1 TIMOTHI 4
4
Mhau' Da" Sara: Joem.
1Thang: phyang" pyaid ri byu dayham" bang: gi loem" jeung" khyoo: ri she: pyam boem wa zi nghoid. Nyang: nu" gi mhau' fain" da" venyi joem da" dang: ri tam" gyo: boem wigi yu join: jhoug" byid: da" khyoo: moo cang lo" byug boem wa da" khyoo: ri hau: gyeungshang: da" venyi gi bang bang nyang: tid nyid. 2Gye" nge" da" joto' wigi kang: nghe, kyoug pyam' zi yhang: ti"- nyangnu" da" ge, zi age ziri se' kho' khyen: yu" da" nheigloem: e" myed gi kyoug shid: byug boem bye. Houg: yhang: ti" mhau' yen" da" sara: joem gi hau: khyoo: joem ri jhau" sain" lo" boem abye: go. 3Houg: yhang: te" da" byu yi gi loxo' myi: pheing" fang da" khyoo: joem ri jhed' xeung toem to" lho: zoo: noem, dayham" ri jang" pyam' wa shid re" jhoug" byid: lo ago". Nghoid loug we' loem jeing" bang: yo' hau: deingmain" da" khyoo: ri se' yeug mo, gi jeju" coung" nghei da" akyu" mho' lho: yo" zoo: wa shid re" Mangsoo gi hau: zoo: noem, ri phain" too" bye. 4Mangsoo phain" to" da" zi dangain" koem' gi ge zi nghoid wigi ce: ja" zoo: noem, ri we' lhid' jang" pyam' ca" zi anghoid. Nghoid loug we' zoo: noem, dangain" ri jeju" coung" nghei akyu" mho' ziyo' zoo: ge nyid. 5Khasu" wim ga: ri Mangso mungdang: yo' akyu" mho' da" dang: gi hau: da" zi joem ri young" lhoo, nhang: nyid wigi Mangsoo kham: yu ge da" zoo: noem, bue" doid' nhang: nyid.
Khristu Da" Dei Zoo: Gi Yi
6He: jhau" mho' da" dang: khoin" joem yo' dakhyoo" ti"- Khristain mang: nhung" yi ri nang tid poin" tid kyeung" nyid nghoid rigi nang gi nanyang: lhoem: kham: yu to" da" loem" jeung" da" khyoo: ri we' deingmain" da" jhoug" myeing" jhoug" thui: ri we' nya: gung du: ri goin, coung: da" Khristu ge, da" dei zoo: bue" nyid wa zi nghoid. 7Nghoid loug we' Mangsoo yo' asen: khyo" tid wa zigi ce" akyu" we' aboo. mhoo: myid: byuxeig shab, khyoo: ri jang" pyam lho: nyhang" nya: da" kangso' dei yhe: lo" khyoo: moo tarha" phau" cang da" khyoo: ri gyi: sheung: yang" deung loo" nhang: we'. 8Gung shoo" yo' sen: da" khyoo: moo zei: zhang: so' zhang: zigi akyu" dajhi' zoo: boo nghoid loug we' Venyi loem" jeung" khyoo: moo zei: zhang: so' zhang: da" khyoo: gi khyoo: khhaid' khang" moo" moo akyu" bo zi nghoid. Khasu" wim ga: ri hau: khyoo: gi he: da" pyaid yo' thang: phyang" pyaid shid re" dang: soo" bo nyid. 9He: da" khyoo: gi deingmain" ziyo' gyeing" nyang: bain' sho' kham: yu lho loem" jeung" ge, da" deingmain" dang: nghoid. 10Xangsu" byu yi dangain" mo, yo,- je" wigi loem" jeing" mo, ca" khyoid yu Aseing: nghoid nyid da- dadei nyid da" Mangsoo gi ngoonu" da" myid yu" joyoo nghoid yoomo ngoonu" moo" zei: jid: ne: lo" da" jang" moo gye" yoem: kaid' nyid boem.
11He: da" amyeing" mungdang: yo' jhoug" myeing" jhoug" thui: ri nyangnu" ri dajhoug" byid: nyid we'. 12Nang gi apyad' ngi shi" ved yam" zoo: nghoid nyid shi" yoomo hang" we' nang ri gam vhoo: ayu" khyo, pyam' goo" baja"- ji, sang: da" khoin" thui: moo we' aved asam" moo we' jheddab jang" moo we' loem" jeung" loem, khau: khyoo: yo' nheigloem: young" khyoo: moo we' leom" jeing" bang: shid re" yu" yu wa da" khoo" shid: bue" nyid we'. 13Ngoo ju" re" da" ayo, ju" sho' mung" byu yi shid khoin" moo jhoem: mungdang: nghab kyo" khyoo:- mungdang: ri kho" kyo" ziyo' jhau" mho' nyid khyoo: ri ayo, byid: wigi yoem: kaid' lho: zei: so' nyid we'. 14Lapi: yi kho" kyo" lho: phung ri shu" vhu" shi: bang: da" atho' moo lo, ke" lho: phung" void, kaid' byid: da" uri nang ri byid: to" da" nang moo bo jo, gyeung shang: venyi yo' sen: d a" jeju" jhung: shug ri aphoug" akhyoid koid lho: aci: phyoug pyam. 15Nang se' yeug gyi: sheung: lo zigi byu yi dangain" bang: shau" myang baja"- atho' moo tid lid loo bye: da" khyoo: joem ri nheigloem: boo boo cang pyeung lo" ziyo' houg: moo geung: zug jo, we'. 16Nanya: gung ri we' re" da" jhoug" myeing" jhoug" thui: ri we' lhed zed" zoore" goin, coung: nyid we' nang gi he: d a" khyoo: joem ri d acang zei: nyid we' Khasu" wim gari hougsu" koid nyid nghoid rigi nanya: da" gung du: ri we' nang kho" da" mungdang: ri shaug" gyoo: mo, ri we' yo" khyoid yu wa zi nghoid.
Currently Selected:
1 TIMOTHI 4: LCL
Highlight
Share
Copy
Want to have your highlights saved across all your devices? Sign up or sign in
Lacid Bible © Bible Society of Myanmar, 2009.
