SEEMTIRNAK 41

Josef In Faro Ih Mang A Let

1Kum hnih a kim hnuah Faro in mang a man ih a mangah cun Nail tivapi kapah a ding ih, 2tiva sung ihsin cawpi a thauzetmi le mawizetmi pasarih an hung suak ih hrampi note an hung ei hmuarhmo kha a hmu. 3Cuih hnuah cawpi dang pasarih, a ṭawl ṭenṭen le a mawi lozet, tiva sung ihsin an hung suak ih a hmaisa cawpi thau pasarih kiangah tiva kapah an hung ding. 4Cule cawpi ṭawl pasarih pawl in cawpi thau pasarih pawl cu an ei ṭheh. Cun Faro cu a ṭhang. 5Cuih hnuah a itthat sal ih mang a man sal. A mangah fangcang kung pakhat ihsin a bor ṭhazet le ah a cuzet mi fangvui pasarih an suak. 6Cun nelrawn thli ih nuai siat reprepmi le a hivai sialsialmi fangvui pasarih an suak ve. 7Cule a siazetmi fangvui in a borzetmi fangvui pasarih cu an dolh ṭheh. Cun Faro cu a hung ṭhang ih a mang a si kha a thei. 8A thaizing cu a lung a nuam lo ngaingai ih Izipt ram sungih pol pawl le mifim hmuahhmuah a ko ṭheh. A mang cu a sim ṭheh hai naón a simfiang theitu zohman an um lo.

9Cutikah sabitti petupa in Faro hnenah, “Bawipa, ka mawh zia cu tuih sunah ka phuang ding. 10Na hnaṭuantu pawl ih tlunah na thin a heng ih sangtuah hotupa le kei cu siangpahrang inn kiltu pawl hotu bawi ih inn ah thawng in thlak. 11Zan khatah kan pahnih in mang kan man. Kan mang cu sullam nei veve an si. 12Culai ah Hebru tlangval pakhat siangpahrang inn kiltu bawi ih hnenum pa cu kan hnenah a um ve ih kan mang pawl cu amah kan sim. Kan mang cu in lehsak ih a sullam in sim. 13Cule a sim vek rori in a kim ṭheh; kei in ka hnaṭuan ka ṭuan sal ih sangtuah hotupa cu na that a si,” ti ah a ti.

14Cutikah Faro in Josef cu a ko ih zamrangte in thawnginn ihsin a suah. Josef cu a meetfai-aw ih a hnipuan a thleng-awk hnuah Faro hmai ah a ra. 15Cutikah Faro in, “Mang ka nei ih zohman in an let thei lo. Nang cu mang an lo simmi fiangtein na let thei ti in sim,” ti ah a ti. 16Josef in, “Kei ih ti theimi a si lo; Pathian lawngin fiangtein a lo sim thei ding,” ti ah a ti. 17Cutikah Faro in, “Ka mangah Nail tiva kapah ka ding ih, 18tiva sung ihsin cawpi thauzet le mawizet pasarih an hung suak ih hrampi note an hung ei hmuarhmo. 19Cuih hnuah cawpi dang pasarih, a ṭawl ṭenṭenzet ih ruh lawng a taangmi, tifiamfiam in an hung suak. Izipt ram pumpi sungah cuvek cawpi ṭawnṭai ka hmu dah lo. 20Cule cawpi ṭawl pawl in cawpi thau pawl cu an ei ṭheh. 21Sikhalsehla an ei ṭheh hnu khalah zohman in cawpi thau pasarih an ei ti ah an thei thei lo ding; a hlan vekin an ṭawl ṭenṭen thotho. Cutikah ka hung ṭhang. 22Cun mang ka man lala ih ka mangah fangcang kung pakhat ihsin fangvui pasarih, a borzetmi le a cuzetmi an suak. 23Cuih hnuah nelrawn thli ih nuaisiat reprepmi, hivai sialsialin fangvui pasarih an hung suak. 24Cule fangvui siazet pawl in fangvui ṭhazet pasarih pawl cu an dolh ṭheh. Ka mang cu pol ka sim hai naón i lehsak theitu pakhat hman an um lo,” ti ah a ti.

25Cutikah Josef in Faro hnenah, “Na mang pahnih ih sullam cu an bangrep a si. Pathian in a tuah tummi a lo theihternak a si. 26Cawpi thau pasarih cu kum sarih a si ih fangvui ṭhazet pasarih khal cu kum sarih thotho a si. An sullam cu thuhmunkhat a si. 27Neta-ih a hung suakmi cawpi ṭawl pasarih le nelrawn thli ih nuaisiatmi le a hivai sialsialmi fangvui pasarih cu paam kum kum sarih a si. 28Ka lo sim zo vekin Pathian in a tuah dingmi a lo hmuhnak a si. 29Izipt ram sung hmuahhmuah ah paṭhat ngaingai kum kum sarih a um ding. 30Cuih hnuah paam kum kum sarih a tlung ding ih Izipt ram sungih paṭhat kum hmuahhmuah cu hngilh thluh a si ding. Paam ruangah Izipt ram cu a siat thluh ding. 31Paṭhat caan cu zohman in an ciing nawn lo ding. Ziangahtile neta-ih a tlung dingmi paam caan cu a nasa ngaingai ding. 32Na mang voihnih rori na mannak cu Pathian in hi thu cu a nemhnget zo ih rei lote-ah a thleng ding tinak a si.

