ZEKHARIAH 14
14
Jerusalem Le Miphun Dang Pawl
1 Bawipa in thu a ṭhennak ding ni cu a nai zo. Cule Jerusalem khua an ram ding ih an lonmi thilri pawl cu na mithmuh ah an zem ding. 2Bawipa in miphun hmuahhmuah Jerusalem do dingah a ko khawm ding. Khawpi cu an lak ding, inn thilri pawl an long ding ih nunau pawl an kaihrem ding. Minung a hrek cu sal ah an kai ding, a sinan a dang pawl cu khawpi ihsin khui hmanah an hruaihlo lo ding. 3Cule Bawipa cu a vung feh ding ih cuih miphun pawl cu, khuahlan laiih a rak do vekin, a do ding. 4Cutikah Jerusalem ihsin nisuahnak lam Olif Tlang parah Bawipa cu a ding ding. Cule Olif Tlang cu nisuahnak lam ihsin nitlaknak lam ih a fehmi phairawn kaupi in ṭhen hnih ah a ṭhen ding. Tlang ih hrek cu saklam ah a ṭhawn ding ih a dang hrek cu thlanglam ah a ṭhawn ding. 5Olif Tlang ṭhen hnih ih a ṭhentu cuih phairawn ihsin nan tlansuak ding. Judah siangpahrang Uzziah san laiah ling a rak hnin ih nan pu le nan pa pawl an rak tlansuak vekin nan tlan ve ding. Bawipa ka Pathian cu a ra ding ih a mithiang hmuahhmuah a rak hruai ding.
6Cuih caan a thlen tikah khawsik le vurtlak ti a um lo ding. 7Khawthim tikhal a um nawn lo ding. Zan hmanah sun khawvang lawng a um ding. Ziangtikah cuvek in a si ding, ti cu Bawipa lawng in a thei.
8Cuih ni a thlen tikah cun Jerusalem ihsin nunnak tidai a luang ding; tidai hrek cu Tipi Thi ah a luang dingih a hrek cu Mediterranean tifinriat ah a luang ding. Ṭhal tilo, fur tilo kum letsuak in a luang ringring ding. 9Cule Bawipa cu leilung pumpuluk ih siangpahrang a si ding. Mi hmuahhmuah in Pathian tiah an biak ding ih amah ih hmin keel in an thei ding.
10Hi leiram cu a zatein saklam ah Geba ihsin thlanglam ah Rimmon tiang hmun rawn ah tuah ṭheh a si ding. Jerusalem cu a kiangkap ram hnakin a sang cuang ding. Hi khawpi cu Benjamin kotka ihsin hlanlai ih kotka an rak umnak Akil Kotka timi tiang a kau ding; cule Hananel innsang ihsin siangpahrang sabit rialnak hmun tiang a si ding. 11Cutawkah mipi pawl cu humhimnak le thlangamnak thawn an um ding ih siatsuahnak zianghman an phang lo ding.
12 Bawipa in Jerusalem a dotu miphun pawl parah tuksumza natnak a thlengter ding. An nung cungin an taksa a ṭawt ding; an mit le an lei pawl tla an ṭawt ṭheh ding.
13Cutikah Bawipa in an thin phangter in an lung a buaiter ding ih mi hmuahhmuah in an kiangih a ummi milai pohpoh kai tahrat in pakhat le pakhat an thawi aw ciamco ding. 14Judah mi pawl in Jerusalem an ṭan ding ih ral an do ding. Miphun tampi ih thilri le lennak cu an long ding: sui, ngun le hnipuan ticawk loin an lak ding.
15An ral pawl riahhmun ih a ummi ṭilva hmuahhmuah: rang pawl, laak pawl, kalauk pawl le laak faate pawl par khalah tuksumza natnak a thleng ve ding.
16Cule Jerusalem a dotu miphun pawl sungin a taangsun pawl cu Ziangkimtithei Bawipa cu siangpahrang a si tiih biak dingah le Puanthlam Puai tuah dingah kumtinte Jerusalem khua ah an feh ding. 17Ziangkimtithei Bawipa cu siangpahrang a si tiah biak ding a eltu le a feh duh lotu leilung tlunih miphun pakhatkhat an um ahcun an ramah ruah a sur lo ding. 18Izip mi pawl in Puanthlam Puai an tuah duh lo ih an feh duh lo a si ahcun Jerusalem feh a eltu le Pathian a bia duh lotu pawl parih tuksumza natnak Bawipa ih a thlentermi cu an parah a thleng ve ding. 19Izip mi siseh, miphun dang siseh, Puanthlam Puai an tuah duh lo a si ahcun cubangtuk hremnak cu an parah a thleng ding.
20Cutikah cun rangleng hnuktu rang pawl parih thlaih mi darkhingte par hmanah “Bawipa ih ta, a thianghlimmi a si,” tiah ngan ṭheh a si ding. Biakinn sungih rawl suannak beel pawl cu biakṭheng hmai ih kheng pawl vekin bungbeel thiang an si ding. 21Jerusalem le Judah ram pumpi sungih a ummi beel pohpoh cu Ziangkimtithei Bawipa biaknak hrangah a dangte in ret an si ding. Cuih beel cu thawinak a petu pawl in an pekmi thawinak sa suannak ah an hmang ding. Cuih ni a thlen tikah Ziangkimtithei Bawipa ih Biakinn sungah thil zuartu le thil leitu pakhat hman an um nawn lo ding a si.
Currently Selected:
ZEKHARIAH 14: FCL
Highlight
Share
Copy
Want to have your highlights saved across all your devices? Sign up or sign in
Falam Bible Revision © Bible Society of Myanmar, 2002.