LUCAS 23

Jesús tu táan Pilato

(Mt 27.1-2,11-14; Mc 15.1-5; Jn 18.28-38)

1Láaj líiko'ob túune' ca tu biso'ob Jesús tu táan Pilato.

2Te'elo' jo'op' u taquico'ob u pool, táan u ya'alico'ob: T ilaj le máaca' táan u p'u'ujsic c caajal. Cu ya'alique' ma' unaj c bo'otic páatano'ob ti' Cesari', yéetel táan xan u sen a'alique' leti' le Cristoo', u káat ya'ale' jun túul ajaw.

3Pilatoe' tu káat chi'itaj ti': ¿Teech wa u ajawil le judíobo'? Jesuse' tu núucaj: Beyo', je'el bix dzo'oc a wa'alico'.

4Pilato túune' tu ya'alaj ti' u nojochilo'ob le aj kiino'obo' yéetel ti' le máaco'obo': Mix jun p'éel si'ipil quin wilic ti' le máaca'.

5Ba'ale' leti'obe' tu sen a'alajo'ob: Táan u p'u'ujsic caaj, iquil u ca'ansaj ti' tuláacal Judea. Lela' tu cáajsaj Galilea, bejela'e' táan u beetic tac waye'.

Jesús tu táan Herodes

6Le ca tu yu'ubaj Pilato lela', tu káataj wa Galileail le máaco'. 7Le ca tu yojéeltaj ti' u taale', tu túuxtaj Jesús ti' Herodes, tumen lela' u jalach wíiniquil Galilea, máax ti' yaan xan Jerusalén ti' le kiino'obo'. 8Herodese', ca tu yilaj Jesuse', jach qui'imacchaj u yóol, tumen jach úuch taacchaj u yilic, tumen dzo'oc u yu'ubic u tzicbalil tu yo'olal Jesús yéetel túun dzíiboltic ca'ach u yilic u beetic quex jun p'éel chíiculal. 9Tu beetaj ya'abcach káat chi'ob ti', ba'ale' Jesuse' mixba'al tu núucaj ti'. 10Te'elo ti' yaan xan u nojochilo'ob le aj kiino'obo' yéetel u aj ca'anbesajilo'ob le a'almaj t'aano' táan u sen taquico'ob u pool. 11Herodes yéetel u soldado'obe' tu jach cúulpachtajo'ob Jesús, yéetel u ti'al u p'a'astico'obe' tu taco'ob jun p'éel jadzutz nook ti' bey u nook jun túul ajawe'. Cu dzo'ocole' Herodese' tu túuxtaj Jesús ti' Pilato tu ca'a téen. 12Ti' le kiino' Pilato yéetel Herodese' cáaj u bisicuba'ob ma'alob, tumen u paclan p'ectmuba'ob ca'achi.

Jesuse' cu ku'ubul u ti'al ca quíimsa'ac

(Mt 27.15-26; Mc 15.6-15; Jn 18.39—19.16)

13Pilato túune' tu much'quintaj u nojochilo'ob le aj kiino'obo', u jalachilo'ob le caajo', bey xan le máaco'obo', 14ca tu ya'alaj ti'ob: Te'exe' ta taase'ex teen le máaca' táan a wa'alique'ex táan u p'u'ujsic caaj, ba'ale' dzo'oc in káatic u chi' ta táane'ex yéetel ma' in wil mix jun p'éel u si'ipil ti' le ba'axo'ob ca taquique'ex u poolo'. 15Mix xan Herodes; le beetique' tu sutaj to'on. Ile'ex túune' mixba'al u beetmaj u ti'al ca u najmat u quíimsa'al. 16Bin in ca'aj in jadzej, cu dzo'ocole' quin jáalkabtic.

17Ichil le kiinbesajo', Pilatoe', je'el bix suucja'anile', yaan u jáalkabtic ti'obe' jun túul máac kala'an. 18Ba'ale' jo'op' u múuch' awtico'ob: ¡Quiims le máaca'! ¡Jáalkabt to'on Barrabás!

