JOB 8
8
Bildad in hiti in a ti:
1-2Thli vek a si mi thulolak
na ṭong rero cu na ṭheh zo maw?
3Pathian in thuding cu a merh
dah lo;
A dik lo khal a tuah dah lo.
4Na faate pawl Pathian parih
an sual ruangah,
An sualnak vekin cawhkuan a pek.
5Asinain atu cun Ziangkimtithei
Pathian dil aw.
6Na thiang ngaingai ih na fel
taktak a si ahcun,
Pathian in a ra lo bawm ding ih
Na innsang a lo tungding sal pei,
Laksawng tla a lo pe ding a si.
7Na lennak na sunmi pawl cu
zianghman an si lo ding,
Pathian ih a lo pek dingmi thawn
ṭhim ahcun.
8Khuahlan laiih fimnak pawl
vun zohsal hnik,
Kan pupa pawl ih an theihmi thutak
pawl vun ruatsal hnik.
9Kan nunnak hi a tawi tuk ih
kan theihmi zianghman a um lo.
Leilung parah hin phenthlam
bangin kan lan.
10Sikhalsehla khuahlan mifim pawl
in lo zirh hai seh,
An sim ṭheumi hi ngaihnik aw;
11“Papairas cu tidai um lonak ah
a kho dah lo;
Phaipheng cu a ciarlonak hmunah
a um dah keel lo.
12An noteet lai ih hman tlak
an si hlan hmanah
Tidai a kang a si ahcun an vuai
hmaisa bik a si.
13Pathian thei lotu pawl cu cuvek
an si.
An ruahsannak a cem, Pathian tel
loih an nun hnu ahcun!
14Pat phangkhat, maimom innraang
phangkhat khi an rinsan;
15Maimom innraang phangkhat an
hngauhsan ahcun a din ding maw?
Pat phangkhat an vawk ahcun
an ding sal thei ngai ding maw?”
16Miṭha lo pawl cu sun ni tlang ih
hrampi bangin an kho,
Hmuan ih a hrih a khat ṭheh mi
hrampi bangin a kho a si.
17An hrih in lungto an ngerh ih
Lung a ummi pohpoh an zeel ṭheh.
18Asinain vun bawt-awla an cem fai;
Cutawkih an um kha zohman in
an thei nawn lo ding.
19Asi, miṭha lo pawl ih lungawinak
cu cuvek in a cem;
Midang an ra ih an umnak
an luah ṭheh.
20Sikhalsehla Pathian in mifel cu
a hnong lo ding.
Miṭha lo pawl ih baan khal
a cakter cuang lo ding.
21Na mithmai ah lungawinak
a cuang ding ih,
Na kaa cu hnihnak in a khat ding.
22Asinain a lo huatu pawl cu
an ning a zakter ding;
Miṭha lo pawl ih innsang cu
an hloralta ding.
Currently Selected:
JOB 8: FCL
Highlight
Share
Copy
Want to have your highlights saved across all your devices? Sign up or sign in
Falam Bible Revision © Bible Society of Myanmar, 2002.
