai gyid thoem" khoug: khyoo:- khyo pyam wa zi nya: shid' re" je ge nyid. 3Houg: yoomo zed" lhid lho: zei: so" nyid ge'.
‹‹Re" mang: nhung" nang ri shoid nghoid rigi nyang: ri jhau" poin" we'. Nyang: nheigloem: thid lo nghoid rigi yooboo khyoid pyam byid: we'.» 4Danyid" khoug: moo za: nyhed lheing: ju" sho' nang ri shoid lho: nyhed lheing: ju" sho' re" jang" moo re" wigi ngoo nheigloem: thid bye: ga: tid nghoid ri nang gi nya: da" yooboo ri khyoid pyam byid: ca.
Loem" Jeing" Khyoo:
5Lagyoo: yi gi Aseing: ri ngoonu" da" loem" jeing" khyoo: ri myo: loug loo nhang: we' ga: re" tid boem.
6Aseing: phoug: tid zigi nanu" moo loem" jeing" nheigloem: nghang" shi" cab yi koo: bo nghoid rigi he: da" tung sang" seig gam ri agyi: mo jhoid" boin" lo" lho: Panglai gyid thoem" thi" moo lo" youg jo, we' ein: tid ri hau: da" tung: sang" seig gam gi nanu" tid ziyo' dakhyoo" ti" tam" gyoo: zi nghoid.
Dei Zoo: yi Da" Yoovoin
7Nanu" moo kha: yug gi yhoem seing: da" yoo thung" phug su:- anghoid lang" yang zung" su: doem lo da" uri myen" xoin: zo: wa da" shid' re" myab myab lo zhung: we' ein: tid yu" go" la". 8Hang" tid zi anghoid. Nga" da" shid' re" myen" xoin: nyheing ge' ngoo zo: shug nyid uri phyid" cu" cu" ci: lho: ngoori dei zhoo" ge'. Hau: zi bain lho: ri she- nanu" zo: ge' ein: wa anghoid la". 9Dei zoo: gi nya: Aseing: dei nhang: ziyo' dakhyoo ti"- dei byid: yoomo nya: Aseing: ri jeju" boin: yu" la". 10Houg: yo' dakhyoo" ti"- nanu" nghoid loug we' nyang: nyang: ri zei: nhang: da" moo" dangain" ri bain zei: da" uri ngoo nu" gi da: byi dei zoo: yi date: nghoid- ngoonu" zei: eung: da" moo" yoovoin ri zei: mo, date: nghoid ein: tid ge'.
Yesu Byu Daxi: Yug Ri: Ge Kaid Khyoo:
11Yesu gi Samari yo" Galile meing: moug kyoo" khyo" Yerusalem voogung khyoo: yhe: lo. 12Nyang: voo davoo moo vang lo" da" uri manggam noo dab mo daxi: yug yo" shau" go. Nyangnu" gi vi" vi: moo yab jo, boem lho: 13Yesu Aseing: we"- ngoonu" ri nheig khyeig shi" we' o" ga: lhoem: yoid mho' boem.
14Houg: bang: ri myang lang" Yesu tid zigi nanu" lo" lho: nanu" da" gungdoem: ri khainjung agyi yi ri lo" toin" shid ge" ga: tid. Nyangnu" gi khyoo: moo lo" nyid boem shi" uri noo ge lo" zi shau" boem bye. 15Nyangnu" mo dayug gi nya: noo ge lo" ziri si' lang" doem tau" re" Mangsoo: ri thui: zeing yo" wigi nyho: coung. 16Yesu da" khyid: yang: moo re" goeb pid lho: Aseing: ri jeju" so" nyid. Hau: yug gi Samari byumyu" nghoid. 17Yesu tid zigi Byu daxi: yug manggam noo ge lo" boem bye. Gootu: goug: yug gi kha: khyoo: lo? 18Ciwim wigi tungbau byu mo Mangsoo ri jeju" boin: wa shid' re" dayug kyeing" doem tau" re lha". 19Houg: lang" Yesu hau: yug ri tid zi gi nang to' lho: loo" we'. Re" da" loem" jeing" khyoo: gi re" da" noo ri ge loo" nhang: bye.
