Hechos 2

U taalbal Quili'ich Pixan

1Le ca'a j kuch u kiinil Pentecostese', láaj much'ucbal le j ocsaj óolo'ob ti' jun p'éelili' cúuchil. 2Ca j téec u'uya'ab túun jun p'éel ka'am juum cu taal ti' le ca'ano', je'el bix u taal u juum jun p'éel ka'amcach iike' ca tu chupaj tuláacal le naj tu'ux culucbalo'obo'. 3Ca j chíicpaj ti'ob bey u tóoch'bal káake', t'oxa'an tu yóokol jujun túulilo'ob. 4Ca láaj chu'upo'ob yéetel Quili'ich Pixan, ca jo'op' u t'aano'ob ichil jejeláas t'aano'ob, je'el bix u beeta'al u t'aano'ob tumen Quili'ich Pixane'.

5Ti' le kiino'obo', ti' yano'ob Jerusalén Judiyo'ob cu dzo'ocbesico'ob ba'ax cu ya'alic le a'almaj t'aano', taalja'ano'ob ti' tuláacal u lu'umilo'ob yóokolcaab. 6Le ca j u'uya'ab le juumo', j much'laj le máaco'obo', ma' tu caxtico'ob ba'ax u tuculto'ob, tumen tu jujun túulile' táan u yu'ubico'ob u yúuchul t'aan le t'aan síijico'obo'. 7Jaka'an túun u yóolo'ob táan u ya'alico'ob tu baatzilo'ob: ¿Ma' wa galileailo'ob tuláacal le máaco'ob cu t'aano'oba'? 8¿Bix túun anil táan c u'uyic u t'aano'ob ti' le t'aano'ob sijnaalilo'on?

9Waye' yaan Partiailo'ob, Mediailo'ob, Elamilo'ob, Mesopotamiailo'ob, Judeailo'ob, Capadociailo'ob, Pontoilo'ob, yaan xan u taalo'ob ti' u lu'umil Asiae', 10Frigia yéetel Panfilia, Egipto yéetel ti' le u caajilo'ob Africa yaan paachil ti' Cireneo', bey xan yaan Romailo'ob caja'ano'ob waye', dze'edzec ti'obe' judíob sijnalo'ob, u láako'obe' chéen tu kamajo'ob u yocsaj óolal le judiyo'obo'. 11Yaan xan máaxo'ob Cretailo'ob yéetel Arabiailo'ob; ba'ale' tuláacalo'on t u'uyaj u tzicbaltico'ob u qui'ichquelem meyajo'ob Jajal Dios ichil le t'aan síijico'ono'.

12Láaj jaka'an u yóolo'ob, ma' táan u caxtico'ob ba'ax u tuculto'ob, tu káatajo'ob: ¿Ba'ax u káat ya'al le ba'ala'? 13Ba'ale' u láako'obe' jo'op' u p'a'aso'ob táan u ya'alico'ob: Ba'ax cu yúuchule' cala'ano'ob.

Ba'ax tu ya'alaj Pedro ti' le máaco'obo'

14Wa'alchaj túun Pedro yéetel le u láak once apóstolo'obo', ca j ka'am t'aanaj ca tu ya'alaj: U xibil máaquile'ex cajnáalile'ex Judea yéetel tuláacal le caja'ane'ex Jerusalen, ojéelte'ex lela' yéetel u'uye'ex ma'alob le ba'ax quin in wa'al ti' te'exa'. 15Le máaco'oba' ma' cala'ano'obi' je'el bix ca tucultique'exo', tumen táant u dzáic las nueve kiine'. 16U jaajile' lela' leti' le ba'ax tu tze'ectaj le profeta Joel le ca tu ya'alaje':

17Ti' le u dzooc kiino'obo', cu ya'alic Jajal Dios,

bin in ca'aj in wec in Pixan tu yóokol tuláacal máaco'ob;

le xi'ipalalo'ob yéetel le x ch'úupalalo'obo' yaan u t'aano'ob tin wo'olal,

le táanquelem máaco'obo' yaan u yi'alico'ob ca'anilbe'en ba'alo'ob, le nuxibo'ob xano' yaan u wayaktico'ob náayo'ob.

