SEEMTIRNAK 31

Jakob Cu Laban Hnenin A Tlan

1Voikhat cu Laban fapa pawl in, “Kan pa ih ta a si mi hmuahhmuah Jakob in a lak ṭheh a si. Kan pa ih neihmi a lak ruangah hiti in a lian a si,” ti ah an ti kha Jakob in a thei. 2Cuih tlunah Laban cu a hlan bangtuk in a parah a mithmai a ṭha nawn lo ti kha Jakob in a hmu. 3Cutikah Bawipa in Jakob hnenah, “Na sungkhat le na laicin ih ramah kir thlang aw. Na hnenah ka um ding,” ti ah a ti.

4Curuangah ṭilva pawl a khalhnak hmunah amah ra tong dingin Rachel le Leah cu a cah. 5An hnenah, “Nan pa ih mithmai cu ka parah a hlan bangtuk a si nawn lo tihi ka thei a si; asinain ka pa ih Pathian cu ka hnenah a um ringring ko. 6Ka thazaang neihmi hmuahhmuah thawn nan pa ih hna ka ṭuan cu nan pahnih in nan thei. 7Asinain nan pa in i bum ih ka hlawhman hi voi hra a ṭhin zo. Sikhalsehla ka parih siatsuahnak a thlenter ding cu Pathian in i siang lo a si. 8Nan pa Laban in, ‘A ṭialcipmi me pohpoh cu na hlawhman a si ding,’ i ti tikah me pohpoh in a ṭialcipmi faate an nei. Cule ‘A ṭialkaumi me pohpoh cu na hlawhman an si ding,’ i ti tikah me pohpoh in a ṭialkaumi faate an nei. 9Pathian cun nan pa hnen ihsin ṭilva pawl kha a lak ih keimah i pek a si.

10“Cun ṭilva an hur caanah mang ka nei ih ka mangah mepi a pawltu mecang pohpoh cu ṭialngaanmi le ṭialcipmi le ṭialkaumi hlir an si kha ka hmu. 11Cule Pathian ih vancungmi in ka mangah cun, ‘Jakob,’ ti ah i ko ih, ‘Hinah ka um!’ ti ah ka ti. 12Cule vancungmi cun, ‘Zohhnik, mepi a pawltu mecang pohpoh cu ṭialngaan le ṭialcip le ṭialkau hlir an si. Hitiih cang dingin keimah ih tuahmi a si. Ziangahtile na parah Laban ih thil a tuahzia ka hmu thluh. 13Keimah cu hriak toih in hngilhlonak lung na phun ih thu na kamnak Bethel ah na hnenih a rak langmi Pathian ka si. Atu cu na tim tuah awla hi ram hi taan in na suahnak khua le ramah kir thlang aw,’ i ti,” ti ah a sim hai. 14Cutikah Rachel le Leah in, “Kan pa hnen ihsin kan co ding ro zianghman a um lo. 15Kannih tla cu ramdangmi tlukah in ruat ko lo maw? Kannih cu in zuar ih kan manih a ngahmi paisa hmuahhmuah cu a hmang thluh zo fawn. 16Pathian in kan pa hnen ihsin a lakmi lennak hmuahhmuah cu kanmah le kan faate pawl ih ta a si zo. Curuangah Pathian ih a lo sim bangtuk in tuah ko aw,” ti ah an ti.

17Curuangah Jakob cu Kanaan ramih a pa hnen feh dingah a tim a tuah thluh. A nupi le a faate pawl cu kalauk a toter. 18A ṭilva hmuahhmuah cu hmaiah a fehter ih Mesopotamia ram a um sungih a ngahmi thilri hmuahhmuah thawn a pok. 19Laban cu a tuu pawl ih hmul met dingah a feh ih a um lo sungah Rachel in a pa ih innsang biakmi milem pawl a rak ruk. 20Aram mi Laban cu Jakob in a bum ih a fehnak ding thu cu sim lotein a um. 21A neihmi hmuahhmuah a keng ih a tlan. Cawl loin a feh ih Eufrates tiva a tan ih Gilead tlang lamah a feh.

