APOEM AYANG: 15

Abram yo' To" da" Mangsoo Dang: Thang" Cab

1Hau: thang: Abram gi pang shug yoeb myang daja: myang lho: Aseing khyo" nyang: ri tid da" dang: ri shau" gyo: kaid zigi «Abram we" agyug lhe". Ngoo gi nang ri shid: gyoin mo goem loem byid: lho: ngi: shab jhungshug zeing nang ri byid: wa» ga: tid.

2Nghoid loug we' Abram gi «Yoem: so' bo da" Aseing khayhi' gyeing" ge da" jhungshug ngoo ri byid: loug akhid" ju" sho' ngoo zooshang: ayoo" shi"- nga" mid gi Damasku mo Eliaza ga: su: danghoid nyid. 3Nang ngoo ri zooshang: abyid: wigi nga" da" join yi mo dayug su: gi nga" jonu" ziyoo ri mid seing: seing: wa nghoid» ga: tid.

4Hau: thang: Aseing doem tid da" «He: join Eliaza gi re" mid jonu" ri seing: wa anghoid. Nang mo khu: lo zooshang: nyang: daseing: wa» ga: tid thui: ri shau" gyo: kaid. 5#Rom 4:18; Heb 11:12. Aseing gi nyang: ri tunggung khyoo: shu" thu yu lho: «Mougkhung: khyoo: nghang yu" lho: kyi: joem ri nghab yu" we'. Nang gi houg: yo' dakhyoo" ti" myo: da" amyed ashen myoo" sho' yoo" wa nghoid» ga: tid.

6 # Rom 4:3; Gal 3:6; Yak 2:23. Abram gi Aseing ri loem khoug: wigi Aseing gi Abram da" loem khoug: yoomo nyang: ri lhoem: kham: yu lho: nheugshid: nheugdeug abye:.

7Hau: thang: Aseing khyo" nyang: ri «Ngoo gi Babelon meing Ura voo mo nang ri shu" thu lo lho: he: moug: ri seing: wa shid re" nang ri byid: su: Aseing nghoid» ga: tid.

8Nghoid loug Abram gi «Yoem: so' bo da" Aseing we"- he: moug: gi nga" da" zi nghoid ga: ziri ngoo khasu" yo" si' wa lha"» ga: myid: bye:.

9 Aseing gi «Soem" zain bo da" nujung zeing dadu:- soem" zain bo da" coidbaid dadu:- soem" zain bo da" yang dadu:-pheing" kyoug" dadu: yo' jid: u: dadu: nga" shid re" ci: ri" we'» ga: tid. 10Abram gi gougnyhoug joem ri Mangso jhang ci: re" lho: eig khang" khang" jab kho' wigi dashoid dakhang" eig jen jung to". Nghoid loug we' ngho' eig du: rigi ajab kho' loo jung to". 11Langda joem gi hau: shoo" mang joem tho' khyoo: dang: gyo" lo nghoid loug Abram ri hau: joem ri lhoem: khaid pyam.

12 # Yob 4:13,14. Bidvang lo" uri Abram ri atho' tid yhoeb nau ziyo' gyoug asu' nain" asu' bue" lo. 13#Thu 1:1-14; Lgy 7:6. Aseing nyang: ri «Re" da" amyed ashen yigi tungbau moug: moo being" voo yhe: bue" boem wa. Nyangnu" gi houg: moo join bue" lho: dayam dayoo: shen" yhen zi zain loem: myid: shoo: shoug" wa. 14#Thu 12:40,41; Lgy 7:7. Nghoid loug we' nyangnu" ri join lhoem: koid da" byumyu" yiri ngoo gi shen" yhen wa nghoid lho: nyangnu" houg: mo doem thu lo uri nyangnu" jonu" myoo" sho' ci: thu lo boem wa nghoid. 15Nang nyang: gi phoug" phyid" yi jhang yo" ju" lo wigi myenjham" za: shid: ziyo' myhoeb shoung: zi shoug" wa nghoid. 16Byuxeig myid: xeig lang" re" amyed ashen yi hid: moo doem tau" lo wigi he: mung" moo lo nyid boem wa. Ciwim gari hau: ayo, ri Amori byumyu" yigi gye" akhyeing" yoomo nyangnu" ri yooboo dam byid: khaid thu pyam zi shoug" wa» ga: tid.

17Bidvang khare" lho: moug: coid bye: ri myikhoug" neing" da" myikhoem' yo' myiyham: myidoem nyeigdain tung" thu myang lo lho: shoo" khang" joem da" agyoo: khyo" lid: khare" byug. 18#Lgy 7:5.Hau: ayo, moo Aseing gi Abram yo' thang" cab dang: theing too" bye:. Nyang: gi «Ngoo gi re" da" amyed ashen yiri Egutu mung" mougkyoo" mo Uphrad gyid lang moo ju" sho' he: mougmyid dangain" byid: bye: khyoo: dang: soo" byid: bye:. 19Houg: moo Keni moug:- Kenizi moug:- Kadmoni moug:- 20Heti moug:- Perizi moug:- Repha moug: 21Amori moug:- Khanan moug:- Girgashi moug: yo' Yebusi moug: joem we' bo» ga: tid.

Currently Selected:

APOEM AYANG: 15: LCL

Highlight

Copy