THU' LO" MOUGSOUG" 3
3
Mangsoo Moshe ri Khyen: Yu Khyoo:
1Danyid" nyid" ri Moshe gi Midian mung" mo nya: yugphoo' khainjung Yethru da" yang joem yo' coidbaid joem ri zung" lhoug wigi Gyeung" shang: boem ga: da" Sina boem khyoo: gougnyhoug phung: ri shu" lho: dain" pyoid yoo khyo" yhe: loo" bye:. 2Houg moo Aseing da" moug: lagyoo: gi mhain" pung akhoug: mo myiyham: yhang: ti" nya: shid moo bang thu lo. Mhain" pung moo myi: dab nyid nghoid loug we' houg zigi ange" pyam zi Moshe shau" myang bye:. 3He zigi mau" pho" zi nghoid. Ciwim yoomo mhain" pung ange" la"- ngoo tab tab yhe: lho: yu" yu" wa ga: myid nyid. 4Moshe tab tab yhe: lo" zi Aseing myang lang" mhain" pung akhoug: mo nyang: ri khe: lho: «Moshe- Moshe» ga: yoid nyid.
Nyang: gi«Nghoid- ngoo hidmoo nyid» ga: phug tid.
5Mangsoo gi «Hid khyoo: tab tab ari"- Re" khyid: baid khyoid we'. Ciwim ga: ri nang gyeung" shang: joyoo moo yab jo,. 6Ngoo gi re" phoug" phyid" yi nghoid da" Abraham- Isag- Yaku bang: da" Mangsoo nghoid». Moshe gi Mangsoo ri yu" wa zi gyoug yoomo myonhoo: ri nghoeb to". 7Hau: thang: ri Aseing gi «Egutu moo join bue" nyid mo, nga" byu yi da" gye" kyi" khyeug khyoo: ri ngoo myang bye:. Nya: bang: nyang: ri join gung" mo, jang" mo khyoid yu ge' ga yoid ngau: nyid ziri ngoo shoug" gyoo: bye:. Nya: bang: kyi" khyeug shoug" khyoo: ri ngoo dangain" si' bye:. 8Hougsu" yoomo Ngoo nya: bang: nyang: ri Egutu byumyu" yi jang" mo yhe: khyoid yu lho: Egutu mung" mo zi akhid" Khanan- Hiti- Amori- Perizi- Hivi yo' Yebusi byumyu" yi nyid joyoo- gye" dam lho: mougmyid nu" yoo" zoo yoo" shug da" moug: khyoo: shu" yhi: wa nghoid. 9Ngoo gyeing" nyang: nga" byu yi da" ngau thui: ri shau" gyo: ziyo' Nya: bang: ri Egutu byu yi khayhi' doin: zeig to" ziri ngoo myang bye:. 10Akhid" nang nga" byu yiri vhu" she: lho: nya: mungdain: mo yo" shu" thu yu wa shid re" ngoo nang ri Egutu khokham jhang khyoo: nhang: kaid wa. 11Nghoid loug- Moshe Mangsoo ri «Ngoo cibui" su: anghoid- ngoo khasu" wigi khokham jhang yhe: lho: Israela byumyu" yiri Egutu mo yhe: yo" shu" thu yu wa la"» ga: tid. 12Mangsoo gi «Ngoo nang yo' dage" nghoid wa. Nang hau: byu yiri Egutu mo yhe: shu" thu lo uri he: boem moo nang ngoo ri yo" noku wa nghoid. Hau: zigi Ngoo nang ri nhang: kaid da avoid nghoid wa.
13Nghoid loug we' Moshe gi «Ngoo Israela byumyu" yi jhang khyoo: yhe: lho: Nanu" phoug" phyid" yi da" Mangsoo gi ngoo ri nanu" jhang khyoo: nhang: kaid ein: nya: bang: ri tid uri nya: myeing cisu" ga: zi nghoid ga. Nya: bang: ngoo ri myid: nghoid ri ngoo nya: bang: ri khasu" tid kyoo" wa la" ga» phug tid.
14Mangsoo gi «Ngoo nghoid nyid ziyo' dakhyoo" ti" ngoo nghoid ga: wigi nyangnu" ri nang tid ca". Ngoo nghoid ein: da" su: ngoo ri nanu" jhang khyoo: nhang: kaid. 15Ngoo gi Nanu" phoug" phyid" yi da" Mangsoo- Abraham- Isag- Yaku da" Mangsoo Ngoo Aseing gi nang ri nyangnu" jhang nhang: kaid ein: Israela byumyu" yiri tid we'. He: zigi apyaid atoo: mo nga" myeing nghoid. He: zigi ju" loo wa da" byuxeig xeig khang" moo" bang: ngoo ri yoid wa da" myeing nghoid. 16Yhe: wigi Israela byumyu" vhujhung: yiri dage" khe: zheing" lho: nanu" phoug" phyid" da" Mangsoo- Abraham- Isag- Yaku da" Mangsoo Ngoo Aseing gi nanu" jang" moo thu shug bye: ein: nyangnu" ri tid we'. Ngoo nyangnu" jhang ri" lho: nyangnu" ri Egutu byumyu" yi khasu" koid bye: ziri shau" myang bye: ein: tid kyoo" we'. 17Ngoo gi nyangnu" kyi" khyeug shoug" nyid da" Egutu mung" mo khe: thu yu wigi Khanan- Hiti- Amori- Perizi- Hivi yo' Yebusi byu yi nyid da" mung"- Mougmyid nu" yoo" zoo: yoo" shug da" mung" khyoo: shu" yi: wa ein: myid phyed too" bye:.
18Nga" byu yigi nang nyangnu" ri citid ein: ziri tam" gyoo: zi nghoid. Houg: yoomo nang Israela byumyu" vhujhung: yi yo' dage" Egutu khokham jhang yhe: lho: Hebre byumyu" yi da" Aseing Mangsoo gi nya: gung nyang: ngoonu" ri pang" shug. Akhid" ngoonu" da" Aseing Mangsoo ri xoin" yhe: to' noku wa shid re" dain" pyoid yoo khyoo: gyung: soo" wa yoomo ngoonu" ri soem" nyid" akhang" byid: la ein: nyang: ri tid we'. 19Egutu khokham koem' gi yoem so' zeing athung" shoug" shoug" gi nanu" ri nhang: kaid zi anghoid ein: ziri ngoo se' 20Nghoid loug we' ngoo gi nga" yoem: so' ri ci: lho: Egutu byumyu" yiri gyoug dain pho" alhoo: again joem ri koid lho: dam byid: wa. Hougsu" koid thang: ri nanu" ri yhi: nhang: wa zi nghoid.
21Egutu byumyu" yi nang ri phau" myang: wa shid re" ngoo koid wa. Hougsu" yoomo nga" byu yi thu lo" uri lo, koem: thu loo" wa zi anghoid. 22Israela byumyu" myiyi: yugdu: ngab gi nyangnu" da" yhoem: kyoo" cang" Egutu myiyi: yi jang" mo mi byi: ngei yo' sheing: joem ri mho' yu wa zi nghoid. Israela byumyu" gi nyangnu" yuggi zoo: myiyi: zoo: yiri hau: zi foid lho: Egutu byumyu" yi da" jonu" joem ri yo" ci loo" wa zi nghoid.
Currently Selected:
THU' LO" MOUGSOUG" 3: LCL
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
Lacid Bible © Bible Society of Myanmar, 2009.