JEREMIAH 6

Ral In Jerusalem An Kulh

1Maw Benjamin mi pawl, himnak hmun ah tlan uh; Jerusalem ihsin tlansuak uh! Tekoa ah tawtawrawt tum uhla Beth Hakkherem ah meisa in theihternak langter uh. Harsatnak le siatralnak cu saklam ihsin a rung ding a si. 2Zion khawpi, a mawizet le a nal zenzenmi cu siatsuah ṭheh a si ding. 3Cutawkah an ralkap pawl thawn siangpahrang an riak ding. Khawpi kimvel ah an riahbuk an sak ding ih an duhnak kip ah an riak ding. 4Cu pawl in, “Jerusalem nam dingah timtuah uh, tiar-aw uh, sun ah kan do ding,” tiah an au ding. Asinain, “A tlai tuk zo; khua a tlai zo ih thimlam a pan zo. 5Zan khuathim ah kan do ding ih khawpi kulhnak phar pawl kan balsiat ṭheh ding,” an ti sal ding.

6Cungnungbik Bawipa in hi siangpahrang pawl hnenah Jerusalem khawsung thingkung pawl hau dingah le Jerusalem donak hrangih leipawng dawl dingah thu a pek. Bawipa in, “Hi khawpi cu namnuainak in a khah ruangah ka hrem ding. 7Tikhur in tidai a thar a irh ringring bangin hi Jerusalem khawpi in thilsual a thar in a suah ringring. Thawiawknak le siatsuahnak in a khat ih hi khawpi sungah natnak le hma lawnglawng ka hmu. 8Maw Jerusalem mi pawl, hi harsatnak hi nan ralrinnak ah cang seh. Culole nannih cu ka lo dungtun ding ih nan khawpi cu zohman an um duh lonak nelrawn ah ka tuah ding,” tiah a ti.

Mi Dodal Duhtu Israel

9Cungnungbik Bawipa in ka hnenah, “Israel cu sabit rah an lawh faimi sabit hmuan kolh bangin a kolh ve ding. Curuangah tikcu a um laiah na runsuak theizat na run pei,” tiah i ti.

10Cutikah kei in, “An hnenah ka ṭong ih ralrinnak thu ka sim khalle zo inso in ngai duh ding? Mi lungruh an si ih an hna phit in nangmah ih thu hman an ngai duh lo; an hnenah phuan dingih i simmi hman an hnihsan men a si. 11An parih na thinhengnak cu ka sungah meisa bangin a alh ve ih daitein ka umpi thei nawn lo a si Bawipa,” tiah ka ti.

Cutikah Bawipa in ka hnenah, “Ka thinhengnak cu lamzin ih nauhak pawl parah le a bur in a tlangmi mino pawl parah burh aw. Nupi le pasal pawl khal an kaih hnuah an fehpi ṭheh ding ih nutar le patar pawl khal an zuah lo ding. 12An innpi pawl midang kut ah a thleng ding ih an lo le an nupi pawl khal midang hnenah pek an si ding. Hi ram mi pawl hi ka hrem thluh hai ding. 13Hi ram mi pawl zozo khal a tum a seen in a ding lo zawng ih tangka ngah lawng an tum. Profet le puithiam pawl hman in mi an bum. 14Ka minung pawl ih hma cu a vun hiik men hma ah an ruat ih, “A ṭha ko, a ṭha thluh ko,” an ti. A ṭha thluh ko cu a rak si naisai fawn lo. 15Hi vek fihnungza thil an tuah ruangah ningzah teh an thiam maw? Thiam hlah! Ningzah zianghman an nei lo. An mithmai hman a sen lo! Curuangah midang vekin nasazetin an tlu ding. Ka hrem tikah cun an cemnetnak a si ding. Keimah Bawipa in ka sim zo a si,” tiah a ti.

Israel In Pathian Lamzin a Hnong

16 Bawipa in a minung pawl hnenah, “Lamzin ṭeek ah ding uhla khua cuan uh. Khuahlan lamzin le lamzin ṭha bik khuiah so a um, tiah sut uh! Cuih lamzin in feh uhla thlangam zetin nan um ding,” a ti. Sikhalsehla annih in, “Kan feh lo ding,” an ti. 17Cule Bawipa in ralrin peknak tawtawrawt ngaitu dingah kilvengtu a ret hai. Asinain annih cun, “Kan ngai duh lo ding,” an ti.

18Curuangah Bawipa in, “Maw leilung miphun pawl, ngai hnik uh! Ka minung parih thil a thleng mi hi thei hnik uh! 19Maw leilung, ngai hnik! Ka thu an ngai lo ih ka thuzirhmi an hnon ruangah le hi bangtuk thil an tumtah ruangah an parah siatsuahnak ka thlengter ding ih ka hrem hai ding. 20Sheba ram ihsin thawinak hrang rimhmui an kenmi le lamhlatpi ihsin zihmui rimthaw an rak kenmi pawl cu zianghman ah ka siar lo. Thil an pekmi khal ka co hlang lo ding ih thawinak an pekmi par khalah ka lung a awi cuang lo ding. 21Curuangah himi pawl hi ka bahter ding ih ka rilhter hai ding. Pa le fa tla hmunkhatah an thi ding ih rualpi le innhnen pawl tla an thi ding,” tiah a ti.

Saklam Ihsin Raldonak

22 Bawipa in, “Saklam ram ihsin mi an rung. Lamhlapi ih miphun cakzet pawl raldo dingah tim an tuah rero. 23An conkiang le an ralnam pawl an keng ṭheh zo. Zaangfahnak le zawnruahnak zianghman nei lo mi an si. An rang an to ih an thawmvang cu tifinriat ih tilet awn thawm an bang. Jerusalem do dingah an tim an tuah ṭheh zo a si,” tiah a ti.

24Jerusalem mi pawl cun, “Cuih thawmvang cu kan thei zo ih kan kut tha khal a zawng thluh. Nunau nau nei bangin donharnak le helhkamnak in kan khat. 25Hramlakah kan suak ngam lo; lamzin khalah kan feh ngamlo, ziangahtile kan ral pawl hriamnam kengin kan kimvelah tuksumza in an khat,” tiah a ti.

26Cule Bawipa in a minung hnenah, “Buri hnipuan hruk uhla vutcam lakah riahsia in lawng rero uh. Nan fapa neihsun a thih ih nan ṭah ding bangin mitthli tla in ṭap rero uh, ziangahtile nanmah do dingih a rami nan ral in rinlopi ah a lo nam ding. 27Maw Jeremiah, thir na hniksak ding bangin ka minung pawl hi hniksak awla ziangvek an si zohhnik! 28An zatein ral tho duh, mi thinlung ruh an si ih, an thinlung cu thir le daar bangtuk ih a hak remremmi an si! Nawhthuh ei pawl, hmunkip ah mi siatnak a thupte ih a rel pawl an si! 29Somei cu a vaam nasa naón thir-eek cu a ti thei nawn lo, a zup thei fawn lo. Ka minung pawl thiangfai hai seh tiih hniksak rero le seep rero cu a lak a si, a man lo; ziangahtile misualral pawl cu hlonhlo an si cuang lo. 30Annih cu thirsia-eek vek an si thlang, ziangahtile keimah Bawipa in ka hnong zo hai a si,” tiah a ti.

Currently Selected:

JEREMIAH 6: FCL

Highlight

Copy