SEEMTIRNAK 22

Pathian In Abraham A Hniksak

1Cuih hnuah Pathian in Abraham cu a hniksak ih, “Abraham,” ti ah a ko. Abraham in, “Bawipa, hinah ka um,” ti ah a ti. 2Pathian in, “Na duh zetmi na fapa neihsun Isaak cu hruai awla Moriah ram ah fehpi aw. Cutawk ramih a ummi ka lo hmuh dingmi tlang parah Isaak cu mei-ur thawinakah pe aw,” ti ah a ti.

3A thaizing zingpitte-ah Abraham cu a tho ih a laak tokham a dam ih a fapa Isaak le a hnenum pahnih thawn an feh. Thawinak hrangih hman dingah zanthing a khawm ih Pathian ih a sim ciami ramah a feh. 4A ni thumnak ni ah acuih hmun cu hlavang in a hei hmu. 5Cutikah a hnenum pawl hnenah, “Laak thawn hitawk ah rak um uh. Kei le ka fapa cu Pathian kan va bia ding ih nan hnenah kan ra kirsal ding,” ti ah a ti.

6Cun Abraham in thawinak hrangih zanthing cu a fapa a phurhter; amah in meiṭek le kawlnam a keng ih an pafa an feh. 7A rei hlanah Isaak in, “Ka pa,” ti ah a ko. A pa in, “Ziang a si ka fa?” ti ah a ti. Isaak in, “Meiṭek le zanthing hmuah kan keng ih thawinak hrangih tuu faate khui-ah so?” ti ah a sut. 8Cule Abraham in, “Amah Pathian in in pe leh ko ding, ka fa,” ti ah a ti. Cutiin an pafa an feh vivo.

9Cule Pathian ih a sim ciami hmun an thlen tikah, Abraham in biakṭheng a don ih a parah zanthing a ret. Cun a fapa Isaak cu a ṭem ih biakṭheng par zanthing tlunah cun a hlum. 10Cutikah a fapa that dingin a kawlnam cu a vun zuuk. 11Cu laifangah Bawipa ih vancungmi in vancung ihsin, “Abraham, Abraham!” ti ah a ko. Abraham in, “Bawipa, hinah ka um!” ti ah a ti. 12Cutikah vancungmi in, “Na fapa that hlah; zianghman ti-aw hlah. Na fapa neihsun ka hrangih na sian ruangah Pathian na ṭihzah zet a si ti kha ka thei zo,” ti ah a ti. 13Cule Abraham in a kiangkap a hei zoh ih tuucang pakhat hri-hnok lakah a ki ih awk awmi a hmu. A va lak ih a fapa ai-ah mei-ur thawinakah a hmang. 14Cuih hmun cu Abraham in, “Yahweh Jireh,”#22.14 Yahweh Jireh timi cu Bawipa in a pek tican a si. ti ah hmin a sak. Curuangah tuih san tiangin, “Bawipa ih tlang ah Bawipa in a pek,” ti ah mi in an run tita.

15Cun Bawipa ih vancungmi in Abraham cu vancung ihsin a ko sal ih, 16“Bawipa in hiti in a ti: Ka hmin in thu ka lo kam - hi thil na tuah ih na fapa neihsun ka hrangih na sian ruangah tlamtling zetin ka lo thlawsuah ding. 17Na tesinfa pawl cu ka karhzaiter ding ih vanih arsi zat in le tifinriat vunnel zat in an tam ding a si. Na tesinfa pawl in an ral pawl cu an neh thluh ding. 18Cun annih ka thlawsuah bangtuk in leilung tlunih miphun kip in thlawsuah in dil ding. Hi thil hmuahhmuah cu keimah ih thu na ngai ruangah a si,” ti ah a ti. 19Cuih hnuah Abraham cu a hnenum pawl hnenah a kir ih an zatein an umnak Beersheba ah an tlung sal.

Nahor Ih Tesinfa Pawl

20Cuih hnuah Abraham in a unau pa Nahor le Milkah in fapa an neih kha a thei. 21Upa bik cu Uz a si ih a naupa cu Buz a si; Aram ih pa Kemuel le 22Khesed, Hazo, Pildash, Jidlaf le Bethuel tla an si. 23(Bethuel cu Rebekah ih pa a si.) Nahor ih nupi Milkah in hi fapa pariat hi a hrinmi an si. 24Cule Nahor ih nusun Reumah in Tebah, Gaham, Tahash le Maakah a hring.

Currently Selected:

SEEMTIRNAK 22: FCL

Highlight

Copy