18Ti' le kiino'obo' yaan in wequic in Pixan tu yóokol in j palitzilo'ob yéetel in x palitzilo'ob,

u ti'al ca t'aanaco'ob tin wo'olal.

19Yaan in we'esic jakbe'en ba'alo'ob te j ca'ano', yéetel yaan in dzáic chíiculalo'ob way lu'ume':

ki'ik, káak yéetel u múuyalilo'ob buudz.

20Le kiino' yaan u éekjoche'enchajal yéetel le ujo' yaan u suut bey ki'ike'

ma'ili' kuchuc u kiinil Yuumtzil, tumen le kiino' jun p'éel nojoch yéetel qui'ichquelem kiin.

21Tuláacal túun le máax cun u ch'a'a chi'it u kaaba' Yuumtzile' yaan u to'ocol.

22U'uye'ex túun, u maaquile'ex Israel, le ba'ax quin in wa'ala': Jesús Nazaretil, jun túul j Xiib jaajcunta'ab tumen Jajal Dios ta táane'ex, tumen yéetel u kabe' Jajal Diose' tu beetaj nucuch jakbe'en chíiculalo'ob ichile'ex je'el bix ma'alob a wojelile'exo'. 23Mix yéetel beyo' le ca j ku'ub ti' te'ex je'el bix tu tucultaj yéetel tu nu'uctaj Jajal Dios ma'ili' úuchuque', te'exe' ta mache'ex yéetel ta quiimsaje'ex, tumen ta sinaje'ex ti' cruz yéetel u kab kaakas máaco'ob. 24Ba'ale' Jajal Diose' tu ca'a púut cuxquintaj, ca tu tocaj ti' u páajtalil le quíimilo', tumen ma' páatji u dzáancha'ata'al tumen le quíimilo'. 25Je'el bix tu ya'alaj ajaw David le ca j t'aanaj tu yo'olal Jesús:

Mantadz táan in wilic Yuumtzil tin táan, leti'e' ti' yaan tin x no'oje',

u ti'al ma' u beeta'al in quiquilanquil ti'olal mix ba'al.

26Le o'olale' chuup yéetel qui'imac óol in pucsi'ikal, beyxan tin wa'alaj u t'aanilo'ob qui'imac óolal.

Le o'olal xane' in wíinclile' yaan u je'elel ich alab óolal;

27tumen teche' ma' bíin a p'at in pixan ichil le quimeno'obo',

mix bíin a cha'a u kastal u wíinclil le a palitzil a yaabiltmaja'.

28Ta we'esaj teen u bejilo'ob cuxtal, bíin xan a chupen

yéetel qui'imac óolal tumen yaan a wantal tin wéetel.

29Sucu'une'ex, jun p'éel ba'al jach t'áalcab yanil, le c úuchben láakal Davido' j quíimi ca j mu'uqui, u mucnale' ti' yaan ichilo'on tac bejela'e'. 30Ba'ale' Davide' jun túul bóobat, yéetel u yojele' a'ala'an ti' tumen Jajal Dios yéetel kax t'aane' jun túul ti' u ch'i'ibale' bíin culac tu jalach káanche' lela' leti' le Cristo'. 31Le o'olal Davide', bey táan u yilic ma'ili' úuchuque', j t'aanaj tu yo'olal u ca'a púut cuxtal Cristoe' ca tu ya'alaj: Ma' j p'a'at u pixan ti' u cúuchil le quimeno'obo' mix kaschaj u wíinclili'. 32Jajal Diose' tu ca'a púut cuxquintaj Jesús, lela' tuláacalo'on c jaajcuntic, 33Bey túuno' j líiksa'ab tumen u x no'oj kabil Jajal Dios, ca tu kamaj ti' le taatao' le Quili'ich Pixan a'ala'ab u dza'abalo'; yéetel tuláacal le ba'alo'ob dzo'oc a wilique'ex yéetel a wu'uyique'ex ti' leti' u taal. 34Tu jaajile' ma' David máax na'ac ca'ani'; tumen leti'e' tu ya'alaj: Yuumtzile' tu ya'alaj ti' in Yuumtzil: Culen tin x no'oj, 35tac quéen in dzáa a aj p'eeco'ob tu yáanal a wooc.

