ZEKHARIAH 12
12
Jerusalem A Luat Ding
1Israel thuhla cu Bawipa ih hnen ihsin hiti in a ra thleng. Van tla khi a pharhtu Bawipa, leilung a seemsuah ih minung nunnak thlarau a petu Bawipa cun hiti in a sim: 2“Jerusalem cu khuat pakhat sungih sabitti vekah ka tuah ding; a kiangkap in miphun pawl cun an in ding ih zuri bangin an sawn ding. Cule Jerusalem an kulh tikah Judah ram khua dangdang tla an kulh thluh ve ding. 3Sikhalsehla cuih tikcu a thlen tikah Jerusalem cu a rit zetmi lungto ah ka tuah ding ih cawi a tumtu miphun cu tuahmawhnak a tong ding. Leilung tlun miphun hmuahhmuah cu Jerusalem do dingah an ṭangkhawm ding. 4Cuih tikcu ah an rang pawl cu an thin ka phangter ding ih rang parih a totu hmuahhmuah an thinlung ka aa-ter ṭheh ding. Judah mi pawl cu ka kilkhawi ding, a sinan an ral pawl ih rang mit cu ka cawtter ṭheh ding. 5Cutikah Judah hrin pawl cun, “Bawipa Cungnungbik Pathian in Jerusalem ih a ummi a minung pawl hnenah thazaang a pek a si,” tiah pakhat le pakhat an sim aw ding.
6“Cutikah Judah hrin pawl cu hramlak meisa tom bangtuk, a si lole vainim lo ih vainimkau kaang parih beel bangtuk ah ka tuah ding an kiangkap ih miphun hmuahhmuah an siatsuah thluh ding. Jerusalem khua mi pawl cu khawpi sungah an him ko ding.
7“David tesinfa pawl le Jerusalem mi pawl ih ngah dingmi hminthannak kha Judah mi pawl ih ngah dingmi hnakin a thupit sawn lonak dingah hmaisabik ah Judah ralkap pawl hnenah Bawipa keimah in nehnak ka pek ding. 8Cutikah Jerusalem ih a ummi pawl cu Bawipa in a hum ding ih anmah lakih mi ṭawnṭai bik hman David tlukin a cak ding. David tesinfa pawl cun Bawipa ih vancungmi vekin lam an hruai ding; amah Pathian vek rero an si ding. 9Cutikah cun Jerusalem a dotu miphun hmuahhmuah cu ka siatsuah ṭheh ding.
10“David tesinfa pawl le Jerusalem khua ih midang pawl cu zaangfah lainatnak thinlung le thlacam duhnak thinlung thawn ka khahter ding. Mi pakhat an sun ciami kha an zoh ding ih an fa neihsun a thih ih an ṭah vekin an ṭah ding. An fapatir a thih ih ninghang le lungngai ih an um vekin an um ding. 11Cutikah cun Jerusalem khawsungih ṭahnak cu Megiddo phairawn ah Hadad-rimmon#Hadad-rimmon hi Baal khawzing ih hmin pakhat a si. Kanaan ram le Siria ramah cun hanghnah hangrah khawzing a si tiah an zum ih hanghnah hangrah kumtinte a thih tikah an khawzing a thi ve tiin an ruat. hrangih ṭahnak vekin a nasa ding a si. 12-14Hi ram innsang tinah mahte ciar lungngai in an um ding. David tefa sin innsang pawl, Nathan tesinfa innsang pawl, Levi tesinfa innsang pawl, Shimei tesinfa innsang pawl le innsang dang pawl tla cuticun an um ding. An innsang ciarah lungngai in an um ding ih mipa le nunau cu hmun dangdang ah lungngai in an um ding,” a ti. Guam.
Currently Selected:
ZEKHARIAH 12: FCL
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
Falam Bible Revision © Bible Society of Myanmar, 2002.