ZEKHARIAH 4
4
Profet In Mei-inn Tohnak A Hmu
1Ka hnen ih a ṭong rerotu vancungmi cu a ra sal ih a itthat mi ṭhang vekin i ra ṭhang. 2“Ziang so na hmuh?” tiah i sut. Kei in, “Sui in tuahmi mei-inn tohnak ka hmu. A tlun ah meiti retnak kheng a um. Mei-inn tohnak par ahcun mei-inn pasarih an um ih mei-inn pakhat in meica thulnak ong pasarih an nei fingfing. 3Mei-inn tohnak kiangah olif thingkung pahnih, a sir veve ah an um ka hmu,” tiah ka ti. 4Cule vancungmi cu, “Hi thil pawl ih sullam ziangso an si, bawipa?” tiah ka sut. 5Amah in, “Sullam na thei lo maw?” i ti. Kei in, “Bawipa, ka thei lo,” tiah ka ti.
Zerubbabel Hnenah Pathian Thukamnak
6Vancungmi cun Cungnungbik Bawipa ih hnen ihsin a rami thu cu Zerubbabel sim dingin i fial. Bawipa in, “Hriamnam cahnak le na thazaang cahnak in si loin ka thlarau in na hlawhtling ding. 7Na hmaiah khamtu tlang tia a um hmanah an hlo ṭheh ding. Biakinn cu na din sal ding ih biakinn saknak a neta bik lungto na dawl tikah misenpi pawl cu, ‘A mawizet, a mawizet,’ tiah an au ding,” tiah a ti.
8 Bawipa ih thu cu ka hnenah a ra thleng sal ih, 9“Biakinn hram cu Zerubbabel in a dawl thok zo ih a saksuak ding. Cumi a kim ngaingai tikah ka minung pawl in an hnenah nangmah a lo thlahtu keimah ka si kha an thei ding. 10An biakinn sak hnaṭuannak a sawt lo ti an theih tikah an thin a nauzet. Sikhalsehla Zerubbabel in Biakinn cu taimak zetin a sak rero ko ti kha an hmuh tikah an lung a awi ding,” tiah a ti.
Vancungmi cun,#4.10b-14 Himi hi Zekhariah 4.5 thawn a thu peh a awk ruangah cutiih siar ding a si. “Mei-inn pasarih cu leilungtlun khuazakip a hmu ṭhehtu Bawipa ih mit pasarih tican a si,” tiah i ti.
11Cule kei in, “Mei-inn tohnak sir ih a ummi olif thingkung pahnih ih tican ziangso a si? 12Olif hriak a rung luannak sui in tuahmi dawng#Dawng kan timi hi Mirang ṭong ih ‘pipe,’ timi a si. pahnih kiangih olif thinghnge pahnih ih tican ziangso a si?” tiah ka sut lala.
13Anih cun, “Atican na thei lo maw?” i ti.
Kei in, “Bawipa, ka thei lo a si,” tiah ka ti.
14Cutikah anih in, “Himi pawl cu leilung pumpuluk ih Bawi a si mi Pathian in a hrilmi le hriak a culhmi minung pahnih an si,” tiah i ti.
Currently Selected:
ZEKHARIAH 4: FCL
Highlight
Share
Copy
Want to have your highlights saved across all your devices? Sign up or sign in
Falam Bible Revision © Bible Society of Myanmar, 2002.