Laban In Jakob Cu A Dungin A Dawi

22Nithum hnuah Jakob a tlan a si ti ah Laban an sim. 23Cutikah Laban in a hnenum pawl a ko ih Jakob cu ni sarih sung an dawi ih Gilead tlang ah an man. 24Cuih zanah Laban ih mangah Pathian a lang ih a hnenah, “Ralring aw, Jakob cu ziangti hmanin hringhro cetci hlah,” ti ah a ti. 25Laban in a hei man tikah Jakob cu tlang parah riahbuk a rak sak zo; Laban khal Gilead tlang ah riahbuk a sak ve.

26Cutikah Laban in Jakob hnenah, “Zianghrangah i bum ih ka fanu pawl ral kaihmi nunau bangih na tlanpi? 27Zianghrangah i bum ih keimah sim loin a thupte in na rak tlan ziar? I rak sim cila, na feh tikah khan lungawinak le hlasaknak thawn khuang le dar le ṭingṭang tum phahin ka lo thlah ding a sisi! 28Ka fanu pawl le ka tule pawl hman i hnamterta lo. Na tuahmi hi aat-thlakza thil ṭha lo zet a si. 29Nangmah siatsuah theinak cu ka nei ve ko; asinain mizanah na pa ih Pathian in, ‘Ralring aw, Jakob cu ziangti hmanin hringhro cetci hlah,’ ti ah i ti. 30Na tlannak hi na pa ih inn zamrangih thlen na duhtuk ruangah a si ti ka thei ko. Sikhalsehla zianghrangah ka milem pawl tla na rak fir?” ti ah a ti.

31Cutikah Jakob in, “Na fanu pawl hi an duh na loin i long pang ding ti ka phan ruangah a si. 32Sikhalsehla kan sungte lakih pakhatkhat parah na milem na hmu asile amah cu thah a si pei. Kan milai pawl hi thu theihpitu an si pei ih, hawl awla na ta a si mi pohpoh cu lak aw,” ti ah a ti. Rachel in a pa ih milem pawl a rak ru ti kha Jakob in a thei lo.

33Cutikah Laban cu Jakob ih riahbuk sungah a lut ih a hawl; cuih hnuah Leah ih riahbuk sungah a feh; cuih hnuah an salnu pahnihte ih riahbuk sungah a lut lala. Asinain a milem pawl cu a hmu lo. A neta bikah Rachel ih riahbuk sungah a lut. 34Rachel cun innsang milem pawl cu a rak lak ih kalauk phurhmi dip sungah a khum ih a rak toh-nen. Laban cun riahbuk pumpuluk in a hawl naón a hmu lo. 35Cutikah Rachel in a pa ih hnenah, “Na rung luh ih ka din lo hi bawipa na thinheng hram hlah aw; nunau daan ka neih laifang a si,” ti ah a ti. Cuticun Laban in a hawl rero naón a innsang milem pawl cu a hmu thei lo.

