THU' LO" MOUGSOUG" 9
9
Gougnyhoug Joem Shid: Khyoo:
1 Aseing gi Moshe ri «Khokham jhang yhe: wigi nang ri Hebre byumyu" yi da" Aseing Mangsoo gi ‹nga" byu yi ngoo ri yo" noku wa shid re" nyangnu" yhe: loo" wa akhang" byid: we'. 2Nyangnu" ri nhang: kaid wa nang doem ngeug he: pyam nghoid rigi 3Re" gougnyhoug nghoid da" myang:- loo zei:- gola-ug- nu:- yang yo' coidbaid phung: joem ri gyoug pho" yoem" gyoo" nhang: khyo" wigi nang ri ngoo yooboo dam byid: wa. 4Israela byumyu" yi da" gougnyhoug yo' Egutu byumyu" yi da" gougnyhoug yi agyoo: moo ngoo bang bang kho' too" wa zi nghoid wigi Israela byumyu" yi da" gougnyhoug gi shid: wa zi anghoid. 5Nab kyoo' ngoo Aseing he: moo" zoo" ri koid wa ayo, ri tu' to" ein: tid we'›» ga: tid.
6Thang: nyid" Aseing gi nyang: tid to" ziyo' dakhyoo" ti" koid bye: yoomo Egutu byumyu" yi da" gougnyhoug dangain" shid: bye:. Nghoid loug we' Israela byumyu" yi da" gougnyhoug joem dadu we' ashid: nghoid da:. 7Khokham gi bue" loo bye: ziri myid: yu" ri Israela byumyu" yi da" gougnyhoug dadu: we' ashid: ga: zi shoug" gyoo: bye:. Nghoid loug we' nyang: gi nheigloem: thain: wigi byumyu" yiri yhe: wa akhang" abyid: nghoid da:.
Byeung
8Hau: thang: Aseing gi Moshe yo' Arun ri «Myiyab cang" mo myiyab lo, dazhoeb zhoeb yu wigi Moshe gi hau: ziri khokham shidkhoin" lidmoo du" sain" kaid we'. 9Hau: zigi pheilhoug: yhang: ti" Egutu mung" goin" jhang khyoo: byo sain" lo" lho: mungdain: goin" mo byu yi yo' gougnyhoug joem adang moo byeung dam bue" loo wa» ga: tid. 10Houg lang nya: tang: myiyab dajhi zhoeb yu wigi khokham shidkhoin" moo yab jo, ago". Moshe hau: myiyab ri lid moo sain" kaid lang" hau: zigi byu yi yo' gougnyhoug joem da" adang moo byeung dam bue" nhang: da:. 11Fa" mo, we' gootu: Egutu byu yi yhang: ti" byeung myug yoomo Moshe shidkhoin" moo ayo" thu shug nghoid ago". 12Nghoid loug we' Aseing gi khokham ri nheigloem: thain: nhang: wigi Aseing tid ziyo' dakhyoo" ti" khokham gi Moshe yo' Arun da" dang: ri atam" gyoo: nghoid da:.
Leigvoo
13 Aseing gi Moshe ri «Nab kyoo' nab soin: no' khokham yo' yhe: shau" wigi nyang: ri ‹Hebre byumyu" yi da" Aseing Mangsoo gi nga" byu yi ngoo ri yo" noku baja" nyangnu" yhi: wa shid re" akhang" byid: we'. 14Mougmyid tho' moo ngoo yo' du zi hang" we' anyid ein: ziri nang si' wa shid re" akhid" lheing: gi re" gyizoug: yi yo' re" byu yi riza: yooboo dam byid: wa zi anghoid- nang nyang: riwe' ngoo yooboo dam byid: wa. 15Ngoo nga" lo, ri tu: yeing wigi nang yo' re" byu yiri noophyoo" yo' yooboo dam byid: nhang: rigi nanu" gi bain sho' byo, yoin" loo" goo" wa. 16Nghoid loug we' nga" phung" yoeb gi mougmyid gyab goin" jang" moo fu" nhang loo baja". Nga" yoem: so' nang ri ci: shug byid: wa ngoo gi nang ri dei nyid nhang: too" bye:. 17Houg: loug nang nheigloem: thain: nyid shi" wigi nga" byu yiri nhang: kaid wa shid re" ngeug pyam da:. 18Egutu mhoomyid: mo khanham we' ashau" gyoo: yu" da" gye" gyi: thang leigvoo nab kyoo' he: yo, ri ngoo voo nhang: wa. 19Akhid" amyeing" byid: wigi re" gougnyhoug joem yo' jang: pa: mo nang yo" da" gootu: dangain" ri zoem" khoug: moo koin" lhoung too" we'. Khau: nghi: joyoo ajo, nghi: moo: nyid da" byu yi yo' gougnyhoug joem adang moo leigvoo gyo" zang" wigi nyangnu" dangain" shid: wa zi nghoid» ga: tid. 20Khokham gyizoug: dayham" gi Aseing tid to" da" dang: yoomo gyoug wigi nyangnu" da" join joem yo' gougnyhoug joem ri zoem" khau khyoo: koin" shu" lo ago". 21Nghoid loug we' dayham" gi Aseing da" tid poin" dang: ri atam" gyoo: wigi nyangnu" da" join joem yo' gougnyhoug joem ri jang: pa: khyoo: nhang: kaid ago".
