SEEMTIRNAK 33

Jakob In Esau A Tong

1Jakob in Esau cu milai zali thawn an rat kha a hmuh tikah a faate pawl cu Leah, Rachel le a nusun pahnih hnenah a ṭhendarh thluh. 2A nusun pahnih le an faate pawl cu hmaisabik ah a ret; a sangtu ah Leah le a faate pawl a ret ih neta bikah Rachel le Josef a ret hai. 3Amah Jakob cu an hmaiah a feh ih voi sarih tiang a hmai leilung dai in a lu a kuun hnuah a u hnenah a va thleng. 4Sikhalsehla Esau in Jakob a hmuh tikah tong dingah a va tlan ih Jakob cu a pom; a hngawng in a kuah ih a hnam. Cule an pahnih in an ṭaptlang. 5Cule Esau cu khuadang a tang ih nunau le nauhak pawl a hmu. “Na hnenih nunau le nauhak pawl hi zoso an si?” ti ah a sut. Cutikah Jakob in, “Na siahhlawhpa keimah hi Pathian in i zaangfah ih i pekmi faale pawl an si,” ti ah a ti. 6Cun a nusun le an faate pawl an ra ih upat pe in an lu an kuun. 7Cuih hnuah Leah le a faate pawl an ra kuun; cule a neta bikah Josef le Rachel an ra ih an lu an ra kuun ve.

8Cule Esau in, “Ṭilva rual ka rak ton zomi kha ziang sullam so a si?” ti ah a sut. Jakob in, “Bawipa, na hmaiṭha ka co theinak dingah an si,” ti ah a hun ti tikah, 9Esau in, “Ka duhzat cu ka nei ve ko, ka naupa; na ta pawl kha cu nangmah in nei ko aw,” ti ah a ti. 10Sikhalsehla Jakob cun, “Cuticun a si lo pei; na mithmaiṭha i coter a si ahcun ka laksawng cu na sang hram pei. Atu cu ka parah na thinlung tluangzet in a um ih ka hrangah na mithmai hmuh cu Pathian ih mithmai hmuh bangtuk a si. 11Zaangfahte in na hrangih ka rak kenmi laksawng cu co hram aw; Pathian in i zaangfah ih ka ṭulmi pohpoh cu i pek a si,” ti ah a ti. Cutiin Esau ih a san hlan lo a hneek zok rero. Cule Esau cun a saang.

12Cun Esau in, “Kan tim kan tuah pei ih kan feh pei. Keimah in hmai ka lo hruai ding,” ti ah a ti. 13Asinain Jakob in, “Bawipa, kan faale pawl hi an nauhak tuk lai hrih ti cu na thei ko; cule kan tuu le kan caw pawl tla ka ruah a ṭul fawn; hnawifawp lai hlir an si. A khaaltu pawl in ni khatah hlat tuk an dawi a si ahcun an thi thluh ding. 14Curuangah bawipa, nang hmaiah rak feh sung aw; Seir ramih na hnen ka thlen tiang, rannung le nauhak pawl an feh thei tawkin ka hun lo dawi ding,” ti ah a ti. 15Cutikah Esau in, “Cuti asile na hnenah ka milai pawl a hrekin ka taanta pei,” ti ah a ti. Asinain Jakob cun, “Na thuruah thiamnak parah ka lung a awi, bawipa, sikhalsehla an taan a ṭul lem lo ding,” a ti. 16Cuhrangah Esau cu Seir ramah cuih ni ah a kir sal. 17Jakob cu a pok ih Sukkoth ah a feh. Cutawkah amah ih hrangah inn a sak ih a rannung hrangah deu a suang. Curuangah cuih hmun cu Sukkoth#33.17 Sukkoth timi cu deuthlam tican a si. ti ah hmin an sak.

18Jakob cu Mesopotamia ram ihsin a kir tikah Kanaan ram Shekhem khua himdamte in a thleng. Shekhem khua pawnah a puan inn cu a sak. 19A cuih hmun cu Shekhem ih pa Hamor ih tefa pawl hnen ihsin ngun tangka zakhat in a lei. 20Cutawkah biakṭheng a don ih a hmin ah El, Israel ih Pathian, ti ah a sak.

Currently Selected:

SEEMTIRNAK 33: FCL

Highlight

Copy