MATTHAI 18

Zoso A Tum Bik

(Mar 9.33-37; Luk 9.46-48)

1Cuih caanah dungthluntu pawl cu Jesuh hnenah an ra ih, “Vancung Uknak ah zoso a tum bik?” tiah an sut.

2Cutikah Jesuh in nauhakte pakhat a ko ih an hmaiah a dinter hnuah, 3“Fiangtein ka lo sim: nan thinlung nan thleng ih hi nauhakte bangtuk nan si lo ahcun vancung Uknak sungah nan lut dah lo ding. 4Mi tangah a dor ih hi nauhak bangtuk a si mi cu vancung Uknak sungah a tum bikmi a si. 5Cun ka hmin in hi bangtuk nauhakte a cohlangtu cu keimah a cohlangtu a si.

Sual Forhnak

(Mar 9.42-48; Luk 17.1-2)

6“Zokhal in hi nauhakte pakhatkhat keimah i zumnak ihsin a pialtertu cu a hngawng ah fangcang rialnak lungtum thlaih tahratin tifinriat sungah thlak sisehla amah ih hrangah a ṭha sawn. 7Leilung tlunah hin zumnak pialtertu thil tampi an um hi a poi ngaingai. Cubangtuk cu a um ringring ko ding; cutiih mi a pialtertu pawl cu an hrangah a poimawh bik miangmo a si.

8“Nan kut in siseh, nan ke in siseh, nan zumnak a lo pialter a si ahcun tan uhla hlon uh. Kut pahnih le ke pahnih thawn kumkhua meisa sungih nan tlak hnak cun kut lo le ke loin nunnak sungih nan luh a ṭha sawn. 9Cule nan mit in nan zumnak a hlohter a si ahcun phorh uhla hlon uh. Mit pahnih thawn hell meisa sungih tlak hnak cun mit pakhat lawng thawn nunnak sungih luh a ṭha sawn.

A Hlomi Tuu Tahṭhimnak

(Luk 15.3-7)

10“Hi bangtuk nauhakte nan zawmtai lonak dingah ralring uh. Fiangtein ka lo sim: anmah kilvengtu vancungmi pawl cu vancungih ka Pa ih hmaiah an um ringring a si. 11Milai Fapa cu a hlomi hawl dingah a ra.#Kut ngan cabu ṭhenkhat ahcun 18.11, ‘Milai Fapa cu a hlomi hawl dingah a ra,’ timi hi a tel lo. (Luka 19.10 sung lawngah a tel.)

12“Tuu zakhat a nei mipa in a tuu pakhat a hloh le ziang a tuah ding tiah nan ruat? Tlang parih hrampi a piat reromi a tuu sawmkua le pakua cu a taanta ding ih a hlomi tuu pakhat hawl dingah a feh ding. 13Fiangtein ka lo sim: a hmuh tikah a hlo lomi sawmkua le pakua hnakin a hlomi tuu pakhat parah a lung a awi sawn a si. 14Cubangtuk ṭhiamṭhiam in vancungih a ummi nan Pa in hi nauhaktete lakih pakhat hman hlo dingah a siang lo a si.

A Sualmi Unau

15“Nan unau pakhat nan parih a sual ahcun va feh uhla a sualnak va sim uh. Asinain zohmanih theih loin nanmah lawng tong aw uh. Nan thu a lo ngai a si ahcun nan unau nan ngah sal a si. 16Asinain nan thu a ngai lo a si ahcun theihpitu pakhat maw pahnih maw fehpi uh. Ca Thianghlim in, “Sual puh awknak hmuahhmuah cu theihpitu pahnih maw, cuhnak tam maw um hai seh,” a ti vekin na fehpi mi cu thutheitu an si ding.#Daan 19.15 17Cule nan thu a ngai lo a si ahcun a thuhla pawl kimtein kawhhran hnenah nan sim pei. A netnak ah kawhhran ih thu khal a ngai lo a si ahcun amah cu khawvelmi a si lo ah siahkhongtu tlukah va ruat uh.

Khammi Le Kham Lomi

18“Cun nan zatein ka lo sim: leilung tlunih nan khammi cu vancung khalah kham a si ve ding; cule leilung tlunih nan thlahmi cu vancung khalah thlah a si ve ding.

19“A dang ka lo sim hrih ding: leitlun ah thlacam in nan dil mi thu ah mi pahnih nan lungkim tlang in thla nan cam a si ahcun vancungih a ummi ka Pa in a lo tuahsak ding. 20Ziangahtile ka hmin in mi pahnih siseh, pathum siseh, nan pumkhawm tikah nan hnenah ka um ve a si,” tiah a ti.

Mi Ngaidam Lo Hnen-um

21Cun Jesuh hnenah Piter cu a ra ih, “Bawipa, ka unau pakhatkhat ka parih a sual ahcun voi ziangzat tiangso ka ngaidam ding? Voi sarih tiang maw?” tiah a sut.

22Jesuh in, “Si hlah ee, voi sarih tiang lawng a si lo; voi sawmsarih ih let sarih tiang na ngaidam pei; 23ziangahtile vancung Uknak cu hi bangtuk in a si. Voi khatah Siangpahrang pakhat a um ih a hnen-um pawl ih hnaṭuan daan kha zingzoi a tum. 24A zingzoi pekte ah tangka thawng tampi a baaktu a hnen-um pakhat a hnenah an run hruai. 25Cuih hnen-um pa cun leiba samnak tangka ziang hman a nei lo. Cu ruangah siangpahrang in cupa cu a leiba kuannak dingah a nupi le a faate pawl le a neihmi hmuahhmuah thawn salih zuar ṭheh dingin thu a pek. 26Siangpahrang hmaika ah hnen-um pa cu a bok ih, ‘I zaangfah awla i hngak hrih hram aw. Ka lo kuan ṭheh ko ding,’ tiah a dil ciamco. 27Siangpahrang cun a zaangfah ih a leiba cu a olh ih a thlah.

28“Cule cupa cu a feh ih amah leiba malte a rak baaktu a hawipi hnen-um pa pakhat a tong. Cupa cu a kai ih a hngawng in a deek ih, ‘I baakmi i pe aw,’ tiah a ti. 29Cuih hnen-um pa cu a bok ih, ‘I zaangfah awla i hngak hrih hram aw. Ka lo kuan ko ding,’ tiah a dil ciamco. 30Asinain a ngaidam duh lo. A leiba a kuan ṭheh hlan lo thawngah a thlak. 31Cumi cu hnen-um dang pawl in an hmuh tikah an thin a nuam lo ngaingai ih siangpahrang hnenah an feh ih cuih thuhla cu an va sim ṭheh. 32Cutikah siangpahrang in cuih hnen-um pa cu a ko ih, ‘Nang sal ṭha lo. I dil ciamco ruangah i baakmi hmuahhmuah ka lo olh a si. 33Na parih zaangfahnak ka neih vekin na hawipi parah zaangfahnak nei ve ding mawi na si,’ tiah a ti. 34Siangpahrang cu a thin a heng ngaingai ih cupa cu a leiba zate ih a sam ṭheh hlan lo thawngah a thlak,” a ti.

35Cule Jesuh in, “Zokhal nan unau kha nan thinlung ngaingai in nan ngaidam lo a si ahcun vancungih a ummi ka Pa in cuih hnen-um pa bangtuk in a lo tuah ve ding a si,” tiah a sim.

Currently Selected:

MATTHAI 18: FCL

Highlight

Copy