HOSEA 9
9
Hosea In Israel Hremnak Thu A Than
1Maw Israel mi pawl, khawvel mi bang ih nan puai tuahnak cu baang thlang uh. Nan Pathian hnen ihsin nan pial zo ih a hmai ah rintlak lo ah nan cang zo. Hi ram pumpi sungah hlawhhlang bangin Baal khawzing hnenah nan zuar aw zo ih, a man in pekmi tiih nan ruahmi rawl in nan lung a lo awiter a si. 2Asinain reilote ah rawl le olif hriak le sabit tla khopkham in nan ngah lo ding. Sabitti thar khal nan ngah nawn lo ding. 3Israel mi pawl cu Bawipa ih ram sungah an um nawn lo ding. Izipt ram ah an kir sal a ṭul ding ih Assiria ram ih a thiang lomi rawl an ei ding. 4Ramdang ahcun Bawipa ih hnenah sabit thawinak an pe thei lo ding ih thawinak dang khal a hnenah an pe thei lo ding. An rawl cun rawl eitu hmuahhmuah a ti borhhlawh ding ih ruakhngah rawl-ei thawn a bang aw ding. An rawl cu an rilrawnnak rehtertu lawng a si ding ih Bawipa ih biakinn ih pekmi ah saan a si lo ding. 5Cule Bawipa hrangih puai tuah tikcu caan a thlen tikah ziangso an tuah ding? 6Hlohralnak a thlen ih misenpi pawl an ṭiodarh tikah Izipt mi pawl in Memfis khawpi ih phum dingah an khawm hai ding. An sui le an ngun a rak umnak, le an inn le an lo a rak dinnak hmun ah hrampi le hlingkung pawl an kho ṭheh ding.
7Hremnak an tuar caan a thleng zo, an parih phulak caan a thleng zo. Cutiin a cang tikah Israel mi pawl in an thei ding. “Hi profet hi a aa a si; hi thlarau lam hmutu hi a molh a si,” nan ti. Nan sualnak a tamtuk ruangah kei cu nasa zetin in hua. 8A minung Israel mi hnenih ralrinnak thu sim dingah Pathian in kei hi profet in i thlah a si. Asinain ka fehnak kip ah vate bangin thang ih awk in tum. Pathian inn sung hman ah misenpi hi profet ih ral ah an cang. 9An thil tuahmi cu a ṭha lo tuk ih Gibeah#Gibeah ah Levi nupisun an kaihrem ruangah Benjamin mi an thi thluh zik a si. (Thuṭhentu 19-21) khua ih an rak tuahmi vek a si ko. Pathian in an sualnak cu a ciing ringring ding ih a hrem hai ding.
Israel Sualnak Le An Sual Man
10 Bawipa in, “Hmaisa bikih Israel ka rak hmuh tikah nelrawn ih sabit rah hmuh vek a si. Nan pu le nan pa ka rak hmuh tir ah theipi rah tikcu ih a rah hmin hmaisa bik hmuh vek a si. Sikhalsehla Baal-Peor tlang an thlen tikah cun Baal khawzing biak an thok. Cule a rei hlanah an duh zetmi khawzing pawl vekin ningsinza ah an cang. 11Israel ih ropitnak cu vate bangin a zuang hlo ding; faate an hring nawn lo ding, an nunau pawl favun an um nawn lo ding ih an sungin nau a seem nawn lo ding. 12Faate an neih hmanah ka laksak ding ih an nung lo ding. Hi minung pawl ka tlansan tikah cun thil poimawh zetzet an parah a thleng ding,” a ti.
13Israel cu ka hmuh tir ah mawizet ih a khomi tuumkung bangtuk a si; asinain atu-ah an faate pawl cu ramsa bangin dawimi le thahmi an si kha ka hmu. 14Maw Bawipa hi minung pawl parah ziang tuah ding so ka lo dil ding? An nunau pawl cu cingter ṭheh awla an hnawi cu caarter ṭheh aw.
Bawipa In Israel A Hrem
15 Bawipa in, “An thil sual tuahmi hmuahhmuah hi Gilgal ah a thok. Cutawk ihsin anmah huat ka thok a si. Thil sual an tuah ruangah ka ram sung ihsin ka dawisuak hai ding. Ziangtik khalah ka duh sal nawn lo ding; an hotu pawl in an zatein in dodal a si. 16Israel mi pawl cu a hram a caarmi le a rah thei lomi thingkung vek an si. Faate an nei lo ding. An neih hmanah an duh zetmi an fahniang pawl cu keimah in ka that ṭheh ding,” tiah a ti.
Israel Parih Profet ṭongkam
17A hna ka ṭuanmi ka Pathian in a minung cu a hnong ding. Ziangahtile a thu an ngai duh lo. Miphun dang lakah mi vakvai phun ah an cang ding.
Currently Selected:
HOSEA 9: FCL
Highlight
Share
Copy
Want to have your highlights saved across all your devices? Sign up or sign in
Falam Bible Revision © Bible Society of Myanmar, 2002.