22Hau: thang: «Aseing gi Moshe ri Egutu mung" damung" goin" jang" moo nyid da" byu adang moo we' gougnyhoug adang moo we' yoo thung" mo shi" zoo: voo zoo: dangain" adang moo we' leigvoo khyo' baja" re" lo, tu: wigi mougkhung: khyoo: yeung too" we'» ga: tid da:. 23Houg: yoomo Moshe gi nya: lhamdung: ri mougkhung: khyoo: tu yeung too" yo' Aseing gi mougmyid moo mouggoem: goem:- mouglhab' myeig ziyo' leigvoo khyoo' nhang: bye:. 24Aseing gi bid thu bidvang moug lhab' myeig ziyo' dage" gye" gyi: da" leigvoo uglid ri nhang: kaid da:. Hau: zigi Egutu mung" moo mhoomyid: moo daleing: we' ashau" gyo: yu" da" thain: thang uglid zeing nghoid da:. 25Egutu damung" goin" mo jang: pa: moo nyid da" byu joem yo' gougnyhoug joem adang moo leigvoo wigi baid pyam da:. Coung" yoo mo seigzoo: voozoo: dangain" adang moo we' leigvoo baid khyau" wigi seiggam dangain" gyau: byug bye:. 26Israela byumyu" yi nyid da" Goshen mung" moo za: leigvoo akhyoo' nghoid da:.
27Khokham gi Moshe yo' Arun ri khe: lho: «Akhid" lheing: ngoo yooboo koid bye:. Aseing deungmain" nyid. Nga" byu yi yo' ngoo shoid bye:. 28Aseing jhang akyu" mho' byid: we'. Mouggoem: goem: ziyo' leigvoo khyo' zi he: gu: gi" bye:. Nanu" yhi: wa shid re" akhang" byid: bye: ein: ngoo dangsoo" byid:. Nanu" hid: moo khanham we' shoug" nyid loo: wa zi anghoid» ga: tid.
29Moshe gi nyang: ri «Ngoo gi voomoo" mo thu yhi: yo' nga" lo, ri tu: lho: Aseing jhang akyu" yhe: mho' wa. Houg: lang" mouggoem: goem: zi we' theung: wigi leigvoo we' gyoo" loo: wa zi anghoid. Houg: lang" Aseing gi he: mougmyid ri seing: nyid su: nghoid zi nanu" si' wa. 30Nghoid loug we' nang yo' re" gyizoug: yigi Mangsoo ri akhid" ju" sho' agyug shi" ein: ziri Ngoo se'» ga: tid.
31Jid: moo" yo' Yoono, yoin" pyam bye:. Ciwim gari yoono, gi myeung bye: ziyo' jid: moo" gi aboo" bo" loo" bye: zi nghoid. 32Nghoid loug we' sungsoo: gi myeung lid thang: ri bue" yoomo ayo" yoin" nghoid da:.
33Moshe gi khokham jang" mo thu wigi voomoo" yam khyoo: yhe: lho: nya: lo, ri tu: ziyo' Aseing jhang akyu" mho' bye:. Mouggoem: we' moug: we' theing: byug bye:. 34Bui" bye: ziri khokham myang lang" nyang: yooboo dalheing: doem koid bye:. Nyang: yo' nya: gyizoug: yigi shid mo yhang: ti" nheigloem: dathain: nyid ago". 35Aseing Moshe ri tid to" ziyo' dakhyoo" ti" Israela byumyu" yi yhi: wa akhang" abyid: nghoid ago".
Currently Selected:
THU' LO" MOUGSOUG" 9: LCL
Highlight
Share
Copy
Want to have your highlights saved across all your devices? Sign up or sign in
Lacid Bible © Bible Society of Myanmar, 2009.