Ju" Ri" Wa Da" Mungdain:
(Mat 24:23-28,37-41)
20Pharishe dayham" gi Mangso da" mungdain: gi kha: u" mo ju" ri" wa lha"» ga: Yesu ri zheing: myid: boem. Houg: lang" Yesu tid zigi «Mangso da" mungdain: ju" ri" wa zigi shau" yu" myang khyo" ju" ri" zi anghoid. 21Yu" ge' Mangso da" mungdain: gi he: jang" moo jo,- thei: jang" moo jo, ein: wigi hang" ayo" tid! Khasu" wim gari Mangso da" mungdain: gi nanu" da" akhoug: moo ju" nyid bye: ga: tid.»
22Yesu nya: cangzoo: yi ri tid zigi Nanu" myang nau da" Byu nya: zoo: bidnyid gi danyid" ju" loo wa. Nghoidloug we' nanu" gi hau: ziri shau" myang zi anghoid. 23Subi" gi Byu nya: zoo: ri yu" ge' he: joyoo moo nyid yu" ge" fo: jo, yoomoo nyid ga: tid goo" nghoid loug we' acang sho: yen" goo. 24Lhab myeig lo" da" uri lhab bang gi moug yam dashoid mo zi dashoid khyoo: ju" sho' mougkhung: ri pang kaid ziyo' dakhyoo ti" Byu da" nya: zoo: bidnyid moo we' houg: su" bue" loo wa zi nghoid. 25Nghoidloug we' He: pyaid mo byu yi da" keing" pyam ziyo'- jamjau zi xang: shid" shau" wa zi nghoid. 26Noa da" pyaid moo bue" lo yhangti"- Byu nya: zoo: da" bidnyid moo we' houg: su" bue" loo wa. 27Noa gyid sangphoo khoug: khyoo: vang loo" lang" tigyid foid loo lho: byu dangain" shid: doem: lo" da" bidnyid moo ju" sho'- Byu xangsu: yi gi zo: pyoo: shug pyoo: zoore"- myi: yu myi: byid: koid: nyid ago". 28Hau: da" ayo, gi loid" da" ayo, yo" dakhyoo ti"- xangsu: byu yi gi zo: pyoo: shug pyoo:- qei goo" ung" go"- shoo" zo: shoo" shug yhoem: koid: voolid zoore" nyid ago" da. 29Sodom voo mo loid phang: thu' lo" da" bidnyid moo mougkhung: mo fang myi: mougvo lo wigi byu dangain" ri said toem" pyam bye. 30He: khyo" wigi Byu nya: zoo: da" bidnyid moo khasu" bue" loo wa ziri toin" shid nyid zi nghoid.
31Hau: da" bidnyid moo yhoemkhung: tho' moo nyid su: gi yhoem: khoug: mo nya: ziyoo soidgain lo" yu wa shid' re" agyoo" goo. Houg: yo' dakhyoo" ti"- yoothung" dain" moo yhe: nyid su: we' yhoem: khyoo: adoem yo" tau" loo" wa. 32Loid" da" yhoem: seing: myhi' ri myid boin: ge'. 33Hang" we' nyang: nya: da" kang: ri khyoid yu noug: su: gi kangso' soem" wa. Nyang nya: da" kang: ri soem" loo" nhang su" koem gi Kangso' ri yo" yu wa. 34Nanu" ri ngoo tid zigi hau: myen, moo yhoeb' joyoo daloem: moo yhoeb' jo, da" byu eig yug mo dayug ri shu" loo" shau" lho: dayug gi deing jo, khoo: wa. 35Lug lheing: gyeig: nyid da" myiyi: eig yug mo we' dayug gi shu" loo" shau" lho: dayug gi deing jo, khoo: wa. 36Yoothung" moo nyid da" byu eig yug mo dayug gi shu" loo" shau" lho: dayug gi deing jo, khoo: wa ga: tid.
37Nya: cangzoo: yi gi nyang: ri myed: Aseing: we" kha: joyoo moo he: da" moozoo" bue" loo wa lha".
Yesu phoug tid zigi manggung jo, da" joyoo moo join yu joem zeing: foem boem wa".
Currently Selected:
LUKA 17: LCL
Highlight
Share
Copy
Want to have your highlights saved across all your devices? Sign up or sign in
Lacid Bible © Bible Society of Myanmar, 2009.
