ISAIAH 3

Jerusalem Khawsungih Buainak

1Atu ihsin Bawipa, Cungnungbik Bawipa in, minung ih rinsan bik mi milai siseh thilri siseh Jerusalem le Judah ihsin a lak ṭheh ding. An rinsan bik mi an rawl le an tidai, 2an micak le an ralkap pawl, an thuṭhentu le an profet pawl, an thusim thiam le an kutzoh thiam pawl, 3an ram uktu bawi le ralkap bawi pawl, an ram hruaitu pawl le mitkher thiam pawl a lak ṭheh ding. 4Bawipa in an ram cu nauhak tualleng pawl a uk ter ding. 5Mi hmuahhmuah in anmah ih miatnak hrangah cun mihmaisong an neilo ding. Mino pawl in an upa pawl an upat lo dingih mi nauta pawl in an tlunih bawi pawl an hmaisong lo ding.

6Caan a rathleng dingih innsang pakhat sungah an unau pakhat cu, “Nang cu hruk ding hnipuan tal na neih ruangah hi bangtuk kan harsat caan ah hin in hotubik si hram aw,” an ti ding.

7Asinain anih in, “Sihlah e, nan hotu ka si lo ding. Ka lo bawm thei lo ding. Ka inn sungah rawl a um lo, hnipuan khal a um lo. Nan hotu ah in tuah hlah uh,” a ti ding.

8A si, Jerusalem cu a cem a si! Judah khal a sawn ruairo a si! Ziang hmuahhmuah an sim mi le an tuah mi cuBawipaió duhlo zawng hlir an si. Langhngan in Pathian rori an hmuhsuam. 9Mi thleidan an neihnak cu an hrangah siatsuahtu a si ding. Sodom khua mi bangtuk in ningzah neiloin an sual. An cem a si; ci an tuh mi an khawm sal a si.

10Asinain miding pawl cu milungawi an si dingih an lamzin hmuahhmuah a tluang ding. An hlawhman cu lungawizet in an ngah ding. 11Asinain miṭha lo pawl cu an cem a si; midang parih an tuah mi cu an parah a thleng sal ding.

12Ka minung pawl cu tangka cawihtu pawl in an hremih tangka kilsaktu pawl in an bum a si.

Maw ka minung pawl, nan hotu pawl in an lo hruaisual ih khuilam zawh ding ti nan thei lo.

Bawipa In A Minung Pawl Parah Thu A ṭhen

13 Bawipa cu a minung pawl thurel dingah tim a tuah. A tim a tuah ṭheh ih, 14an uktu pawl le an hotu pawl cu thurelnak hmunah a suahpi. An hnenah, “Mi sabit hmuan nan long ṭheh ih nan inn cu mi farah hnen ihsin nan lak mi thilri in a khat. 15Ka minung palcih theinak le mi farah pawl ih covo lon theinak thu zianghman nan nei lo. Keimah Cungnungbik Bawipa in ka sim zo a si,” a ti.

Jerusalem Nunau Hnenih Ralrin Peknak

16 Bawipa in, “Jerusalem nunau pawl an hngalzia hi zohhnik uh. An puarthau tukah vantau eu-eu in an feh. Ningzah neiloin mipa par lawnglawngah an mit an meng. Duh awzet le zum awzet in an feh ih an ke ih an khih mi khiingte cu an awnter sulso. 17Sikhalsehla ka hrem hai ding-an sam ka meet dingih lukolh in ka thlah ṭheh hai ding,” a ti.

18Jerusalem nunau hnenih sin an uar bikmi hlawnthil pawl Bawipa ih a lonnak tikcu a ra thleng ding. An lu le an ke ih an thlaih mi khiingte, an hngawng le 19an kut ih an khih mi faute pawl a lak ṭheh ding. An hmai khuhnak puanpaate, 20an lukhum pawl, an baan le an taai ih an khih mi ai-camnak an thlaih aw mi baan thlaih le taikhap pawl, 21an kutzung ih an hruk mi zunghruk le an hnar ih an thlaih mi hnarthlaih pawl, 22an hnipuan ṭhaṭha, an puan le an korfual le paisa bawm pawl, 23a paa zet mi an hnipuan pawl, an pavua pawl, an hngawngngerh pawl le an lukhuhnak puan paate sau zetzet pawl cu a long ṭheh ding a si.

24Zihmui an hmang nawn lo ding, an rim a siazet sawn ding; taikhap ṭhaṭha ai ah hridai siava an khap ding; sam mawizetzet ai ah an lu a kolh ṭheh ding; hnipuan mawizetzet ai ah puansia an hruk ding; an mawinak cu an ningzahnak ah a cang ding.

25Khawsung mipa pawl, micak bik pawl hman ral kutah an thi ding. 26Khawpi kotka pawl an ṭap an rak ding. An khawpi cu hnipuan neilo leilung ih a to nunau bangtuk a si ding.

Currently Selected:

ISAIAH 3: FCL

Highlight

Copy