ZEKHARIAH 6

Rang Leng Pali Hmuhnak

1Langnak a dang pakhat ka hmu ih tlang pahnih karlak ihsin rangleng pali an ra suah kha ka hmu. Cuih tlang pahnih cu dar tlang an si. 2Pakhatnak rangleng cu rang sen in an hnuk, pahnihnak cu rang dum in an hnuk, 3pathumnak cu rang raang in an hnuk ih palinak cu rang ṭial in an hnuk. 4Cule vancungmi cu, “Bawipa, hi rangleng pawl ih tican ziangso a si?” tiah ka sut.

5Anih in, “Hi pawl cu thli pali an si. Leilung pumpuluk ih Bawipa hnen ihsin atu pekte a rami an si,” tiah a ti.

6Rang dum pawl ih hnuhmi rangleng cu saklam ah a feh, rang raang pawl ih hnuhmi cu nitlaknak lam ah a feh, rang ṭial pawl ih hnuhmi cu thlanglam ram ah a feh. 7Rang pawl an ra suah tikah leilung pumpi va zoh ding kha an hngakhlap zet. Vancungmi cun, “Feh uhla, leilung cu va zoh uh!” a ti; a ti vek cun an va zoh. 8Cutikah vancung mi cun “Saklam ram lam ih a fehtu rang pawl in Bawipa ih thinhengnak an daiter zo a si,” tiah in run auh.

Joshua Suilukhuh Khumter Ding

9 Bawipa ih ṭongkam cu ka hnenah hiti in a ra thleng ih, 10Bawipa cun, “Saltaannak ihsin a ra kirmi Heldai, Tobijah le Jedaiah pawl ih laksawng cu la awla Zefaniah ih fapa Josiah inn ah zamrang in feh aw. 11Anmah pawl ih laksawng pekmi sui le ngun in sui lukhuh tuah awla Jehozadak ih fapa Puithiam Sang Joshua khumter aw. 12A hnenah, Cungnungbik Bawipa in, ‘Thingṭeek ti ih kawhmi cu atu a umnak ah a ṭhangso ding ih Bawipa ih Biakinn amah in a sak sal ding. 13Biakinn a sak saaltu cu amah a si ding ih siangpahrang tlukin hminthannak a ngah ding ih a minung pawl amah in a uk ding. Puithiam pakhat a bawi tokham kiangah a ding ding ih, daihnak le remnak thawn hmunkhat ah hna an ṭuan tlang ding, a ti,’ tiah ti aw. 14Cuih suilukhuh cu Bawipa ih Biakinn sungah a um ding ih Heldai, Tobijah, Jedaiah le Josiah pawl theih ringringnak a si ding,” tiah a ti.

15Lamhlapi ih a ummi pawl khal an ra ding ih Bawipa ih Biakinn cu an ra sak bawm ding. Cutiih an sak tikah Cungnungbik Bawipa, in nan hnenah keimah i thlah hi nan thei ding. Bawipa, nan Pathian thupekmi nan thlunkim a si ahcun a tlunlam thil hmuahhmuah hi a kim ṭheh ding a si.

Currently Selected:

ZEKHARIAH 6: FCL

Highlight

Copy