LUKA 17
17
Sualnak
(Mat 18.6-7, 21-22; Mar 9.42)
1Jesuh in a dungthluntu pawl hnenah, “Sualnak sungih mi a tlatertu thil cu a ra thleng ringring ko ding; asinain cuih thil a thlentertu ih hrangah cun tuksumza a si. 2Hi nauhak pakhatkhat a sualter hnak cun a hngawng ah fang rialnak lungtumpi kha thlaih tahratin tifinriat sungah hlon sehla amah hrangah a ṭhasawn. 3Curuangah thil nan tuahmi ah ralring uh.
Na unau a sual ahcun nunsim aw; a sir awk ahcun ngaithiam aw. 4Na parah ni khat sungah voi sarih tiang sual hmansehla na hnenah ra tahratin ‘Ka sual ka sir aw a si,’ a ti ahcun ngaithiam aw,” tiah a ti.
Zumnak
5Dungthluntu pawl in, “Kan zumnak hi ṭhangter sin aw,” tiah an Bawipa cu an ti.
6An Bawipa cun, “Nannih in anṭam ci tia zumnak nan neih ahcun hi thingtheihmu kung hi ‘Na hram in phong aw awla tifinriat sungah va phun aw aw,’ nan ti thei ding ih nan ti vekin a cang ngaingai ding.
Hnen-um Ih ṭuanvo
7“Thuṭhimnak ah nanmah lakah pakhatkhat in hnen-um pakhat a nei tibang sehla, cuih hnen-um cu lei a let, a si lole tuu a khal ti sehla, innih a ra tlun tikah ‘Zamrang awla na rawl ei aw,’ nan ti ding maw? 8Nan ti lo ding! Cuhnakin amah cu ‘Ka hrangah zanriah i suan sak aw; cule na rawl suannak thuam hruk awla rawl ka ei sung i kil aw; cuih hnu lawngah nang cu rawl na ei leh ding,’ nan ti ding. 9Hnen-um pa cu thu nan pekmi a tuah ṭheh ruangah lungawinak ṭongkam a parah nan ṭong dah maw si? 10Cuvek thotho in nanmah par khal ah a si ve: tuah uh, tiih an lo timi nan tuah ṭheh tikah ‘Kannih cu lom tlak lo hnen-um men kan si. Kan ṭuanvo a ṭuantu lawng kan si,’ tiah ti uh,” tiah a sim.
Jesuh In Mi Pahra A Damter
11Jesuh cu Jerusalem lam a pan zawng ah Samaria le Galilee ramri a pal phah vivo. 12Khua pakhat a va thleng ih cuih khawsungih phaarnat in a nami pahra in an rak tong. Lamhlat nawnah an ding ih, 13“Maw Jesuh, Bawipa, in zaangfah hram aw,” tiah an au.
14Jesuh in a hmu ih an hnenah, “Va feh uhla puithiam pawl in lo zoh hai seh,” tiah a ti.
An feh laifangah cun an dam ṭheh. 15Anmah lakih pakhat pa in a dam ṭheh zo ti kha a hmuh awk tikah a kirsal ih aw ring zetin Pathian a thangṭhat. 16Hmakhatteah Jesuh kehram leilungah cun a bok ih Jesuh hnenah lungawi thu a sim. Cupa cu Samaria mi pa a si. 17Jesuh in, “Damnak a ngahtu cu mi pahra an si. Pakua teh khui-ah so an si? 18Ziangah so hi ramdang mi pakhat lawng Pathian hnenih lungawinak pe dingah a rat?” a ti. 19Cule Jesuh in, “Tho awla feh aw. Na zumnak in a lo damter zo,” tiah a ti.
Pathian Uknak A Ratnak Thu
(Mat 24.23-28, 37-41)
20Farasi mi ṭhenkhat in, “Ziang tikah so Pathian Uknak a ra thlen ding?” tiah Jesuh cu an sut. Jesuh in, “Pathian Uknak cu mithmuh in a ra lo. 21Zohman in ‘Zohhnik uh! Hinah a um hi! Khinah a um khi!’ tiah an ti lo ding. Ziangahtile Pathian Uknak cu nan sungah a um a si,”#“Nan sungah a um,” timi hi “nan lakah a um,” a si lole “nan hnenah a lang cing ding,” ti khal a si thei. tiah a ti.
22Cule a dungthluntu pawl hnenah, “Milai Fapa ih caan ni khat tal hmu ve thei sehla tiah saduh nan thah tikcu a ra thleng ding, asinain nan hmu lo ding. 23Nan hnenah ‘Zoh uh! Khinah a um! Zoh uh! Hinah a um!’ tiah a lo titu an um ding. Sihmansehla zoh dingah va feh hlah uh. 24Nimthlakau in van khatlam kap ihsin khatlam tiang a hrawh ih a tlet ṭheh vekin Milai Fapa cu amah ih ni ahcun a si ve ding. 25Asinain hmaisabik ah amah in tuarnak nasazet a tong ding ih tuihsan minung pawl in an hnong ding. 26Noah sanlai ih a rak can zo bangin Milai Fapa san khalah a cang ve ding. 27Noah a lawng sungah a lut ih tilik a tlung ih mi hmuahhmuah an thih ṭheh hlan tiangin mizapi cu an nuam, an ei an in ih an ṭhi aw rero lai. 28Lot sanih a rak si zo bangtuk in a si ve ding. Zozo khal zu an in, sa an ei; thil an lei, thil an zuar; thlai an ciing ih inn an sak. 29Lot in Sodom a tlansan ni ah van ihsin meisa le kaat ruahpi bangin a rung sur ih mi hmuahhmuah an thi ṭheh. 30Milai Fapa a rung lang ni ahcun cuvek in a si ve ding.
31Cuih ni ahcun a inn diphun ih a umtu cun a innsungih a ummi thilri la dingah ṭum hlah seh. Cuvek thothoin lo ih a rak umtu cu inn ah tlung hlah seh. 32Lot ih nupi kha nan ciing lai maw? 33Zokhal amah ih nunnak hum a tumtu cu a nunnak a sung ding; a nunnak a liamtu cun a nunnak a hum ngah ding. 34Thungai in ka lo sim: cuih zaan ah ihkhun pakhat ah mi pahnih an ittlang ding; pakhat cu a lak ding ih pakhat cu a taanta ding. 35Nunau pahnih sum an deng tlang ding; pakhat cu lak hlo a si ding ih pakhat cu taanta a si ding,” tiah a ti. 36(“Mi pahnih lo ah hna an ṭuan tlang ding: pakhat cu lak hlo a si ding ih pakhat cu taanta a si ding,” tiah a ti.)#Luka 17.36 hi kut ngan cabu hrekkhat sungah a um lo.
37Dungthluntu pawl cun, “Bawipa, khui tawkah so?” tiah an sut.
Jesuh in, “Ruak a umnak hmun ahcun langta an khawm aw ding,” tiah a sim.
Currently Selected:
LUKA 17: FCL
Highlight
Share
Copy
Want to have your highlights saved across all your devices? Sign up or sign in
Falam Bible Revision © Bible Society of Myanmar, 2002.
