THUṬHENTU 13

Samson Suahnak

1 Bawipa ih hmaiah Israel mi pawl cu an sual lala ruangah Bawipa in Filistin mi kut hnuai ah a thlenter hai ih kum sawmli sung Filistin pawl in Israel mi an uk.

2Culai ah Manoah an timi mipa pakhat a um. Amah cu Zorah khua mi a si ih Dan miphun a si. A nupi cu fa nei lo nucing a si. 3Bawipa ih vancungmi a nupi hnenah a lang ih a hnenah, “Nang cu nucing na si ih faate na nei lo; sikhalsehla atu thok ihsin nau na keng ding ih fapa na hring ding. 4Ralringzet in um awla sabitti le zu in hlah aw; ei thiang lomi rawl khal ei aw hlah; 5ziangahtile nau na keng ding ih fapa na nei ding. Cuih na fapa cu a sam na met lo pei, ziangahtile a suah ni ihsin Pathian hnenih pekmi a si ding ih Nazir #Nazir timi cu Pathian hnenah thukamnak tuah in zu in lo le rawl thianglo ei loin le an sam met loin an um. (Mipum 6.1-8 ah zoh.) mi a si ding. Amah cu Filistin kut sung ihsin Israel mi runsuak dingah a thoktu a si ding,” tiah a ti.

6Cutikah zamrangin a feh ih a pasal hnenah, “Pathian ih minung pakhat ka hnenah a ra ih Pathian ih vancungmi bangtuk a si ih ṭihzah tlak ngaingai a si. Khuitawk inso na rat, ti khal ka sut lo; cule anih khal in a hmin i sim ve lo. 7Asinain, ‘Nau na keng dingih fapa na nei ding,’ tiah i sim. ‘sabitti le zu na in lo pei; ei thianglo rawl khal na ei lo pei, ziangahtile cuih na fapa cu Pathian hnenih pek mi a si ding ih a nun sung hmuahhmuah ah Nazir mi a si ding,’ i ti,” tiah a sim.

8Cutikah a pasal Manoah cu Bawipa hnenah thla a cam ih, “Maw Bawipa, in zaangfah hram awla na rak thlahmi na minung cu kan hnenah rak thlah sal awla kan neih dingmi fapa cu ziangtinso kan kilkhawi ding, in ra sim hram seh,” tiah a dil.

9Manoah ih thlacamnak cu Bawipa in a thei ih a vancungmi cu Manoah ih nupi hnenah cun a thlah sal. Culai ah Manoah ih nupi cu lo sungah a to; a hnenah a pasal a um lo. 10Cutikah zamrangte in a pasal hnenah a va tlan ih, “Zohhnik, kan dungih a rami pa cu atu ka hnenah a lang sal a si,” tiah a ti.

11Manoah cu a tho ih a nupi cu a hei thlun. Mi pa hnenah cun Manoah in, “Ka nupi hnenih a ṭongtu cu nangmah maw na si?” tiah a sut.

Cule mi pa in, “Asi, keimah ka si,” a ti.

12Cutikah Manoah cun, “Cuti asile, na simmi a kim tikah nauhakpa cu ziangtinso a um ding? Ziang so a tuah ding?” tiah a sut.

13Cule Bawipa ih vancungmi in, “Ka sim vekih thlun thluh dingah na nupi cu fimkhur zetin um seh. 14Sabit hri ihsin a suakmi hmuahhmuah zianghman ei hlah seh. Sabitti siseh, zu siseh a in lo pei ih, ei thianglomi rawl khal a ei lo pei. Ka simmi hmuahhmuah cu a tuah thluh pei,” a ti.

15-16 Bawipa ih vancungmi a si, ti thei loin Manoah cun a hnenah, “Feh hrih hram aw hlah. Na hrangah me thuangte kan that ding,” a ti.

Sikhalsehla vancungmi in, “Ka um hrih a si khalle na rawl cu ka ei zik lo. Asinain me na that asile meisa ur in Bawipa hnenah thawinak pe aw,” tiah a ti.

17Cutikah Manoah in vancungmi hnenah, “Na simmi hi a kim tikah upat hmaizahnak kan lo pek theinak dingah na hmin in sim aw,” tiah a ti.

18Cule vancungmi cun, “Ziangah so ka hmin theih cu na duh? Ka hmin zohman ih theih ding a si lo,”#Zohman ih thei ding a si lo timi hi mangbangza hmin ti khal a si thei. a ti.

19Cule Manoah in me thuangte le fang malte a keng ih lungto biakṭheng parah mangbangza in hna a ṭuantu Bawipa hnenah thawinak a pek. 20Biakṭheng ihsin meisa a alh ih Manoah le a nupi in an zoh lai fangah mei-alh lakin Bawipa ih vancungmi cu van ih a kai lai kha an hmu. Cu vete in Manoah le a nupi cu leilung ah an bok. 21Cule vancungmi cu an hmu sal nawn lo. Cutikah Bawipa ih vancungmi a si ti kha Manoah in a thei.

22Manoah in, “Pathian kan hmuh ruangah kan thi tengteng ding a si,” tiah a nupi hnenah a ti.

23Asinain a nupi in, “Bawipa in in that duh ngaingai sisehla thawinak kan pekmi kha a saang lo ding a si; hi bangtuk thil mangbangza hi in hmuh lo ding a si ih atu vek tikcu ahhin a theih khal in theiter lo ding a si,” tiah a ti.

24A nupi cun fapa a run hring ih a hmin ah Samson a sak. Naute cu a ṭhang vivo ih Bawipa in thluasuahnak a pek. 25Zorah le Eshtaol karlak, Dan ralkap riahbuk ah Samson cu Bawipa ih thlarau in a run ṭhangphawk thok a si.

Currently Selected:

THUṬHENTU 13: FCL

Highlight

Copy