19Le Barrabasa' kala'an tu yo'olal jun p'éel p'u'ujsajil tu beetaj te j nojoch caajo' yéetel tu yo'olal úuchic u quíimsic máac. 20Pilatoe' u káat ca'ach u jáalkabt Jesús, le o'olale' j t'aanaj tu ca'a téen yéetelo'ob; 21ba'ale' leti'obe' asab ka'am awatnajo'ob: ¡Quíims ti' cruz! ¡Quíims ti' cruz!

22Pilatoe' tu ya'alaj ti'ob tu yóox téen: ¿Ba'ax kaas u beetmaj? Tene' mixba'al quin wilic ti' ca u najmat u quíimsa'al. Bin in ca'aj in jadze, cu dzo'ocole' quin jáalkabtic.

23Ba'ale' leti'obe' ma' xu'ul u yawat káatico'ob ca quíimsa'ac ti' cruzi'. Tu yo'olal úuchic u sen awato'ob leti'ob yéetel u nojochilo'ob le aj kiino'obo', j béeychaj ba'ax tu káatajo'ob. 24Pilato túune' tu ya'alaj ca beeta'ac le ba'ax tu káato'obo'. 25Ca tu jáalkabtaj le máac tu yéeyajo'obo', le máax kala'an ca'ach tu yo'olal p'u'ujsajil yéetel tu yo'olal úuchic u quíimsic máac, ca tu kubaj Jesús tu kabo'ob.

Si'inic Jesús ti' cruz

(Mt 27.32-44; Mc 15.21-32; Jn 19.17-27)

26Ca'aliquil táan u bisico'ob Jesús u sino'ob ti' cruze', tu macho'ob jun túul Cireneil, Simón u kaaba', táan u yu'ul ca'ach tu meyaj, ca tu beeto'ob u cuchic le cruzo' u ti'al u bis tu paach Jesús.

27Ya'ab máaco'ob j bino'ob tu paach, ichilo'obe' ya'ab co'olelo'ob táan u yokolo'ob yéetel táan u yawato'ob yéetel yaayaj óolal tu yo'olal leti'. 28Ba'ale' Jesuse' tu pactajo'obe' ca tu ya'alaj ti'ob: U co'olelile'ex Jerusalén, ma' a wokole'ex tin wo'olal, ba'ale' okolnene'ex ta wo'olale'ex yéetel tu yo'olal a paalale'ex. 29Tumen yaan u taal u kiinil u ya'ala'ale': Qui' yóol le co'olelo'ob ma' tu páajtal u yantal u paalalo'obo', bey xan le ma' yanchaj u chaan palo'obo' yéetel le ma' tzéenajo'obo'. 30Ti' le kiino' le máaco'obo' yaan u cáajal u ya'alico'ob ti' le pu'uco'obo': Lúubene'ex t óokol, yaan xan u ya'alico'ob ti' le múulo'obo': Ta'aco'oni'. 31Tumen wa ti' le áak che' cu beeta'al tuláacal le ba'alo'oba', ¿ba'ax ma' bíin beeta'ac ti' le tiquino'?

32Táan u bisico'ob xan ca'a túul kaakas máaco'ob u ti'al u quíimso'ob yéetel Jesús. 33Le ca j kucho'ob te j cúuchil cu kaaba'intic u Baaquel Poolo', tu sino'ob Jesús ti' cruz, bey xan le ca'a túul kaakas máaco'obo', jun túule' tu x no'oj kabil, u láake' tu x dzíic kabil. 34Ca tu ya'alaj Jesús: In Yuum, sa'ates ti'ob, tumen ma' yojelo'ob ba'ax cu beetico'obi'. Le soldado'obo' buulnajo'ob u ti'al u t'oxico'ob ichilo'ob u nook Jesús. 35Le máaco'ob yano'ob te'elo' táan ca'ach u pactico'ob ba'ax cu yúuchul, le jalach wíinico'obo' táan xan u p'a'astico'ob Jesús, táan u ya'alico'ob: Tu tocaj yaanal máaco'ob; bejela'e' u tocubáa leti' wa tu jaajil leti' le Cristoo' le máax yéeya'an tumen Jajal Diose'.

