APOEM AYANG: 23
23
Sara Shid: lho: Loeb Boug Daloem: ri Abraham Qei Khyoo:
1Sara gi dasho: eig xe: nyhed zain mang: sho' nyid khare". 2Nyang: gi Khanan mung" Hebron joyoo moo shid: wigi Abraham gi gye" koug bye:.
3Nyang: gi nya: yhoem: seing: myhi' da" mang jo, da" joyoo moo nyang:- Heti byumyu" yi jhang khyoo: yhe: lho: 4#Heb 11:9,13; Lgy 7:16. «Ngoo gi nanu" da" khoug: moo nyid nyid da" tungbau dayug nghoid. Nga" yhoem: seing: myhi' ri myhoeb wa da" joyoo dacu' ngoo ri oung" byid: goo" la» ga: yhe: tid.
5Nyangnu" phug gi 6«Nheigboo phoo we"- gyoo: we' ngoonu" gi nang ri myhang: thang khyo" yu" nyid. Ngoonu" mo ge thang da" loeb yoo moo re" yhoem: seing: myhi' ri myhoeb we'. Nang- nyang: ri myhoeb wa loeb yoo nang ri byid: wa zigi ngoonu" hang" we' myid veing" wa bye:» ga: tid boem.
7Houg: lang" Abraham gi nyangnu" da" shidkhoin" moo goeb pid lho: 8«Nga" yhoem: seing: myhi' ri he: joyoo moo ngoo ri myhoeb nhang: nau nghoid rigi jeju" khyo" Zohara da" nya: zoo: Ephron ri 9nya: khyam: thang: koo: moo jo, da" Makhpela lug khyung: ngoo ri ung" byid: wa shid re" mho' nau. Hau: ziri loeb yoo daloem: khyo" ngoo yo" seing: wa shid re" nanu" dangain" bang: da" shidkhoin" moo moin: yi" da" aphoug" yo' ngoo ri ung" byid: sho' nyang: mo mho' byid: goo" la» ga: tid.
10Voomoo" khoem" duang: zoebphung: jang: mo Heti byumyu" yi da" akhoug: moo Ephron nyang: nyang: we' bo zhung: jo,. Ephron gi houg: moo tam" gyo: nyid mo, yugkhang" moo" shid moo 11«Nheigboo phoo we" gyoo: we'. Houg: moo jo, da" lug khung: yo' dakhyam: goin" dangain" ri ngoo gi nang ri byid: wa. Re" yhoem: seing: myhi' ri yo" myhoeb shoung: wa shid re" hid: moo nyid da" nga" byumyu" yi dangain" shidkhoin" moo hau: joyoo ri ngoo nang ri byid: wa» ga: tid.
12Nghoid loug Abraham gi Heti byumyu" yi da" shidkhoin" moo goeb pid lho: 13dangain" bang: shoug" gyoo: sho' Ephron ri «Ngoo nang ri mho' ba- jeju" mo gyoo: byid: we'. Ngoo gi khyam: goin" ri qei yu wa. Ngoo byid: da" aphoug" ri lhoem: yu we' nga" yhoem: seing: myhi' ri ngoo hau: jang" moo myhoeb shoung: wa bye:» ga: tid.
14Ephron phug gi 15«Nheigboo phoo we"- ngei gyeing" myid: shoo: pyi" kyeing" za: damoin: da" myidjang gi nyha" tang: da" agyoo: moo citid goo" cang bo la". Re" yhoem: seing: myhi' ri houg: moo danyhoeb we'» ga: tid. 16Abraham gi myid veing" ziyo' mung" byu yi da" shidkhoin" moo Ephron sang: da" myhoo'- ngei gyeing" myid: sho: pyi" ri phaga: byu yi lhoung ci: da" main" jang yo' leig byid: bye:.
17He: zigi Mamre da" bidthu shoid- Makhpela mo Ephron seing: da" myidjang ri Abraham cisu" seing: yu lo" khyoo: nghoid. Houg: mo khyam: myidjang- houg: mo lug khyung: yo' hau: khyam: thang: cang yug jo, da" seiggam dangain" ju" sho' bo. 18Hau: ziri hau: byu phung: moo nyid da" Heti byumyu" yi dangain" bang: da" shidkhoin" moo Abraham seing: da" joyoo khyo" wigi laxoem" sagse: koid too" bye:.
19Hau: thang: Abraham gi Khanan mung" mo hau: lug khyung: moo nya: yhoem: seing: myhi' Sara ri myhoeb shoung: bye:. 20Houg: yoomo Heti byumyu" yi seing: da" myidjang yo' houg: mo lug khyung: gi Abraham seing: da" loeb boug mougmyid bue" loo bye:.
Currently Selected:
APOEM AYANG: 23: LCL
Highlight
Share
Copy
Want to have your highlights saved across all your devices? Sign up or sign in
Lacid Bible © Bible Society of Myanmar, 2009.
