MALAKHI 2
2
1Ziangkimtithei Bawipa in puithiam pawl hnenah, “Hi thupekmi cu nanmah hrangah a si. 2Nan thiltuahmi in ka hmin upat uh. Ka thusimmi nan ngai lo a si ahcun nan parah siatcamnak ka thlengter ding. Nan pumcawmnak hrangih nan ngahmi thil parah siatcamnak ka thlengter ding. Thungai ti ahcun cuih thil parah siatcamnak ka thlengter zo, ziangahtile ka thupekmi zianghman ah nan siar lo. 3Nan faate pawl ka hrem ding; nan hmaiah thawinak nan pekmi ṭilva ih eek ka maan ding ih eek tlang ah hruaihlo nan si ding. 4Cuti cun Levi tesinfa puithiam pawl thawn thukamnak ka tuahmi cu balsiat ṭheh a si lonak dingah hi thu a petu cu keimah ka si kha nan thei ding,” tiah Ziangkimtithei Bawipa in a ti.
5“Keimah in upatnak dingah ka thukamnak sungah nunnak le harhdamnak pe dingah ka tiam ih ka tiam vekin ka pek. Culai ahcun in rak upat ih in rak ṭihzah. 6A ṭha lo an rak zirh lo, a dikmi lawng an rak zirh. Keimah thawn tla kan rem-aw zet; anmah in a dikmi an tuah lawng si loin midang in thil ṭha lo an tuahmi an tuah nawn lonak dingah mi tampi an zirh ih an bawm a si. 7Pathian thu dik teih an theihnak dingah mi zirh ding cu puithiam pawl ih ṭuanvo a si. Ka duhmi le ka tummi an theihnak dingah mipi pawl in an pan ding, ziangahtile puithiam pawl cu Ziangkimtithei Bawipa ih palai an si.
8“Sikhalsehla atu-ahcun nanmah puithiam pawl riangri lamzin dik ihsin nan pial zo. Nan thuzirhnak ruangah mi tampi in thil sual an tuah. Nanmah thawn ka tuahmi thukamnak cu nanmah in nan bal zo. 9Cutiih ka thu nan ngai lo ruangah, thu ka tuah ding ih Israel mi pawl in an lo hmuhsuam thung ding ih an lo mualphoh ding; ka minung pawl thu nan zirh tikah thleidan nei in nan zirh a si,” a ti.
Misenpi Rintlak Lo An Si
10Kan zatein pa pakhat ih fa kan si lo maw? Pathian pakhat in kan zatein in tuah a si lo maw? Cuti asile ziangah so pakhat le pakhat karlakah thukamnak kan tuahmi cu kan bal cingcing ih Pathian in kan pupa pawl thawn thukamnak a tuahmi cu kan nautat? 11Judah mi pawl in Pathian hnenih thukamnak an tuahmi an bal ih hi ram le Jerusalem khua sungah tuksumza thilsual an tuah. Bawipa in a duhzetmi Biakinn cu an borhhlawhter zo. Ramdang khawzing a biatu nunau pawl an nupi ah an ṭhit. 12Hi bangtuk a tuahtu pawl cu Bawipa in Israel miphun sungin hlon hram sehla, kan miphun in Ziangkimtithei Bawipa hnenih thawinak an peknak ah ziangtik hmanah tel ve nawn hram hlah hai seh.
13Thil dang pakhat nan tuah hrihmi cu, hihi a si. Bawipa hnenih nan pekmi thawinak a lo saan nawn lo ruangah nan ninghang in nan ṭap nan ai ih a biakṭheng cu nan mitthli in nan ciah a si. 14Ziangah so in saan lo? tiah nan sut. Ziangah a lo sang lo tile nan no laiih nan ṭhitmi nan nupi thawn thukamnak nan tuahmi nan balmi kha a thei a si. Nan nupi cu nan rualpi ṭha bik a si: rintlak pasal ka si ding tiah Pathian hmaiah thukamnak nan tuah, asinain cuih nan thukammi rori cu nan bal. 15Nan nupi thawn taksa khat le thinlung khat ah Pathian in a lo tuah a si lo maw? Hitiih a tuah tikah a tumtahmi ziangso a si? A tumtahmi cu faate nan neih ih Pathian minung ngaingai ih an cannak dingah a si. Curuangah zokhal siseh, a nupi hnenih thukamnak a tuah vekin kimter seh; zohman in a thukammi cu bal hlah seh. 16Bawipa Israel ih Pathian in, “Nupi maak cu ka hua. Cubangtuk thilsual nanmah lakah pakhatkhat in na nupi parih nan tuah tikah ka hua a si. Rintlak pasal si dingah na nupi hnenih thukamnak na tuahmi kha bal lo dingah ralring aw,” tiah a ti.
Thuṭhennak Ni A Nai
17Nan ṭongtam in Bawipa cu a ning zo. Asinain nannih cun, “Ziangtin so Bawipa cu kan nin?” tiah nan sut. Nannih in, “Ziangkimtithei Bawipa in thil ṭha lo a tuahtu pawl cu mi ṭha an si tiah a ruah; thungai ih ticun a duhzet hai a si,” nan ti. Asilole “A dingzet ih ruahmi Pathian cu khui ah so a um?” tiah nan sut. Cuvek ih nan ṭong in Bawipa cu a ning tuk zo a si.
Currently Selected:
MALAKHI 2: FCL
Highlight
Share
Copy
Want to have your highlights saved across all your devices? Sign up or sign in
Falam Bible Revision © Bible Society of Myanmar, 2002.
