MATTHAI 20

Sabit Hmuan Hnaṭuantu Pawl

1Jesuh in, “Vancung Uknak cu hi bangtuk hi a si. Mi pakhat cu a sabit hmuan sungih hnaṭuantu hawl dingah zingthlapit in a feh. 2Nikhat hlawhman ngun tangka fangkhat#‘Nikhat hlawhman ngun tangka fangkhat’ timi hi Grik ṭong cun ‘denarius’ an ti ih innsang sungkhat in ni khat rawl-einak khop a si. pe dingin a lung a kim ih a hmuan ah hnaṭuantu pawl cu a thlah. 3Zinglam nazi pakua ah dawr hmunah a va feh ih mi-umlak ṭhenkhat a va hmu. 4Cupawl hnenah, ‘Nannih tla sabit hmuanah va feh uhla hna va ṭuan ve uh; nan nihlawh a tawkzawn in ka lo pe ding,’ tiah a ti. 5Cuticun an feh. Cuvek ṭhiamṭhiam in nazi hleihnih ah le zanlam nazi pathum ah a dang a thlah lala. 6Zanlam nazi panga zikte ah dawr hmun ah a feh sal ih minung ṭhenkhat an rak ding hrih kha a hmu. ‘Ziangah so zianghman tuah lo in sun nihlawh nan ding ih nan tikcu nan cemter?’ tiah a sut. 7Annih in, ‘Zohman in hnaṭuan in pek lo ruangah a si,’ tiah an sawn. Anih in, ‘Cuti a si ahcun sabit hmuan ah feh uhla va ṭuan ve uh,’ tiah a ti.

8“Zanlam a hung si tikah hmuan neitu pa in hmuan uktu pa cu ‘Hmuan hnaṭuantu pawl cu ko hai awla an nihlawh pe aw, a neta bikih a ṭuantu pawl in thok awla a hmaisa bikih a ṭuantu pawl tiang,’ tiah a ti. 9Zanlam nazi panga-ih hnaṭuan a thoktu pawl cu an hlawhman ah ngun tangka fangkhat ciar pek an si. 10Cuhrangah hmaisa bikih hnaṭuan fialmi pawl hlawhman la dingih an rat ve tikah tam deuh kan ngah ding tiah an zum; asinain annih khal ngun tangka fangkhat ciar pek an si ve. 11Tangka cu an lak ih hmuan neitu bawi parah cun an phunzai. 12‘Himi pawl neta bikih hna a ṭuantu pawl hi nazi pakhat sung lawng an ṭuan; kannih cu nisasen lakah sunvu kan ṭuan, asinain kanmah zat thotho ni hlawhman na pek,’ tiah an ti.

13“Cutikah hmuan neitupa in pakhat pa hnenah, ‘Ka rual, ngaihnik! Ka lo bum lo a si. Ni khat hlawhman cu ngun tangka fangkhat si dingin na lung a rak kim a si lo maw? 14Nan hlawhman cu la uhla inn ah tlung uh. Neta bikih hnaṭuan ka fialmi pa khal hi nan ngahzat a ngah ve ding cu ka duhmi a si. 15Ka tangka cu ka duh vekih hman theinak thu ka nei a si lo maw? An parih tirh ka sian ruangah nan nahsiik maw si?’ a ti,” tiah a sim.

16Cule Jesuh in, “Curuangah neta bik pawl cu hmaisabik ah an cang ding ih hmaisa bik pawl cu neta bikah an cang ding,” tiah a ti.

A Thihnak Ding Thu

(Mar 10.32-34; Luk 18.31-34)

17Jesuh cu Jerusalem lamih a feh laiah khan dungthluntu hleihnih kha a dangte ah a hruai ih an mahte lawng, an feh phah ah, thu a ruah hai. 18“Ngaihnik uh! Jerusalem ah kan hung feh ding ih cutawkah Milai Fapa hi puithiam upa pawl le Daanthiam pawl kut ah an thlen ding ih that dingin an rel ding. 19Cuih hnuah Zentail mi pawl kut ah an thlen ding. Cun Zentail mi pawl in an hmuhsuam ding, an vuak ding ih thinglamtah ah an kheng ding. Sikhalsehla ni thumnak ah thawhter sal a si ding,” tiah a ti.

Nu Ih Zaangfah Dilnak

(Mar 10.35-45)

20Cule Zebedi nupi cu Jesuh hnenah a fapa pahnih thawn an ra; Jesuh hmaiah cun a kun ih zaangfah a dil.

21“Ziang so na duh?” tiah Jesuh in a sut.

Anih in, “Siangpahrang na si tikah ka fapa pahnih hi na vorhlam le na kehlamih an to theinak dingah thu i kam aw,” tiah a ti.

22Jesuh in, “Nan dilmi hi ziang kan dil ti nan thei lo. Ka in ding mi tuarnak khuathai hi nan in thei ding maw?” tiah a sut.

A fapa pahnih cun, “Kan in thei ding,” an ti.

23Jesuh cun, “Ka in dingmi khuathai cu nan in thei ve ngai men ding. Asinain ka vorhlam le ka kehlam ah zo a to ding ti a hriltu cu kei ka si lo. Hi tonak tla cu ka Pa in a timtuah sak ciami pawl hrangah a si,” tiah a ti.

24Cuih thu cu dungthluntu dang pahra in an theih tikah cute unau hnih parah an thin a heng ngaingai. 25Curuangah an zatein Jesuh in a ko khawm ih, “Nan theih vekin leilung tlunih uktu pawl cun an ukmi pawl kha an lal-hnawh hai ih hotu pawl khal in thu an nei ngaingai. 26Asinain nannih lakah cun cu bangtuk cu si hlah seh. Nanmah lakah pakhatkhat in mi dang hnakih thupit a duh ahcun midang pawl ih hnen-um a ṭuan a ṭul; 27nanmah lakah pakhatkhat in hmaisa bik si a duh asile nan sal a si hmaisa a ṭul. 28Milai Fapa cu rianmi si loin mi riantu si dingah le mi tampi tlen dingah a nunnak pe dingin a ra a si,” tiah a ti.

Jesuh In Mitcaw Pahnih A Damter

(Mar 10.46-52; Luk 18.35-43)

29Jesuh le a dungthluntu pawl kha Jerikho ihsin an suah laiah mi tampi in an thlun. 30Lamzin kiangih a rak tomi mitcaw pahnih in Jesuh an kiangte ihsin a feh ti kha an theih tikah, “Maw David fapa, in zaangfah hram aw,” tiah an au.

31Mi senpi pawl in daiteih um dingin an kawk. Asinain an dai cuang lo. “David fapa, in zaangfah hramhram aw,” tiah ring sinsin in an au.

32Jesuh cu a ding ih an pahnih in a ko. “Ziang tuah sak so nan duh?” tiah a sut.

33Annih in, “Bawipa, khua in hmuter hram aw,” tiah an ti.

34Jesuh in a zaangfah hai ih an mit cu a tham. Hmakhatteah khua an hmu thei sal ih amah cu an thlunta.

Currently Selected:

MATTHAI 20: FCL

Highlight

Copy