36Cutikah Jakob cu a ai a thok ih thinheng zetin Laban cu, “Ziang mawhnak so ka neih ih ziangvek daan ka tisiat ruangah so hiti ih i dawi ih i hawl ciamco? 37Ka thilri zatein na zoh thluh zo; na ta a si mi ziangtal na hmu maw? Na hmuh asile na sungkhat le ka sungkhat hmaiah hin suah hnik; zo kan dik sawn ti kha relcat hai seh. 38Na hnenah kum kul sung rori ka um ih cuhmuah ka um sungah na tuu le na me voikhat hman an fa a siat dah lo; na tuurual sung ihsin tuucang pakhatte hman ka ei hrih lo. 39Sahrang in na tuu a deh tikah keimah sualnak a si lo ti langter duh in a sa na hnenah ka rak keng dah lo, a ai-ah keimahte in ka rak ruul mai ringring sawn. Sun ah siseh, zanah siseh, rukru pawl in an ru asile na kuan pei i ti. 40Voi tamzet sunih niling ka tuar ih zanih khawsik khal ka tuar. Ka it thei dah lem lo. 41Kum kul khengte na hnenih ka um sung hmuahhmuah cutiin ka rak tuar cuahco a si. Na fanu pahnih hrangah kum hleili na hna ka ṭuan; na tuuruun pawl kum ruk sung ka khal. Cucing hmanin ka hlawhman voi sawmsahra na ṭhin. 42Ka pa ih Pathian, Abraham ih Pathian le Isaak ih biakmi Pathian ka hnenah um hlah sehla ka kut lawngin i dawihlo zo ding. Asinain Pathian in ka hnaṭuanmi le ka zonzaihnak a hmuh ruangah mizanah a lo kawk a si kha!” ti ah a ti.

Jakob Le Laban Thukamnak

43Cule Laban in, “Hi nunau pawl hi keimah ih fanu an si; na faale pawl khal hi keimah ih faale an si ih ṭilva rual khal hi keimah ih ta hlir an si. Na hmuh mi pohpoh hi ka ta an si thluh. Asinain tuih hnuah cun hi ka fanu pawl le an faale pawl hrangah zianghman ka tuah thei nawn lo. 44Curuangah ra awla thukamnak kan tuah sawn pei ih hminsinnakah lungdawl kan tuah pei,” ti ah Jakob cu a ti.

45Curuangah Jakob in lungpher pakhat a lak ih hngilhlonak lung a phun. 46Cule a hnenum pawl cu lungto peng dingin a fial. Lungto cu an peng ih an lungpen kiangah cun rawl an ei. 47Cuih lungpen cu Laban in Jegar Sahadutha#31.47 Jegar Sahadutha: ti cu Aramaik ṭong in theihternak lungpen tican a si. ti ah hmin a sak ih Jakob in Galeed #31.47Galeed: ti cu Hebru ṭong in theihternak lungpen tican a si. ti ah hmin a sak. 48Laban in, “Hi lungpen cu nangmah le keimah karlakah thutheitu a si ding,” ti ah a ti. Cutiin cuih hmun cu Galeed ti ah an tita. 49Cule Laban in, “Kan ṭhen-awk tikah Bawipa in kan umnak fingfingah in kilkhawi hram seh,” ti ah a ti. Curuangah cuih hmun cu Mizpah #31.49 Mizpah: ti cu Hebru ṭong in In kilkhawinak hmun ti thawn a aw suah a bang aw. ti ah hmin an sak lala. 50Laban cun Jakob hnenah, “Ka fanu pawl na tisiat hai ih, nupi dang tla na ṭhit le keimah ih ka theih lo hmanah Pathian in in hmu ringring ti thei aw. 51Hitawk ah kan pahnih karlakah hngilhlonak lungphun le lungpen tla an um ti na hmuh ko. 52Hi lungpen le hngilhlonak lungphun cu kan thutheitu an si ding. Nangmah do dingah hi lungpen hi ka lan lo pei ih, nang khal in keimah do dingah hi lungpen, a si lole hi lungphun hi na lan lo pei. 53Abraham ih Pathian le Nahor ih Pathian cu kan karlakih thureltu a si ding,” ti ah a ti. Cutikah Jakob cun a pa Isaak ih biakmi Pathian hmin in siatcam in thu a kam. 54Cule Jakob in ṭilva pakhat a that ih tlangpar ah thawinak a pek. A sungkhat pawl a ko ṭheh ih zanriah an ei tlang hnuah tlangpar ahcun an riak. 55A thaizing zingpitah Laban cu a tho ih a fasuan pawl le a fanu pawl a hnamta ih thlaza a camta hnuah a khua lamah a kir.

Currently Selected:

SEEMTIRNAK 31: FCL

Highlight

Copy