THU' LO" MOUGSOUG" 6
6
1Hau: thang: Aseing gi Moshe ri Akhid" khokham ri ngoo khasu" koid wa ein: ziri nang yo" myang wa. Nga" byu yiri thu lo" nhang: sho' nyang: ri nga" yoem: yo' khaid thu wa. Gyeing" nyang: nyangnu" ri nya: mungdain: mo koin" thu pyam zi shoug" wa shid re" nyang: ri ngoo nga" yoem: yo' khaid thu wa ga: tid bye:.
Mangsoo Moshe ri Khyen: Yu Khyoo:
2Mangsoo gi Moshe ri «Ngoo Aseing nghoid. 3Ngoo Abraham- Isag- Yaku bang: ri myhang: thang Mangsoo ein: da" myeing yo' thu shug nghoid loug nga" gyeung" shang: Aseing ein: da" myeing ri nyangnu" ri ngoo nyang: nyang: asi' nhang:. 4Nyangnu" tungbau yi yhang: ti" nyid nyid da" Khanan mung" ri byid: wa ein: da" dang: so" yo' dang: theing ri ngoo nyangnu" yo' koid too" bye:. 5Akhid" Egutu byumyu" yi jang" moo join bue" nyid da" Israela byumyu" yi da" kyi" khyeug ngau myeing" ri ngoo shau" gyo: ziyo' nga" dang: theing ri we' ngoo boin: soo" bye:. 6Houg: yoomo Israela byumyu" yiri tid kyoo" we'. ‹Ngoo Aseing nghoid. Ngoo nanu" ri Egutu byumyu" yi join mo khyoid yu wa. Ngoo nyangnu" adang moo gyoug pho" dam byid: wa shid re" nga" yoem: moo" bo lo, yoem: ri too" wa. Ngoo nanu" ri goem loem byid: wa. 7Ngoo nanu" ri nga" byumyu" bui" nhang: lho: ngoo gi nanu" Mangsoo nghoid wa. Ngoo gi nanu" da" Aseing Mangsoo nghoid ziri nanu" Egutu moo join koid nyid jang" mo ngoo loid byoin nhang: uri nanu" si' boem wa zi nghoid. 8Ngoo nanu" ri Abraham- Isag- Yaku yo' geing: teing dangsoo" to" da" mung" khyoo: shu" loo" wa. Houg ziri nanu" seing: da" mung" khyo" nyang: byid: wa zi nghoid. Ngoo gi Aseing nghoid›» ga: tid bye:. 9Moshe he: ziri Israela byumyu" yiri tid kyoo" nghoid loug we' nya: dang: ri nyangnu" atam" gyoo: goo" nghoid da:. Ciwim gari ayo" zeing: kham: da" join moo" gi nyangnu" da" nheigloem: ri thang nhang: yoomo nghoid.
10Hau: thang: Aseing Moshe ri 11«Egutu khokham jhang yhe: lho: Israela byumyu" yiri nya: mung" mo thu loo" nhang: ca" ein: tid we'» ga: tid.
12Nghoid loug we' Moshe gi Ngoo tid zigi «Israela byumyu" yi golhoo' atam" gyoo: ri khokham gi khasu" nghoid wa la". Ngoo gi dang: ajoeb byeung" su: danghoid» ga: tid.
13 Aseing gi Moshe yo' Arun ri amyeing" byid: kaid zigi «Ngoo re" eig yug ri Egutu mung" mo Israela byumyu" yiri vhu" she: wigi Egutu mung" mo thu loo" wa shid re" amyeing" byid: bye: Israela byumyu" yi yo' Egutu khokham ri tid we'» ga: bye:.
Moshe yo' Arun da" Deungkhu: Lhid" Xoem"
14Yaku zooshid" Ruben da" yuggi zoo: myid: yug gi Hanug- Palu- Hezron- Khami- bang: nghoid. Nyangnu" myeing gi nyangnu" phoug" phyid" yi da" akung: ako' bue" loo bye:. 15Simun yuggi zoo: khyug yug gi Yemuela- Yamin- Ohad- Yakhin- Esuhara yo' Khanan myiyi: khoem" mo Shaula bang: nghoid. Nyangnu" myeing gi nyangnu" phoug" phyid" yi da" akung: ako' bue" loo bye:. 16Levi da" yuggi zoo: soem" yug gi Gershon- Kohad- yo' Merari bang: nghoid. Nyangnu" myeing gi nyangnu" phoug" phyid" yi da" akung: ako' bue" loo bye:. Levi gi 137 zain ju" sho' nyid. 17Gershon yuggi zoo: eig yug gi Libni yo' Shimi tang: nghoid. He: tang: jang" moo amyed ashen gye myo: ago". 18Kohad yuggi zoo: myid: yug gi Amram- Izhara- Hebron- Uziela bang: nghoid. Kohad gi 133 zain ju" sho' nyid. 19Merari yuggi zoo: eig yug gi Mahali yo' Mushi tang: nghoid. He: zigi Levi kung: mo nyangnu" amyed ashen yi nghoid.
20Amram koem' gi nya: nid moo" Yokhebed ri lo, xo' yu lho: nyang: gi Arun yo' Moshe ri khu: byid: bye:. Amram gi 137 zain ju" sho' nyid. 21Izhara da" yuggi zoo: soem" yug gi Kora- Nepheg- Zikhri bang: nghoid. 22Uziela da" yuggi zoo: soem" yug gi Mishaela- Elisaphan- Sithri bang: nghoid.
23Arun gi Aminadab da" zoo:- Nashon da" nhammoo" Elisheba ri yu wigi nyang: gi Nadab- Abihu- Eleaza- Ithama bang: ri khu: byid: bye:. 24Kora da" yuggi zoo: yi soem" yug gi Asira- Elkana- Abiasap bang: nghoid. Nyangnu" gi Kora kung mo byo gyoo" lo da" phoug" phyid" yi nghoid. 25Arun nya: zoo: Eleaza gi Phutiela da myiyi: zoo: dayug ri yu wigi Phineha ri khu: byid: bye:. He: gu: gi ikoin deungkhu: mo vhujhung: yi nghoid wigi Levi kung: mo akung: ako' bang: nghoid boem ago".
26Arun yo' Moshe gi «Egutu mung" mo Israela byumyu" yiri vhu" she: wigi shu" thu loo ge'» ga: da" Aseing pyeing: to" dang: shoug" yu su: tang: nghoid. 27Houg tang: gi Israela byumyu" yiri loid byoin nhang: wa shid re" Egutu khokham ri yhe: tid bye:.
Moshe yo' Arun ri Aseing amyeing" byid: Khyoo:
28Egutu mung" mo Moshe ri Aseing gi 29«Ngoo Aseing nghoid. Ngoo nang ri tid khyoo: dangain" ri Egutu khokham ri tid kyoo" we'» ga: nyang: tid.
30Nghoid loug we' Moshe gi «Ngoo gi dang: ajoeb byeung" su: danghoid zi nang se'. Nga" dang: ri Egutu khokham khasu" se' tam" gyoo: wa la"» ga: tu" bye:.
Currently Selected:
THU' LO" MOUGSOUG" 6: LCL
Highlight
Share
Copy
Want to have your highlights saved across all your devices? Sign up or sign in
Lacid Bible © Bible Society of Myanmar, 2009.