THUṬHENTU 9

Abimelek

1Gideon#Gideon cu Jerub-baal ti tla in an ko. (Thut 6.32 ah zoh.) ih fapa Abimelek cu a nu lamih sungkhat pawl an umnak Shekhem khua ah a va feh. 2A nuih sungkhat pawl hnen ahcun, “Hi khawsung mi pawl hi ‘Gideon fapa minung sawm sarih ih uk nan duh maw? Asilole minung pakhat ih uk nan duh sawn maw?’ tiah sut hnik uh. Keimah cu nanmah ih thi le sa rori ka si tla hi hngilh hlah uh,” tiah ti. 3A nuih sungkhat pawl cun khawsung mi hnenah a ti vek cun an sim. An sungkhat a si ruangah khawsung mi pawl cun Abimelek sawn an hril. 4Cule Baal-berith biakinn sungih ngun tangka sawm sarih an pek; Abimelek in acuih tangka cun amah thluntu dingah zianghman ih ṭhahnem lo, mi hlothlau pawl minung sawm sarih a saang. 5Cule a pa ih khua Ofrah ah a feh ih a pa Gideon sungsuak rori, a unau sawm sarih cu lungto pakhat parah a that ṭheh. Asinain an nauta bik Jotham cu a rak relh ruangah a luat. 6Cun Shekhem khua le Bethmillo ih khawsung mi pawl cu an khawm aw ih Shekhem khua ih sasua kungah an feh hnuah Abimelek cu siangpahrang ah an canter.

7A cuih thu cu Jotham in a theih tikah a feh ih Gerizim Tlang zim ah a ding ih a aw neih patawp in, “Maw Shekhem khawsung mi pawl, i rak thei hram uhla, Pathian khal in lo thei hram seh. 8Khuahlan laiah thingkung pawl in anmah ih hrangah siangpahrang an rak hril. An zatein olif thingkung cu ‘Kan siangpahrang si aw,’ an ti. 9Cutikah olif thingkung in, ‘Zanthing dang pawl uktu meen ah khawzing le minung upatnak ih hmanmi ka hriak hi ka taan siang ding maw si?’ a ti. 10Cun thingkung pawl cun theikung hnenah, ‘Nang kan siangpahrang si aw,’ an ti. 11Asinain theikung in hiti in a let, ‘Nanmah pawl uk ding meen ah ka rah thawzet hi ka taan siang ding maw si?’ a ti. 12Cule thingkung pawl in sabit hri hnenah, ‘Nang tal kan siangpahrang ah cang aw,’ an ti. 13Cutikah sabit hri in hiti in a ti, ‘Nanmah pawl uk ding meen ah khawzing le milai pawl lungawi tertu ka sabitti kha ka taan siang ding maw si?’ a ti thotho. 14Cuih hnuah zanthing pawl in hlingbur hnenah, ‘Nang tal kan siangpahrang ra cang aw,’ tiah an ti. 15Cutikah, ‘Nan siangpahrang ih in duh ngaingai a si ahcun ra uhla ka thladem ah ra cawl uh. Nan ra cawl lo asile hlingbur sung ihsin meisa a hung suak ding ih Lebanon ih a ummi sidar zanthing pawl kha a kaang ral thluh ding a si,’ tiah hlingbur cun a ti.

16“Nan thinlung takte le thinlung thiangte in Abimelek hi siangpahrang ah nan cangter a si maw? Gideon le a innsang parah thil dik kan tuah tiin nan ruat maw? Hnaṭuan ṭha a ṭuan man a ngah tlakmi a ngah tiin nan zum maw? 17Ciing ṭha uh; ziangtluk inso ka pa in nan hrangah ral a do! Midian mi pawl ih kut sung ihsin nan luatnak dingah amah ih nunnak hman a ruat lo a si kha! 18Sikhalsehla tuihsun ah nannih cun a innsang pawl cu an ci in mih nan tum. A fapa sawm sarih cu ni khatah lungto pakhat parah nan that; cuih tlunah a salnu thawn an hrinmi a fapa Abimelek sawn cu nan sungkhat a si ruang men ah Shekhem siangpahrang ah nan tuah. 19A ṭha ko; tuihsun ih Gideon le a innsang parih nan tuahmi hi thinlung takte le thinlung thiangte ih nan tuahmi a si ahcun Abimelek parah nan thinlung kim ko uh; amah Abimelek khal nan parah a lung awi ko seh. 20Asinain, cuti a si lo ahcun, Abimelek in meisa suahter sehla Shekhem le Bethmillo minung pawl cu kaang that thluhseh. Shekhem le Bethmillo mi pawl hnen khal in meisa suak sehla Abimelek cu kaang that hram seh,” tiah a au ciamco. 21Cuih hnuah Jotham cu a tlan hlo. A unau Abimelek a ṭih ruangah a feh ih Beer ah a va um.

