1THESALONI 5
5
Aseing: Doem, Ju" Ri Wa Ayo, Shid' Re" Jen" Jen" Koid Nyid Ge.
1Mang nhung yi we"- he: mungdang" khyoo: bue" loo wa da" bidnyid yo' ayo,- khanham nghoid wa khyoo: ri nanu" jhang lhid" kaid' cang aboo loo. 2Khasu" wim gari Aseing: doem ju" ri" wa bidnyid gi myen" ri khoug" su" re" yhang: ti"- ju" ri" wa nghoid ziri nanu" nyang: voin: tang: si' bye. 3Byu yi gi jo, moo jo, myenjham" lho: wigi gau: nyu: bye ga: tid goo" wa zi nghoid- houg: su" ga: tid uri -zoonu" gung nghoid su: gi zoo: khu: wa shid' re" bidnyid noo no re" yhang: ti"- ci: amyid' too" lo: za: hau: byo, yoin" lo" khyoo: gi nyid' dain' tung nanu" jang" moo ju" loo wa zi nghoid wigi byu yi gi hang" we' yo" loid, loo' wa zi anghoid. 4Nghoid loug we' mang nhung yi we"- nanu" koem gi moug coid khoug: moo nyid nyid, mo, anghoid boem lo: yoomo hau" Aseing: doem ju" re bidnyid gi khoug" su: yhang: ti" nyid, dain' tung" nanu" ri re" myhi: wa zi nghoid. 5Khasu" wim gari nanu" dangain" bang: gi bidbang mo nya: zoo: yi nghoid nyid boem bye: yoomo nyid" khyoug mo nya: myid: nya: zoo: yi we' nghoid boem bye- ngoonu" gi myen" mo nya: zoo: nya: myid: yi we' anghoid moug: coid' mo nya: zoo: nya: myid: yi we' anghoid loo. 6Houg: su" nghoid yoomo ngoonu" gi byu gooji yi yhang: ti" ayhoeb, myhed jo, boem loo: za: gyeung: boin: zoore"- gyeing gyeing: koid lho: lhed' zed" nyid boem shang. 7Byu yi gi myen" ayo, moo yhoeb, jo, boem ago- myen" ayo, moo yhid: shug yed, nyid boem ago". 8Nghoid loug we' nyhang" nu" gi bidbang mo nya: zoo: nya: myid: yi nghoid nyid boem yoomo-boin: gyeung: ziyo' zed" lhed' nyid boem ca"- Ngoonu" gi loem" jeung" khyoo: yo' jheddab ein: da" yang gang nghoeb ri nghoeb, ci: lho: wigi ngoonu" da" khyoid yu khyoo: ri nheig byu nyid ein: da" joto' mug ri zhoung" ci: shang. 9Mangsoo gi nya: nheig khoo" yo" da" khyoo: ri kham, zoo: wa shid re" nyhang" ri khyen: yu t o" zi anghoid- Aseing Yesu Khyo" wigi khyoid yu da" khyoo: ri yo" seung: yu wa shid re" khyen: yu to" zi nghoid. 10Khristu doem ju, re" da" uri gi nyhang" gi shid: byug boem wam: bye: nghoid loug we' dei nyid boem shi" nghoid loug we' nyang: yo' dage" kang so shau" dei nyid wa shid re" nyang: gi yha" shid' re" bo shid: kham: byid: bye. 11Khyoo: he: khaid yoomo nanu" akhid" koid nyid ziyo' dakhyoo" ti"- dayug yo' dayug nyang: cang" nyang: yoem: byid: go" ziyo' pang" goo" thug go" khyoo: ri dakoid nyidge'.
Lo" Thang Mo Pyeing: Dang: Joem, Yo' Vhu" Kaid' Da" Dang: Joem.