36tuláacal u maaquilo'ob Israel unaj u yojéeltico'ob, x ma' ca'a p'éel óolalil, le Jesús máax ta sinaje'ex ti' cruze', beeta'ab Yuumtzil yéetel Cristo tumen Jajal Dios.

37le ca tu yu'ubajo'ob lela', yaachaj u yóol u pucsi'ikalo'ob, ca tu káat chi'itajo'ob ti' Pedro yéetel ti' u láak apóstolo'ob: C sucu'une'ex ¿ba'ax unaj c beetic?

38Pedroe' tu núucaj ti'ob: Kex a tuucule'ex tu táan Junab Jajal Dios, yéetel ocja'anene'ex tu jujun túulile'ex tu kaaba' Jesucristo, u ti'al ca sa'atsa'ac a kebane'ex; bey túuno' Jajal Diose' bíin u dzáa te'ex xan le Quili'ich Pixano'. 39Le ba'ax a'ala'ana' a ti'ale'ex yéetel u ti'al a paalale'ex, u ti'al xan tuláacal le máaxo'ob náach yanilo'obo'; u ti'al tuláacal le máaxo'ob u káat c Yuum Jajal Dios u t'aano'obo'.

40Yéetel le t'aano'oba' bey xan yéetel u láak t'aano'obe', Pedroe' tu tzolaj u xiquino'ob, táan u ya'alic: Tocabae'ex ti' u loolob wíiniquilo'ob le kiino'oba'.

41Bey túuno' le máaxo'ob tu yu'ubajo'ob u tze'eque' ocja'anajo'ob; ti' le kiino' yanchaj míin tres mil máaco'ob tu nupuba'ob ti' le j ocsaj óolo'obo'. 42Tuláacalo'ob j p'áato'ob yéetel chuca'an óolal ti' le ba'ax cu ca'ansico'ob le apóstolo'obo', cuxlajo'ob yéetel nup óolal tu baatzilo'ob, yéetel cu much'talo'ob u ti'al payalchi' bey xan u ti'al u xet'o'ob le waajo'.

Bix cuxlajico'ob le yáax j ocsaj óolo'obo'

43Tuláacalo'ob láaj jaka'an u yóolo'ob, tu yo'olal le ya'ab jakbe'en ba'alo'ob bey xan le chíiculalo'ob j beeta'ab tumen le apóstolo'obo'. 44Tuláacal le j ocsaj óolo'obo' jun múuch' yanilo'ob yéetel cu múuch' ti'alintico'ob u ba'aluba'ob. 45Cu conico'ob u lu'umo'ob yéetel tuláacal ba'ax yaan ti'obe', cu dzo'ocole' cu t'oxico'ob u taakinil je'el bix kabéetil ti'jujun túulile'. 46Sáamsamal cu múuch'taalo'ob kulnaj yéetel jun p'éelili' tuucul; te j najo'obo' cu xet'ico'ob le waaj cu múuch' janalo'ob xan ich qui'imac óolal yéetel jajay pucsi'ikalil. 47Cu qui'iqui' t'antico'ob Yuum Jajal Dios, utz u yila'alo'ob xan tumen tuláacal máac. Yuumtzil túune' sáamsamal cu nupic ti' le iglesiao' le máaxo'ob yanilio u to'ocolo'obo'.

Currently Selected:

Hechos 2: YUA04

Highlight

Copy