22Abimelek in Israel cu kum thum sung a uk. 23Cule Shekhem khua mi le Abimelek hua-aw dingah Pathian in rem-awk lonak thinlung a pek ih khawsung mi le Abimelek cu an ral aw. 24Hiti a sinak cu Gideon ih fapa sawm sarih pawl a thattu Abimelek par le mi that dingih Abimelek a forhfialtu Shekhem khawsung mi pawl ih parah phulak dingah Pathian ih tuahmi a si. 25Abimelek bawh dingah Shekhem khua mi pawl in tlangpar ah mi an thlah. An thlah mi pawl cun acuih lamzin a zawhtu hmuahhmuah cu an ram ih Abimelek khal in acuih thu cu a thei.

26Culai ah Ebed ih fapa Gaal cu a unau pawl thawn Shekhem khua ah an thleng ih Shekhem khawsung mi pawl cun Gaal cu an rinsanzet. 27Curuangah an lo ah an feh ih an sabit rah an lo ih sabitti an tuah ih puai an tuah ciamco. Cule an khawzing biakinn ah an feh ih an ei an in hnuah Abimelek cu ṭongsia in an cam an riam. 28Gaal in, “Ziangah so Abimelek cu kan rian rero? Shekhem khua mi pawl cu ziangce so kan si? Amah cu ziangso a si leem? Gideon ih fapa a si ko lo maw? Amah thu ih a nungmi cu Zebul lawng a si ko lo maw? Ziang hrangah so Abimelek cu kan rian rero ding? Nan cithlahtu Hamor ih minung pawl rian sawnta hmen uh. 29Aw, hi miphun ih hotu si ningla ka va duh so! Abimelek hnenah, ‘Na ralkap pawl thawn ra suak uhla kan tawng aw hnik pei cu!’ ka ti ding ih Abimelek cu a van a duaimai ding naón!” tiah a ti.

30Cuti ih Gaal ih ṭongka cu Shekhem khua uktu Zebul in a theih tikah a thin a heng ngaingai. 31Curuangah Arumah ah Abimelek hnen ahcun mi a thlah ih, “Ebed ih fapa Gaal le a unau pawl cu Shekhem ah an ra ih khawsung mi pawl nangmah dodal dingin an ra forh rero a si. 32Curuangah na ralkap pawl thawn a zanzan in ra pok uhla hramlak in bawh uh. 33Cule thaizing nisuak ah tho in rinlopi-ah Shekhem khua cu nam uh. Gaal le a ralkap pawl in an lo do tikah nasazet in do uh,” tiah a cah.

34Curuangah Abimelek le a ralkap pawl cu a zanzan in an pok ih bur li in Shekhem khua kiangkap ah an thup-aw. 35Gaal cu khawsung ihsin a feh ih hnarpawn ah a va ding. Cule Abimelek le a ralkap pawl cu an thuh awknak ihsin an suak. 36Abimelek le a ralkap pawl cu Gaal in a hmuh tikah Zebul hnenah, “Zohhnik, tlang par ihsin mi an run khi!” a ti.

Cutikah Zebul cun, “Khikhi cu tlangpar ih phenthlam an si ih, minung ah na neih men a si ko lo maw,” tiah a ti.

37Cule Gaal cun, “Zohhnik aw, tlangkawn ihsin minung an run khi; a hrek cu Pol Sasuakung timi lamzin ihsin an run khi!” tiah a ti thotho.