33Cu a si hrangah atu-ah mi pakhat, khuaruatthiam le mifim hril awla, Izipt ram pumpi ṭuanvo latu dingah ret aw. 34Ram sungih hnaṭuantu dingah hotu pawl tla ret awla, paṭhat kum kum sarih sungih neihmi rawl sung ihsin ṭhen nga-ih ṭhen khat khawlter aw. 35Hi rawl hmuahhmuah cu a ra dingmi paṭhat kum sungah khawm ṭheh hai seh. Nangmah ih thu in hna an ṭuan pei ih khawpi kipah rawl cu an khawl pei ih an kil pei. 36Hi rawl pawl cu paam kum kum sarih a ra thlen tikah Izipt ram sung minung pawl an thih ṭheh lonak dingah khawl ciami rawl a si ding,” ti ah a ti.

Josef Cu Izipt Ram Uktu Ah A Cang

37Josef ih thusimmi cu Faro le a tlangsuak pawl an lung a kim tuk lawmmam ih, 38Faro in, “Hi pa vekin Pathian thlarau-ih umpimi midang khui-ah so kan hmuh ding,” ti ah a ti. 39Cule Faro in Josef hnenah, “Pathian in hi thil hmuahhmuah hi a lo hmuh hrangah nangmah hnakin thil a theithiam sawn le a fim sawn zohman an um lo. 40Curuangah nangmah hi ka ram zohtu-ah ka lo tuah pei ih ka minung pawl in na thu an lo ngai ding. Siangpahrang ka sinak lawng hi ka lo hleihnak a si ding. 41Atu ihsin Izipt ram pumpi uktu bawi ah ka lo tuah a si,” ti ah a ti. 42Cuṭheh in Faro in siangpahrang hmin khenmi zunghruk cu a phoih ih Josef ih zungah a hrukter; a mawi le a mankhungmi hnipuan in a thuam ih suiṭhi a hngawng ah a orhter. 43Siangpahrang tonak sangtu rangleng ah a toter ih amah kiltu ralkap pawl in a hmai ihsin, “Nan lu kun uh,” ti ah an au hluarhlo. Cuticun Izipt ram pumpi uktu bawi ah Josef cu a cang a si. 44Cun Faro in Josef hnenah, “Keimah cu siangpahrang ka si; asinain nangmah ih thu loin Izipt ram sungah zohman an kutke an caangkhai thei lo ding,” ti ah a ti. 45Cule Josef cu Zafenath Paneah ti ah Izipt hmin a sak. Heliopolis khua ih puithiam Potifera ih fanu Asenath cu nupi ah a ṭhitsak.

46Josef cu Izipt siangpahrang Faro ih hnaṭuan a thawh tikah kum sawmthum a si. A feh ih Izipt ram a kiil le a deng tiangin a tlawng.#41.46A feh ih Izipt ram a kiil le a deng tiangin a tlawng timi hi, Josef cu Izipt ram pumpi ih thuneitu ah a cang ti tla a si thei. 47Paṭhat kum kum sarih sungah rawl cu ei cawk loin an nei. 48Paṭhat kum kum sarih sung rawl tamzet an neih sung hmuahhmuah Josef in Izipt ram sungih rawl cu a khawm ciamco ih khawpiih kipah a khawl. Khua kiangkapih lo rawl pawl cu a cuih khawsungah a khawl. 49Rawl a khawlmi cu a tam ngaingai ih tifinriat ih vunnel a bang. A rawl khawlmi cu a tamtuk thlang hrangah a tah khal an tah nawn lo; ziangahtile tah cawk ding a si lo.

50Paam kum a thlen hlanah Josef cu, Heliopolis khua puithiam Potifera ih fanu, a nupi Asenath in fapa pahnih a hrin. 51Josef in, “Ka zonzaihnak hmuahhmuah le ka pa ih innsang thu khal Pathian in i hngilhter zo,” ti ah a ti ih a fapa hmaisa cu Manasseh#41.51 Manasseh: timi cu Hebru ṭong in i hngilhter ti thawn a aw suah a bang aw. ti ah hmin a sak. 52Cun, “Harsat ka tonak ram ah Pathian in faate i pek,” a ti ih a fapa pahnihnak hminah Efraim#41.52Efraim: timi cu Hebru ṭong in faate i pek ti thawn a aw suah a bang aw. a sak.

53Izipt ram sungih paṭhat kum kum sarih cu a rung cem ih, 54Josef ih a rak sim cia bangtuk in paam kum cu a rung thleng ngaingai. Izipt ram lawng si loin ram dang hmuahhmuah khalah paam a tlung ve; asinain Izipt ram sungah cun khuazakipah rawl a um. 55Izipt ram sung hmuahhmuahih paam a thlen tikah ram sung minung pawl in Faro hnenah rawl an dil. Cutikah Faro in, “Josef hnenah feh uhla a lo sim vekin tuah uh,” ti ah a ti. 56Izipt ram sungah paam cu a nasazet ih ram sungmi pawl rilrawng ih an um tikah Josef in rawl retnak innpi pawl cu a ong ih rawl cu Izipt mi hnenah a zorh ciamco hai. 57Leilung tlun hmuahhmuahah paam cu nasazet ih a tlun ve ruangah mi hmuahhmuah cu pursum dingin Izipt ramah Josef hnenah an ra ciamco.

Currently Selected:

SEEMTIRNAK 41: FCL

Highlight

Copy