HOSEA 11
11
Pathian In Ralthotu A Minung A Duhdawt
Bawipa in hiti in a ti:
1Israel cu a nauhak lai ihsin
ka duhdawt;
Ka fapa a si vekin Izipt ram ihsin
ka ko suak.
2Asinain ka fapa ti ih ka ko
deuhdeuh tikah ka hnen ihsin
a hlat sinsin ah a pial.
Ka minung cun Baal hnenah
raithawinak an pek;
Milem hnen ah rimhmui an ur.
3Sikhalsehla Israel feh a zirhtu
cu keimah ka si.
Ka ṭaang ih a cawitu cu keimah
ka si.
Asinain anmah damtertu ka si kha
an thei lo.
4Duhdawtnak le lainatnak hri thawn
ka hruai;
Ka cawi ih ka biang ah ka neek cih,
Kuun tahratin rawl ka fah a si.
5Asinain ka hnenah an kir duh lo;
Curuangah Izipt ram ah an kir
sal ding ih,
Assiria in a uk hai ding.
6Ral in an khua an lak ṭheh
ding ih khua kotka pawl
an siatbal ṭheh ding.
Anmah duhnak lawng an tuah ruangah,
Ka minung pawl siatsuah ṭheh
an si ding.
7Ka hnen ihsin pial an tum ring
ring ruangah,
An parah hngawngkol bun an si-ih,
Cungnungbik hnenah an au rero
ding naón sawngtu zohman
an nei lo ding.
8Maw Efraim, ziangtinso ka lo
thlah thei ding?
Maw Israel, ziangtinso ka lo
dungtun thei ding?
Admah bang cun ziangtinso ka lo
siatsuah thei ding?
Zeboiim vek cun ziangtinso ka lo
tuahsiat thei ding?
Cubangtuk ka lo tuah ding cu
ka ruat thei lo;
A lo duhtu ka thinlung hi
a hlum ih a neem a si.
9Ka thinheng in ka lo cawh lo ding,
Israel cu ka siatsuah sal lo ding;
Ziangahtile kei cu minung ka si lo,
Pathian ka si;
Nan hnenih a ummi Thianghlim bik
cu ka si;
Thinheng in ka ra lo ding.
10An ral pawl lamah kiosa bangin
ka huuk ding ih,
Ka minung pawl in in thlun ding.
Nitlaknak lam in ṭhia phahphah
in in pan ding.
11Izipt ihsin vate bangin zamrang
zetin an ra ding;
Assiria ihsin thuro bangin an
rung ding.
An inn ciar ah ka tlunpi ding,
Keimah Bawipa in ka ti.
Israel Le Judah A Mawhthluk
12 Bawipa in hiti in a ti, “Israel mi in an thuphan pernak le an mibumnak in in kulh theh. Rintlak le a thianghlimmi Pathian ka si naón Judah mi pawl cun in dodal lai thotho.
Currently Selected:
HOSEA 11: FCL
Highlight
Share
Copy
Want to have your highlights saved across all your devices? Sign up or sign in
Falam Bible Revision © Bible Society of Myanmar, 2002.