SEEMTIRNAK 45

Josef A Unau Hnenah A Phuang Aw.

1Cutikah Josef cu a lunghno suup-aw thei nawn loin a hnenum pawl hnenah, “Mi hmuahhmuah suakter uh,” ti ah a auh hai. An suak thluh ih a unau pawl hnenah Josef ka si ti a phuan-awk tikah an kiangah zohman an um lo. 2Josef cu a ṭap ih napi in a ṭah ruangah Izipt mi pawl in an thei. Cuih thuhla cu siangpahrang inn tiangin a thang. 3Josef in a unau pawl hnenah, “Josef ka si. Ka pa a nunglai maw?” ti ah a sut. Asinain a unau pawl cun an ṭih tuk ruangah an sawn ngam lo. 4Josef cun, “I rak naih deuh uh,” ti ah a ti ih an hei naih tikah Josef in, “Izipt ramih nan rak zuarmi nan nau Josef kha ka si. 5Asinain hi ramih in zuar ruangah nan riahsia in mawhthluk aw rero hlah uh. Mi nunnak run dingah hitawk ih i thlentertu ngaingai cu Pathian a si. 6Tuih kum hi hi ram sungah paam kum a kum hnihnak lawng a si lai. Paam kum kum nga a um hrih lai ding a si ih cuih sungah leileh le rawlkhawm ti khal a um lo ding. 7Nan tesinfa tiang an nun theinak dingah nan hlanah Pathian in i thlenter a si. Mi tampi ka run theinak ding le nanmah tla nan nunnak dingah thlahmi ka si. 8Curuangah hitawk ram i thlentertu ngaingai cu nannih nan si lo; Pathian a si. Pathian in, Faro hrangah a pa vekah i tuah ih a ramsung hmuahhmuah hi ka ṭuanvo a si ih Izipt ram hmuahhmuah uktu ka si.

9Curuangah ka pa ih hnenah zamrangin va kir uhla na fa Josef in, ‘Pathian in Izipt ram hmuahhmuah uktu-ah i tuah zo. Ka hnenah zamrangin ra aw. 10Keimah thawn kan hlat-awk tuk lonak dingah Goshen lamah na um pei ih nangmah le na faale pawl le na tesinfa pawl le na neihmi ṭilva - tuu le me le caw hmuahhmuah tla thawn nan um pei. 11Goshen ih nan um ahcun ka lo kilkhawi phah thiam ding a si. Paam kum kum nga a baak lai a si ruangah nangmah siseh, na innsang le na neihmi ṭilva siseh, ei ding nei loih nan um pang ding cu ka duh lo, a ti,’ ti ah nan va sim pei. 12Atu cu nanmah le ka naupa Benjamin in nan hnenih a ṭong rerotu hi Josef ka si, ti nan mit rori in in hmu thluh zo. 13Izipt ram sungih huham ka neihzia hi ka pa ih hnenah va sim uhla, nan tonmi le nan hmuhmi hmuahhmuah dang khal nan va sim thluh pei. Zamrangte in va kir uhla amah rak hruai uh,” ti ah a ti.

14Josef in a naupa Benjamin cu a pom ih a ṭap. Benjamin khal in a pom ih a ṭap ve. 15Cuih hnuah Josef in a ule pawl cu pakhat hnu pakhat ṭap phah in a pom ih a hnam vivo hai. Cuṭheh in a unau pawl thawn an totlang ih thunuam an rel.

16Josef ih unau pawl an ra ti thu cu siangpahrang inn tiangin a thang thluh ih Faro le a kuthnuai bawi pawl khal an lung a awi ngaingai. 17Cutikah Faro in Josef hnenah, “Na unau pawl kha an laak thawn rawl phur-aw hai sehla Kanaan ram ah va tlung hai seh. 18An pa le an sungte dang pawl va hruai hai sehla ka hnenah ra hai seh. Izipt ram sungih ram ṭha bik ka pe ding ih kan ram sungih a suakmi a ṭha bik an ei ding. 19An nupi pawl le an faate note pawl to dingah Izipt ram ihsin rangleng tla hei keng hai seh. An pa run hruai hai seh ti felfai tein sim hai aw. 20An thilri taanmi zaangraam hlah hai seh. Ziangahtile Izipt ram sungih a ṭha bik cu anmah ih ta a si paam ding a si,” ti ah a ti.

21Jakob ih fapa pawl cun a sim vekin an tuah. Faro ih thu a pek vekin Josef in rangleng pawl tla a pek ih lampi hrangah lamcaw khal a pek. 22Cuih tlunah a unau pawl cu hnipuan voikhat thleng awknak ciar a pek, asinain Benjamin cu ngun tangka zathum le hnipuan voinga thleng awknak a pek. 23Izipt ram sungih suakmi thil ṭha bik pawl laak pahra phurin a pa a kuat. Cun a pa a ratnak ding lamcaw hrangah rawl le sang le rawl phun dangdang laak pahra phur a kuat fawn. 24A unau pawl cu malte a hei thlah ih, “Lampi ah va to-aw hlah uh,” ti ah a cahta.

25Izipt ram ihsin an suak ih Kanaan ram an pa Jakob hnenah an va thleng. 26“Josef a nunglai sokhaw! Izipt ram hmuahhmuah uktu a si!” ti ah an pa cu an sim. An pa cu a mangbangin a thir dukdi ih a zum thei hrimhrim lo. 27Asinain Josef ih thusimmi hmuahhmuah an sim tikah le Izipt ram a fehnak dingah Josef ih a kuatmi rangleng pawl tla a hmuh tikah Jakob cu a lungawi in a thla a tlung sal. 28Cutikah Jakob cun, “Ka fapa Josef a nunglai ngaingai ti ka fiang, in sim a ṭul nawn lo. Ka feh pei ih ka thih hlanah ka va tongta ding,” ti ah a ti.

Currently Selected:

SEEMTIRNAK 45: FCL

Highlight

Copy