38Cutikah Zebul cun Gaal hnenah, “Na porh-awk rero sikhawh ziangtinso? Ziangah so Abimelek cu kan rian duh rero ding, a titu cu nangmah na sisi. Himi pawl cu hnihsuahsainak ih na hmanmi pawl an si ko lo maw! Va feh awla va do hnik hmen!” tiah a ti. 39Gaal in Shekhem khawsung mi pawl cu a hruai ih Abimelek cu an va do. 40Asinain Abimelek in a neh ih Gaal cu a zaamhlo. A ralkap pawl tampi an thi ih an khua hnarpawn tiang an ruak cu a ril teptep. 41Abimelek cu Arumah ah a kir sal; cule Gaal le a unau pawl cu Shekhem khua ah um thei lo dingin Zebul in a dawi.

42A thaisun ah Shekhem khawsung mi pawl cu hramlak ah an feh ih acuih thu cu Abimelek in a thei. 43Abimelek cun a ralkap pawl a ko khawm ih hmun thum ah a ṭhen hnuah hramlak in an rak bawh. Khawsung ihsin an suah kha Abimelek in a hmu ih an bawhnak ihsin a suak ih a do. 44Abimelek le a homi ralkap bu khat pawl cu zamrangte in hmaiah an nor ih khua kotka sangka ah an ṭang. A dang ralkap bu hnih pawl in an ral pawl cu an do ciamco ih hramlak ahcun an thah ṭheh. 45Cule Abimelek in khawsung mi pawl cu sun nihlawh a do. Cuih khua cu a lak ih khawsung mi pawl a thah ṭheh. An khawpi a balsiat thluh ih leilung cu ci a phulh ruangah ci in a khuh thluh.#Ci in a khuh thluh timi cu leilung a siatsuah ṭheh tican a si.

46A cuih thu cu Shekhem khua ralhruang ih a ummi khawsung upa pawl in an theih tikah Baal-berith khawzing biakinn ruhkulh sungah an relh. 47Cutawkih an relh cu Abimelek in a thei. 48Curuangah a ralkap pawl thawn Zalmon tlang parah an kai. Hreitlung a lak ih thinghnge a tan ih a liang in a put. A ralkap pawl khal amah vekih tuah thluh dingin thu a pek. 49Cutiin thinghnge cu an khawm fingfing ih Abimelek cu an thlun ih ruhkulh kap ahcun an pen. Meisa in an ur ih Shekhem ruhkulh sungih a ummi hmuahhmuah cu an thi thluh. A thi mi cu nunau mipa an zate in thawngkhat tluk an si.

50Cuih hnuah Abimelek cu Thebez khua ah a feh ih a kulh thluh hnuah cuih khua cu a lak. 51An khawsung ahcun a fek zetmi ralhruang a um ih a sungah cun nunau siseh, mipa siseh, an hotu pawl tiangin an relh thluh. A sunglam in sangka an hren ih inn diphun ah an kai. 52Cule Abimelek in ralhruang cu a ra do. Ralhruang cu meisa in ur dingah sangka a rak naih. 53Culai fangah nunau pakhat in tlunlam in fang rialnak lungphengpi in a lu ah a vun thlak ih a luruh a kuai. 54Cutikah Abimelek cun a hriamnam kengtu tlangvalpa cu zamrang tein a ko ih, “Na ralnam zuuk awla i that aw. Nunau kut in a thi a si, tiih an rel ding ka duh lo,” tiah a ti. Curuangah tlangvalpa cun Abimelek cu a dawt ih a thi. 55Cule Israel ralkap pawl in Abimelek a thih an hmuh tikah an inn ciarah an tlung thluh.

56Cuticun a unau sawm sarih a thah ih a pa parih thil sual a tuah mi ruangah Pathian in Abimelek cu a thungrul ve a si. 57Cuvek thotho in an nun sualnak ruangah Shekhem khua mi pawl khal Pathian in a thungrul ve. Gideon ih fapa Jotham in a camsiat vekin an parah a kim ṭheh a si.

Currently Selected:

THUṬHENTU 9: FCL

Highlight

Copy