36Le soldado'obo' tu p'a'astajo'ob xan, iquil tu nadziluba'obe' u dza'ob su'udz vino u yukej, 37táan u ya'alico'ob ti': Wa teech u ajawil le judíobo', tocabáa.

38Yaan jun p'éel dzíib dza'an tu yóokol le cruzo' dzíiba'an ich griego, latín yéetel hebreo, cu ya'alique': Lela' u ajawil le judíyo'obo'.

39Jun túul ti' le kaakas máaco'ob sina'an ti' cruz te'elo' táan xan u p'a'astic, táan u ya'alic: Wa teech le Cristoo', tocabáa ca toco'on xan.

40Ba'ale' ke'ey tumen le u láak kaakas máaco' ca j a'ala'ab ti': ¿Ma' ta ch'a'ic sajaquil ti' Yuum Jajal Dios quex ti' yanech xan yáanal le jaadza'? 41To'one' jach tu jaajile' c najmatic le mukyaja', tumen táan c bo'otic le ba'ax c beetmaje', ba'ale' le máaca' mixba'al kaas u beetmaj.

42Ca túun tu ya'alaj ti' Jesús: Ka'ajsen le quéen taalaquech ta ajawil.

43Jesús tu núucaj ti': Tu jaajil quin wa'alic ti' teech, bejela' can antal tin wéetel tu Cúuchil Qui'imac óolal.

Quíimic Jesús

(Mt 27.45-56; Mc 15.33-41; Jn 19.28-30)

44Le ca j kuch míin chúumuc kiine' éekjoch'e'enchaj tuláacal lu'um tac míin las tres u bimbal kiin. 45Le kiino' éekjoch'e'enchaji, le káasab nook yaan ich kulnajo' búuj tu táanchúumuc. 46Ca tu ka'am a'alaj Jesús: In Yuum, ta kab quin kubentic in pixan. Le ca tu ya'alaj lela' ca j quíimi.

47Le centuriono', le ca tu yilaj ba'ax dzo'oc u yúuchule' tu qui'iqui' t'antaj Jajal Dios, táan u ya'alic: Jach tu jaajile' mina'an u si'ipil le máaca'.

48Tuláacal le máaco'ob yano'ob ca'ach te'elo', le ca tu yilajo'ob ba'ax j úucho', j luko'ob te'elo' táan u loxic u tzeemo'ob. 49Ba'ale' tuláacal u kaj óolalo'ob Jesús, bey xan le co'olelo'ob j taalo'ob tu paach le ca j luk Galileao', p'ato'ob náach u pacto'ob le ba'alo'oba'.

Mu'uquic Jesús

(Mt 27.7-61; Mc 15.42-47; Jn 19.38-42)

50Yaan ca'ach jun túul máac jach utz yéetel toj u cuxtal, u kaaba'e' José, u caajale' Arimatea le yaan Judeao'. Lela' jun túul ti' le u múuch'ul u nuuctaquilo'ob le judíobo'. 51Le Josea' táan u pa'atic u ajawil Jajal Dios; le beetique' ma' tu quetaj ba'ax tu beetaj u múuch'ul le nuuctaco'obo'. 52Leti' túune' j bin u yil Pilatoe' ca tu káataj u wíinclil Jesús. 53Cu dzo'ocol u luksic ti' le cruzo', tu to'aj yéetel jun p'éel sac nooke' ca tu dzáaj ti' jun p'éel mucnal jola'an ti' tuunich tu'ux mixmáac mu'ucuqui'. 54U kiinil u nu'ucbesa'al u kiinil je'elel, tumen lela' ta'aytac u cáajal.

55Le co'olelo'ob j taalo'ob tu paach Jesús le ca j luk Galileae' j bino'ob ca tu yilo'ob le mucnalo' yéetel bix dza'abic u wíinclil. 56Le ca j suunajo'ob tu taanajo'obe', tu nu'ucbeso'ob qui'iboc xíiwo'ob yéetel qui'iboc aceite. Ca tu je'elsuba'ob sábado je'el bix u ya'alic le a'almaj t'aano'.

Currently Selected:

LUCAS 23: YUA04

Highlight

Copy