12Mang nhung" yi we" nanu" moo moo" voin, nyid banhg: ri we' nanu" ri khyoo: shed, vhu" she: - jhoug" byid: mhoo, byid: wa shid re" Mangso wigi nyheung soin' too" bang: ri goolhoo: za: zei: eung: ziyo' dakhyoo" ti"- phau" myang: nyid ge" ein: ngoonu" joug jhoin" yoe: byid: kaid. 13Nyang: nu" voin, vu, da" moozoo" jid: zoo" yoomo nyangnu" ri gye" nyang: phau" myang: ziyo' jheddab khyo" dakoid nyid ge'- nanu" nya: da" akhoug: moo we' nyang: cang" nyang: gei pyo: myne, jham" khyo" dazoem" khau: nyid ge'.
14Hau: lho: mang nhung yi we"- nei" nyid bang: ri tid poin" tid kyeing" go" nyid ge'- nheigloem: nge loem: nge nyid bang: ri nheig teing ung: teing byid: nyid ge'. hoem: nu: bang: ribo pang" bo thug byid: nyid ge'- dangain" mo, da" atho' moo zeung: kham' nyid ge'. 15Hang" ri nghoid loug-shoid' su: ri shoid khyo" latoo: aphug goo" goo"- nanu" nyang: cang" moo we' byu dangain" bang: shid' re" we' ge da" moo" zei: wa jang" moo nanu" da" nheigloem: moo khanham we' soin' jen" too" ge'. 16Kha: nham, we' dagau yi nyid ge'. 17Anoo: atheing: loo: za: akyu" damho, nyid ge'. 18Khyoo khaid gu khang" moo" moo jeju" boin: lho: coung" nghei nyid ge' hau: zigi Khristu moo nanu" da" kangso' dei da" khyoo: yo' sen: lho: Mangso d" myid vho: khyoo: nghoid nyid.
19Gyeungshang: da" Venyi ri akyo' xeung ci: goo". 20Mangso venyi ri vang nhang: lho: kho" kyo" da" mungdang: ri aphoug" akhyoid akoid nyid goo". 21Dangain" ziri leug kyeung yu" lho: wigi ge da" khyoo: ri lhoem: yu wigi lhei, teung too" ge'. 22Age da" akhyeing" ashoeb khyoo:- dangain" ziri jang" pyam nyid ge'. 23Nyhang" ri ngei pyo: myen, jham" khyoo: byid: nyid da" Mangsoo gi nanu" ri khyoo: khaid gu: khang" moo" moo ced" yung" ced" shang: lho: wigi ngoonu" da" Aseing Yesu Khristu doem ju" re" da" uri nanu" da" venyi nheigloem: yo' gung du: goin" ziri yooboo adab loo: sho' zung" lhug goin, coung" byid: baja".
24Nanu" ri khe: yu su: gi kyed' su: nghoid nyid yoomo he: khyoo: ri zei: byid: loo wa zi nghoid.
25Mang nhung" yi we"- ngoonu" da" shid re" we' akyu" bo mho' byid: ge'. 26Loem" jeing" bang: dangain" ri gyeungshang: da" aved, asam" (gyeungshang: da" boobug yo') ga: wigi lagyoo: Polu tid nyid - he: khyoo: gi bidvang mungdain gyoo: mo thung" khin' nghoid wigi nyangnu" bidthu shoid mo mungdain: bang: gi ci: noug mo, ci: lho: aci: bang: myo:- (Ngoonu" nyang: cang" shau" doem go" lho: lo, zei: ze: go" lid gootu: nghoid) ziyo' lo, zei: shau" zei: goo" ge'. 27Hid: su" foin: kaid' da" mougsoug" ri loem" jeing" bang: dangain" mo, ri nghab kyoo" wa shid re" hau: Aseing: ab, byid: to" da" amyeing" yo' nanu" ri ngoo pyyeung: kaid. 28Ngoonu" Aseing Yesu Khristu da" jeju" gi nanu" yo' dage" dajo, jo, baja" o".
Currently Selected:
1THESALONI 5: LCL
Highlight
Share
Copy
Want to have your highlights saved across all your devices? Sign up or sign in
Lacid Bible © Bible Society of Myanmar, 2009.